يازين تقوى الله وسنة نبيه

اليا ارضيت ربي ما عليه من الناس
	ارضيه سبحانه و يرضى عليه
والناس رضاهم غاية مالها قياس
	ولاني بكامل في رضاهم سوية
يالعبد لو تملك جواهر من الماس
	وتملك كثر قارون واكثر شويه
ما ترضي العالم وذا شي به ياس
	وهذه و سيله معجزه بشريه
يرضيهم اللي كون الجسم بحساس
	خمس حواس وكلبوها ذكيه
تكريم من ربي على كل الاجناس
	وشلون ما نشكر لرب البريه
خلقك يالمخلوق وكون على ساس
	تركع و تسجد له بنفسا رضيه
والدين للرجال مجدا و نبراس
	وتقواك بالله عز ما فيه زيه
وفيه الوقار وفيه ترتاح الانفاس
	يا زين تقوى الله وسنة نبيه
ومواصل الاقراب لك فيه نوماس
	تكسب رضا ربي و يدك سخيه
وزور المريض وكلمه تقول ما بأس
	تكتب وعند الله لها قابليه
وحق الخوي والضيف والجار مايداس
	وهذي اسلوم اهل الوفا والحميه
وانشدك يالي لك مع العرف مرواس
	ويش الذي لها حقوق قويه
سته حقوق و كلها ترفع الرأس
	عذارء وفاء مع الرجال الوفيه
الحق الأول للذي دينه افلاس
	وحقين للي منكر الجاهليه
وباقي ثلاثه احقوق لقريب الساس
	ومنهو يحله يأهل العرف ليه

طيب القصيده وزين معانيها خلاني أرد عليها بدري يابوطاهر والحقوق للأم إن ماكنت غلطان اللي ضاعت مع زحمة الدنيا الله يكفينا شرها ..

صح لسانك واعلى الله شانك دنيا وآخره على كل حرف كتبته

الله يحفظك يابو ريان ويرحم والديك على الدعاء الطيب ويشرفني اطلاعك

والرمعه مالك مهونه ياابو ريان

مساء الخير ابوطاهر وصح السانك على هذه القصيده الجزله الذي شدني فيها النصائح القيمه اما اللغز الذي اشرت اليه عندي رمعتان الامانه او الجيره

اسعد الله مساك يابو فلاح ويشرفني اطلاعك الله يحفظك والرمعه صح لسانك وبيض الله وجهك نعم هي
الجيره الكافر له حق الجيره حق واحد
والمسلم له حقين حق الجيره وحق الاسلام
والقريب له ثلاث احقوق حق الجيره وحق الاسلام وحق القرابه

صح لسانك ياذاير وانا اشهد انك شاعر
جزل والدليه هالفخامه الشعريه التي امامنا .

صح بدنك يابو فهد واطلاعك شرف لي الله يحفظك
وشهاده اعتبرها وسام على صدري يابو فهد

صح لسانك يـ ابو طاهر ماشاء الله عليك شاعر تحبك اللغز فـ القصيده على ماتبي دون ماينقص قصيدتك شي

صح بدنك يابو منصور واطلاعك شرف لي الله يحفظك