ملتقى السحمان من حرب - شاعريرثي نفسه قبل وفاته بشهر

هذي القصيدهـ للشاعر العلم الكبير : محمد بن عبدالله العسيلي الحربي ( رحمه الله )
وهو محمد بن عبدالله بن فراج العسيلي الحربي من مواليد 1360 هـ
التحق بالخدمه العسكريه وانحال على التقاعد سنه 1412 هـ
وانتقل الى رحمه الله يوم الاربعاء 26 / 1 /1425 هــ
إثرحادث مروري على طريق القصيم ـ المدينه السريع ودفن في مدينه رياض الخبراء في القصيم
وأسماهـ الامير الشاعر : محمد بن احمد السديري رحمه الله بشاعر قبيلة حـــــــــــــرب

ولقبه بعض الشعراء بشاعر المواقف او القضايا ولقبه بعض الشعراء بمحامي قبيلة حــــــــــــــرب

وقد كان رحمه الله مفاخرآ للقبيله والتصدي لمن اراد الاساهـ لها
وهو من اشهر الشعراء الخليج واشهر شعراء قبيلته ..
وقد قال هذهـ القصيدهـ قبل شهر من وفاته ..
وهي عبارهـ

عن قصيدهـ يرثي بها نفسه مشيرآ فيها الى ان هذي الدنيا مصيرها ومالها للزوال ويتحدث فيها
عن الموت واليوم والاخر ويطلب الله عزوجل المغفرهـ والرحمه والقبول الحسن..
وحسن الخاتمه ..
غفرا الله له واسكنه فسيح جناته ..

ويقول رحمه الله....

الناس ناموا وانـا العبـرات اجاذبهـا *** جذب الدلي من معين وردها إحيامـي
بيديـن بــدو مشافـيـح تناهبـهـا ***في نقضت الجزو والماء وردة إزحامي
اشوف وانكـر مـن الدنيـا مذاهبهـا ***تضرب بنا امواجها في بحرها الطامي
ياكثـر روعاتهـا وقسـوة تقلبـهـا ***وما طاب فيها من الأحـوال مادامـي
اللي من أول اركوبه فـوق غاربهـا ***ماحصل اردوفها والمشـي درهامـي
تستدرج اهل الأمانـي فـي مكاسبهـا*** لكن هيهات تصدق فيهـا الأحلامـي
ومن صدق الريـح واعيونـه يكذبهـا*** كنه يقـارن غبـاه بفرصـة الرامـي
تمـر الأيــام ماكـنـي مجربـهـا ***من تضحكه يوم يبكي باقـي العامـي
يالله يالله تكـفـيـنـا نشـايـبـهـا ***ياواحد عن قضايـا الخلـق مانامـي
ياعالـم غيـب نفـسـي لاتعذبـهـا ***وتجعل لها حجة من نـور الإسلامـي
نفس ما باقي لها إلا شـوف طالبهـا*** والموعـد المنتظـر تدنيـه الإيامـي
لنـا مواعـيـد مانـقـدر إنجنبـهـا***توقيتها محكـم فـي وقتـه إحكامـي
تـرم المنايـا ولاتخطـي مضاربهـا*** ومن صوبته سهوم المـوت ماقامـي
ساعة حيـات إليـا وقفـة عقاربهـا*** الروح تصعد ويبقى جرحـي الدامـي
والمـوت ماتصلـح ارواح يخربهـا ***ابا أترك الزوج و الأطفـال الأيتامـي
يالوعة النفـس مـن فرقـا حبايبهـا ***ومن طول فرقا تعثر فيهـا الأقدامـي
لابـد مـن رحلـة مايعـود غايبهـا ***وعن الحقايق تواري كـل الأوهامـي
معـي الوثايـق مختـمـة قوالبـهـا ***وأخاف من نقطـة التفتيـش قدامـي
في مفترق طـرق ياكافـي مصايبهـا*** احد الطريقين واحـد منهـن إلزامـي
اما مع أهـل اليميـن وعـز جانبهـا*** ولا مع أهل الشمال وشرهـا الحامـي
رحماك رحمـاك يامـذري هبايبهـا*** يا وامر المسلمين بوصـل الأرحامـي
دعـوة طريـح الخطايـا لاتخيبهـا ***انا ضعيف الوسايل والهـدف سامـي
إليا وردت النفس ناضبـة مشاربهـا*** يالله من شربة تقطـع ظمـا الظامـي
واجيرنا من الجحيـم وحـر لاهبهـا*** وانت الذي من لجا بحماك ما يضامي

وشكرا للجميع
اخوكم بعيد الهقاوي