شاعر سحيمي .. موهووب وقادم وبقوه

السلام عليكم ورحمة الله وبركاته
اسعد الله اوقاتكم بكل خير ..

الشاعر ايمن ناير بن عوض السحيمي ..
لم يتجاوز العشرين من عمره .. موهوب يغازل القصيده ويغويها على كل البحور ..
بكاميرا احساسه .. وجزالة حرفه .. يبدع بـ اجمل الصور وادق الوصف .. رائع ومدهش فاختياره قوافيه

(ماشاء الله)

غائب ولا يتطلع على مايكتبه سوى القليل .. اقنعته بالتواجد قبل مايقارب السنه فالفيس بوك ..
حضوره هناك كان قليل جدا لكنه كثير وكثيف شعريا .. بعض ماوجدت في صفحته ..
اتيت به لكم وهو عباره عن بطاقات تعريفيه عن ابداع هالشاعر ..

رسمتك غيمه بصدري وضاعت ريشة الفنان

وحاولت اتحكم في هوا صدري على شانك

طمعت بغيمتك تروي عروق العاشق الضميان

ولكن الهبوب اقفت بها باسباب هجرانك

على الله في غيابك مايقابلني شقا واحزان

وعلى الله مايصادفني شذا عطرك وريحانك

ـــــــــــــــــــــــــــــــــــــــــــــــ

رقيت لعرش قلبي ملك وضلوعي الحراس	وعروقي دمها يجري ولا بالسمع والطاعه
وفكري من عدل حكمك نقى من صافي الالماس	تجيك بيوتها ياكامل الاوصاف خضاعه
الا يامنية العاشق .. الا ياقمة الاحساس	سفينة عاشقك في بحر حبك وانته شراعه

ـــــــــــــــــــــــــــــــــــــــــــــــ

ويش اسوي ليا جاني الغلط من قريب

واستعر بالضلوع الحدب مكنونها

ان تكلمت لحقت الحطب باللهيب

واشتعل ضو نار{ن} مايطفونها

الفتن روحت بامير تغلب كليب

والسبب ناقة{ن} جربا يسوقونها

كل ماحط هقوه في زماني تخيب

بينت لي ظروف الوقت مضمونها

ودام لي نفس ترضا بالقدر والنصيب

ربي يحاسب الانفس على ظنونها

ـــــــــــــــــــــــــــــــــــــــــــــ

ذاربي قلبي الابيض وكثر السماح

في زمان السواد وفي زمان الخطا

كم صديق(ن) غرس في وسط قلبي رماح

لين جرحه مع الايام زاد وسطا

كني الغصن والاحباب حولي رياح

كل ماخطو عليه مال غصن العطا

بارق الهم والهجران والبعد لاح

عقب ماكنت بيره والدلو والغطا

مابقالي لحرب البعد منك سلاح

اسرج الفكر خيل البعد ثم امتطا

سلمولي على اللي زاد في الجراح

وعلموه ان قلبي مات بعد البطا

ــــــــــــــــــــــــــــــــــــــ

من قدح فكري طار عن عيني النوم	ونقيت من جزل المشاعر معانيه
ماتلحقه شرهه ولا يلحقه لوم	مادمت في جنبه عن الناس مغنيه
فكر العرب يسري على مكسب اليوم	وفكري على درب الملاقا تسريه
هيضتني ياطير فكري على الحوم	وانته ليا جات المواقف مكفيه
غلاك ماهو داخل القلب مرسوم	غلاك وكر(ن) مالقا من يعديه

ــــــــــــــــــــــــــــــــــــــــــــ

من اغصاني على فجة طلوع الفجر طار الطير	يبي ينفظ همومٍ بالظلام يعيشها مقهور
وعسا في هدته يلقا من ظروف الدهر تفسير	ظروفٍ خلته يبقا مع الضيقه تقل مكسور
يكابد ضيقته ويلملم جروحه بلا تقصير	وحده لين مايمسي ويلقا ماجمع منثور
سجنه الوقت بالقسوه ويرقب لحظة التعزير	لانه مالقا جسرٍ يوصل للامل من شور

ـــــــــــــــــــــــــــــــــــــــــــــــــ

الله يجملني على طيب الجميع

والله يقدرني لرد حقوقك

اسعدتني ياصاحب الصدر الوسيع

وانت المعالي شابهتك بذوقك

تطوع اللي بالصعايب مايطيع

وتظفي على طيبك حسن منطوقك

احيان احس بداخلي برد وصقيع

واحيان تكويني لهايب شوقك

بعض النجوم بزحمة الكوكب تضيع

وبعض النجوم اليا نظرت تروقك

وانت القمر ياصاحب الحسن البديع

في كوكبي مافيه حي(ن) فوقك

ـــــــــــــــــــــــــــــــــــــــــــ

طار نومي مابقا غير السهر
	والدوا والجرح هو منك وعليك
ياحبيبي لا تبادلني النظر
	ودي ارمي كل شوقي براحتيك

/

ومن هنا ادعو الشاعر الرائع ايمن ناير للانضمام مع ركب المختلفين حضورا وابداعا بهذا الملتقى


صفحته ع الفيس بوك .. شعر وللشعر فقط
https://www.facebook.com/profile.php?id=100002657684807

..

يا مرحبا في الرفيق اللي دخل القلب قبل نشوفه اشهد ان الملتقى والقائمين عليه يرحبون في من مثله وشرواه:عجل لنا فيه ياابو منصور بيض الله وجهك

البقاااء يابو عواد ووجهك ابيض .. مالاحقنا غير الطيب والوفا من المنتدى واللي قايمين عليه .. وليت لي قدره واجيبه ماني بحوله هالايام
عند ابو فيصل وابو شهد وبالمره يعلمونه شغلته شغله مايعرف للمنتديات الفيس يالله يالله يمشي معه ..

حي ابو فواز ياحبنيله اشهد بالله انه قرم
وينشد به الظهر ولاهو قصور بالذيابه وان شاء الله انه يكون
باسرع وقت بالملتقى ,,,, تحياتي ياحياتي

شكراً أخي عبدالعزيز على النقل الرائع .. ومن خلال قراءتي لهذه الابيات أحسست بأني أمام شاعر متمكن ويملك أدوات وصور الشعر بشكل رائع جداً رغم صغر سنه ربي يحميه ويطول بعمره .. لابد من صقل موهبته وإظهار إبداعه ليواصل مسيرته الشعريه .. تقبل مروري ودمت بخير .

حياك الله ابو منصور انت والشاعر ايمن
وننتظر وصوله وابداعه في جميع اركان الملتقى

هذا وهو تحت العشرين من عمره يابومنصور !!!
أجل بعدين وش بنسمع ....بالتأكيد درر تليق بالشعر...
عبدالعزيز بن منصور ملتقانا يرتقي بأيجابيه حضورك المستمره فشكرا لك
ايمن ناير بن عوض شاعر نتمنى تواجده بيننا

الاحباء الاعزاء الكرام .. اعلاه
شكرااا لاتنتهي .. لكل هذا النقاء .. لاعدمتكم
وسبق وقلت عند (الله ثم عند ابو فيصل وابو شهد)
دمتم بكل خير

ايمن ناير شاعر مميز له مستقبل كبير ان شاء الله ونبي وعد منك ياابودولا انه يسجل معنا ونتتذوق شعره الرائع وهذي على يدك انا لا اعلم انه مسجل او باسم مسنعار لكن ننتظر ه بفارغ الصبر شكرا عبدالعزيز على كل ماتقدم للملتقى من ابداع

لم نتواجد هنا الا لاجل تنمية المواهب من ابناء القبيله فاهلاًَ به بين ربعه صراحه كبدايه قمه وتصوير جميل اتمنى تو اجده هنا وندعوه للحضور وشكرا لصاحب الموضع