ديوان الشاعر معزي فلاح واصل السحيمي

بسم الله الرحمن الرحيم

الطيب ماكل رجالً لبس تاجه
	من حظ من واقبه رؤس المراقيبي
عبدالجليل ان نصاك امدور الحاجه
	لاتعتذر وانت قادر تفعل الطيبي
نصاك واثق وروح يضجك احجاجه
	ان قمت له يالسحيمي قومت الذيبي
اليا نشدوه العرب بك قال ماواجه
	كمل لناصيك يالقرم المواجيبي
والناس بالناس وانا ابوك هراجه
	لاتصغي اذنك لشذاب العراقيبي
وان حل بك ضايقه خلاقنا ناجه
	ارفع يدينك ويعطيك المطاليبي
دنياك لو اضحكت لك ضحك غناجه
	خداعتاً صفوها زيفٍ واكاذيبي
حياتنا اكدارها بيديننا اعلاجه
	طاعة كريمً رجانا فيه مايخيبي
واصحابك ان شفت منها اعلوم منعاجه
	بالناس ماتعدم اخيار الاصاحيبي

بسم الله الرحمن الرحيم

هو كيف يفهمك والافكار متصلبه
	ونصاب ومهايطي رفع له المال شان
لاتناقشه ياوسيع العرف لاتغلبه
	وقله اموفق يالو خالف لراي الخوان
نيتك ياهن يابن هن متقلبه
	واذا الصراحه تزعل يالله المستعان
راياً يتعبك ولا راي تدل به
	درباً يوصلك بالممشى لبر الامان
مادام ذاك المكان امناسبك ضل به
	في قمة الضلع والافي سفوح الطمان
عندك حلالك وبالروض الخضر فل به
	وترا الليالي تقلب ماعليها ضمان
ماني امنشد ضمير افلان وش حل به
	مايخصني شان مع ذول او لذوليك زان
ابياتي ان راق لك مضمونها هل به
	وان كان ماراق لك قل ذي زلة السان
الرجل يحسب عليه الهرج لو زلبه
	وماجاز لفلان يمكن مايناسب افلان

بسم الله الرحمن الرحيم
شاركت في هذه القصيده في زواج الاخ مرزوق رزيق البركاني في تاريخ 3/10/1437هجري

بسم الله الدائم وغيره وجه ربي مايدوم
	الخالق الوهاب عالم بالصدور الخافيات
يا الله منك العون والتسديد عونك يالرحوم
	يا خالقن خلق وحيات وموت من بعده حيات
وبعد السلام ورحمة الله وابركاته للعموم
	صلوا على خير البشر مني عليه ازكى صلات
والحفله اللي تجمع اهل الطيب لو ليله ويوم
	يابوزبن يبقى لها ذكرى من احلى الذكريات
ومرزوق واللي مثل مرزوق ابيض الوجه امخدوم
	علي في حفل الرجال اللي دعوني واجبات
وبعونه الفرد الصمد معبودي اسد اللزوم
	زهمت جزلات البيوت وجن لي امهرولات
جينا انشرف ربعنا والشعر جاء معنا امعزوم
	معي احضرن النادرات الوافيات امرتبات
الجزل مطلبكم وغيره منطقي عنه امحشوم
	ما للقصيد ان ما لقي ترحيب ذوق ولاحلات
والشاعر اللي دائم الجزله عليها له وسوم
	ماجاب غير اللي صداها يدخل اعقول الدهات
في حفل ربعي ياشعر صافح بمعناك النجوم
	نبغا المعاني ضرب بندق من افمي المفردات
يا رحامنا يا ربعنا افراحكم عسا تدوم
	لاهل الوفاء جموع الوفاء ياتون من كل الجهات
يا رحامنا يا ربعنا ياهل المبادي والسلوم
	يشوش راسي وانطنخ وانا هنا ابحفل ابركات
اعيال ابن مرزوق كسابت نعم عوق الخصوم
	ضرباتهم يوم الملاقا بقبلاهم بالغات
اعيال عوداً وزعته بالطيب من خير القسوم
	ومن لابتي حرب الحرايب كاسبين الطايلات
من قوم ابن موقد ومن يجهل ببن موقد اعلوم
	ينشد اكبار القوم والاخبار بصدور الروات
يوم القبايل بالجزيره قوم تنطح جمع قوم
	ومطارد الفريس بظهور الخيول المسرجات
يوم المغازي والفقر والجوع والامن امعدوم
	لطريس ابن موقد فعايل بالدليل امثبتات
ومرحوم مشعان الظفر والدين زيزوم القروم
	فيه المدايح بالصحيح امعقلات اموثقات
ما للكبار امن القضايا الا قويين العزوم
	تصغر لمشعان الكبار وبه تهون الكايدات
وانا من اللي من يقابل كونهم طاح امهزوم
	وكل الخصال الطيبه فازوا بها علمن ثبات
سحمان يوم الطيب منه الناس معطى وامحروم
	مع القبايل صيتهم رؤس الجبال الشاهقات
اسجلهم في كل علم ايبيض الوجه امختوم
	في وقتنا الحاضر وفي ذيك السنين المرمسات
ومن يهضم احقوق القبايل يلحقه شرهه ولوم
	كل القبايل فيهم الوافي ومحمود الصفات
وتمت بعون الدائم اللي غير وجهه مايدوم
	وصلوا على خير البشر مني عليه ازكى صلات

بسم الله الرحمن الرحيم
دعاني الشاعر متعب علي الترجمي الحربي لحفل التراجم الذي مقرر اقامته في 27\1\1438 وأجل لوقت لاحق فكتبت هذه القصيده

بسم الله المعتلي باأعلا سماواته
	الخالق الرازق الغفار بادبيه
ياهاجس الشعر علمن لي طرى هاته
	أقلط تقهوى وعلمك بالعجل جيبه
الشعر ملزوم به لاجات حزاته
	والان ملزوم في نظمه وترتيبه
الشعر جاله مجال وزانت أبياته
	بختار لي طرق يطرب من أيغنيبه
متعب دعاني وحي الله دعواته
	الشاعر اللي اتنومس حرب أساليبه
قريت ياعوف قبل أسبوع جزلاته
	يازين طقه ومضمونه وتركيبه
متعب ومثله أتنومسني أمخاوته
	اللي لربعه نعم وافي لاصاحيبه
أبدعوته جيت طاب وطابت أوقاته
	مادام ربعه وربعي هم معازيبه
العزوه اللي يرف المجد راياته
	باأفعالها وطيبها ياحرب أماريبه
الطيب ياربعنا فيكم علاماته
	قوماَ أتكمل لناصيها مواجيبه
ذا الليل يامطيبه ياحلو ساعاته
	لمة رفاقه وجمع الله أمواصيبه
بضيافة اللي مع أهل الطيب بصماته
	وتاج النعم يالتراجم من مكاسيبه
شيخاَ أتشرف قبيلة حرب وقفاته
	الشيخ تركي احمود الترجمي طيبه
ماهو أبتوه أموثق من سلالاته
	الشيخ حربي أمجوتاَ مناسيبه
الله يبيض نهار العرض صفحاته
	طير أعماس الطراقي حلو ترحيبه
ولو قلت ماغير حرب الطيب ساداته
	زلت لسان الرجل منطوقه أتعيبه
الطيب بالناس الا ياكثر قاداته
	وفعلن ماشفناه لاهل الطيب نوحيبه
واختامها كمل الهاجس أمهماته
	اللي أبراسي لها وجه مناديبه
وسلمني الوافيه وأخذ أمكافاته
	اللي ينزل مقام الشعر ماليبه

بسم الله الرحمن الرحيم

ياخالقي يارازقي مبتدي بك=ياحامياً بيتك بطير الابابيل

وياعاشق الدنيا هواها يغدي بك=بحر ايتلاطم بالفتن فيه لاتميل

يوماً تزين لك تزين حبيبك= ويوماً توريك النكد والغرابيل

نوباً ربيع ونوب مدهر شعيبك=ترقاء بك العالي وتنّزلك تنزيل

ان جابت الايام بدري مشيبك=دنياء الفناء ياما بها من تهاويل

ماقدره من كونك لك يصيبك=اللي له التسبيح منا وتهليل

الجاء لرباً وان دعيته يجيبك=ناج العظيم وكل امورك تساهيل

يالطيب الانذال صدقك وطيبك=ما أثمر بها فقطع احبال المواصيل

مضرّتك مادامها من صحيبك=عطه الذي يشفي اقلوباً مغاليل

ولايزعجك مالك يجيبه نصيبك=خلك جمل لو كادك الحمل له شيل

وليا تقابلت انت ويا طليبك=بالمجلس اللي فيه شرح التفاصيل

ان ما لسانك سيف يرهب حريبك=اهل المكر يلقون بعض المداخيل

خلك قوي الباس خصمك يهيبك=افرك اخشوم اهل الحيل والاباطيل

لاتخاف غير الله رقيبك حسيبك=خالق مميت الخلق جيلاً بأثر جيل

مادام ماسويت شيئاً يعيبك=السجن مانزل مقام الرياجيل

واللي بغير الصدق يبغا يحكي بك=تحت القدم هرج العدى والمهابيل

والطيب اللي وان نصيته يثيبك=اللي هو الاول ابسوق الفناجيل

سوى من اقصى الناس ولاقريبك=ان رحت له لابد تلقاء محاصيل

بسم الله الرحمن الرحيم

دنياء الفناء مع صفاها الآم وهمومي=وسوى مواجيب ربي مّنها طايب

والناس بامورها ماني ابملزومي=ولاني مودي هروج ولاني ابجايب

لاكن يالشايب اللي دوبك تقومي=وان جيت تمشي تقول امن الوطاء هايب

رجليك ترجف ويدك بالعصاء تومي=ناج الرحيم الغفور المعطي الثايب

ابيات مضمونها وكاد مفهومي=ماني بجيب القصيد اذا ماهو صايب

يامن ببرك بذاك العود محرومي=تب من عقوقك وربي يقبل التايب

عن الزلل صح مامخلوق معصومي=بس الصفات المعيبه مكسب الخايب

مابغاء علومك وتكرم عّنك اعلومي=مايخاطب العايب الا واحدً عايب

لادمي ابدمك ولا اسلومك اسلومي=نظيف دمي ودمك بالعفن رايب

بعد بخصتك لقيت الفكر مسمومي=الله يعوض بك العجوز والشايب

الشايب اللي تقل بالوجه ملطومي=لامر ذكرك وقيل الهامل السايب

رغم وجودك يقول ابوك معدومي=ويقول انا ويش ابي بالحاضر الغايب

بسم الله الرحمن الرحيم

يامحمد اكتب لي ابترتيب=اللي اهجوسي تنقوها

عندي حلاها طعم حليب=بنات فكري تحالوها

زين القوافي لها ترحيب=بكتب قصيده وغنوها

في طيبه من سلايل طيب=وبطيب الذكر يطروها

ومدح العفيفات مابه عيب=يامن ابيوتي قريتوها

نظيفة العرض بنت اديب=للجنه اثنين جابوها

الصالحه بنت ذاك الذيب=الله يرحمك يابوها

من سترها معجب الطبيب=وادارة القسم زكوها

بنات لباسة الصليب=لخلاق واداب حبوها

وان كان للخايبات اصحيب=مصيونة العرض ماغووها

ماهو عليها الستر غريب=عليه الاثنين ربوها

وشف الرديين فيها ايخيب=ماهي لهم لو تمنوها

والطيب ان جالها خطيب=ان كان اهلها له اعطوها

ياحظه ان جابها النصيب=هنوه فيها وهنوها

امرافقه خيها الحبيب=الله يشفي لها اخوها

تدعو له الشافي المجيب=وربي سمع ماسمعتوها

يا موحدين الله الرقيب=الله يعافيه قولها

بسم الله الرحمن الرحيم

صوت المنادي للفريضه ايناديك=ارجم عدوك بالله اكبر وهبه

يامطيع راي اللي ابرايه امغويك=ابليس من يطيع رايه لعبّه

امقيدن رجليك ومكتف ايديك=عن بيت ربك مانعك ماتطبه

من باب نصح المسلم أخيه ابهديك=النصح واعتبرني امن الاحبه

يمكن ابيومن كان مثلك امحكايك=في قمة الغفله له ابوسط غبه

واخذ عبر من حال ذولي وذوليك=وصحا امن الغفله وافاق وتنبه

باب النقاش انته فتحته وابعطيك=الراي واذا ما يناسبك كبه

لله عليك حقوق فيها اموصيك=ولايفلح امضيع مواجيب ربه

ارفع لربك يامقصر مشاكيك=وضيقاً تحسه طاعة الله طبه

وانكان لك حسنات فاحفظ حسانيك=ليومن ترا به ماسجلك اكتبه

بناس لاتهرج ترا الله يوحيك=هذاك تمدح به وهذا تسبه

الناس باللي فيهم تقول تطريك=وكم من لسانه للمهالك ذهبه

الناس فيهم طيبين وصعاليك=وكلن يصاحب بالملا من اعجبه

كنك زعلت الله ياجار يهديك=دربن تورى بالتوافيق ذبه

خلاص مابنصحك مالي شغل فيك=النصح مايثمر بمن لايحبه

كلمات / معزي فلاح السحيمي .

بسم الله الرحمن الرحيم

بسم الله المبتدى ماخاب من يطلبه=جاء للقصيده مجال وبسم ربي بديت

سبحان من رحمته بالخلق قبل اغضبه=خلاق ذ الخلق ماغيره رجيت ودعيت

يامحمد اخذ الكلام اللي نظمت اقضبه=خابرك تهوى المعاني خذ بيوتاً بنيت

فنجال محكور من كيف القصيد اشربه=ايطير اعماس ضرمان الشعر بيت بيت

الناس كلن وله طبعه وله مذهبه=هذا صفاته كذا هذاك عكسه لقيت

وكلن تصاريف عقله مقنعه معجبه=وهذا يوافق لنا هذاك لا مابغيت

هذا تقياً صدوق وذاك يامكذبه=ومريض قلباً ما يصفالك يا لو له صفيت

الطيب ورث العرب ياكثر من يكسبه=فخر البدو كم سمعت وشفت و ايضا قريت

ورجلً على الطيب مطّلع لحيته وشنبه=ناصيه يلقاه فوق الهقوه اللي هقيت

ما اطوفه الطيبه لو انها تتعبه=ويذا عطاء قال انا من مد ربي عطيت

اليا نصته الكبار اشتالها منكبه=بالطيب يامعدنه روس الشواهق رقيت

وبعض الرياجيل لو انه كبر منصبه=ايغادره ماكسب يا غير قولت هبيت

رجلً مايظهر بميّقافه فلا تحسبه=لك عون حتى لو انه عزوتك لا اعتزيت

وياتاركاً للصلاه ابليس من يركبه=بالهاويه يحذفه خذ علمي ان مادريت

للنار يا طايع افكاره تراك احطبه=ويغضب يا لو اهتديت ويفرح ايذا عصيت

وماتعمله من عمل عليك من يكتبه=وتلقاه لا من بعث من برزخه كل ميت

ومن يمنا وقفت الخاطر تعرف اسببه=احفظ افروض الرحيم اللي لعفوه رجيت

بسم الله الرحمن الرحيم
يامن لك اصلي واهلل واسبحك=بعض اسنين العمر عطني عوضها

ويامن نشدني وش هي اخر نصايحك=والله يعلم نشدته وش غرضها

بعد تقهوا خذ علوماً اتفسحك=اخر بنات افكاري الكّ اعرضها

اما قبلها عقلك الله يصلحك=ولا ماجازتلك وعقلك رفضها

خذ الكلام اذا قبلته يريحك=الله يحفظ من صلاته حفظها

يافلان بالدنيا الدنيه مرابحك=حفظك افروض الله علينا فرضها

وبر الثنين اللي رضاهم اينجحك=من برهم كم كربه الله نهضها

ياما ارفعوا دعوه ان صابت اتفرحك=للي رفع سبعن وسبعن خفضها

ويا حسن ضني واهم الله ايسامحك=ماهو بكل الناس لا في بعضها

ماكل من هلا وقابلك بالضحك=صادق ابترحيبه السانه لفظها

يالحقد لو يمنا التسامح اتصافحك=مرضاء القلوب اتموت واهي بمرضها

واختامها ماهو بيمك اصارحك=وهرجه ماهي تنصاك لاتعترضها