قصيده أعجبتني
 

قصيده للشاعر سلمان بن نفاع السحيمي

سعيد من وفق طريق الهدايه
	ربه رضي ثم المخاليق راضين
ولا الشقي عمره قضى فالعصايه
	مايمشي الا في طريق(ن) ماهو زين
يالعبد جنب عن طريق الغوايه
	والله معك يرعاك بالعسر واللين
تبغى نصيحه او تباها وصايه
	وصاية(ن) بالخير تسوى ملايين
من شان هذا العمر له انتهايه
	وتفارق الاحباب لو تبكي العين
وامسي خلاوي تحت ذيك البنايه
	لنحد بها بعد صلاة المصلين
ما عاد ينفع كل شي(ن) ورايه
	المال مع ناس(ن) على القلب غالين
ألا ولد صالح ويبغى رضايه
	وعلم(ن) وصدقه جاريه للمساكين
وبقيت افكر من خلاي بخلايه
	ياللي نسيت الموت رايح على وين
لكن يا ربي عليك الهدايه
	انك توفقني على الحق والدين
وان قلت كلمة خير هذا منايه
	لعلها تكتب لنا بالموازين
واجلس مع الغالين وافرض غلايه
	سواء بعيد الناس ولا القريبين
وامشي مع اللي مشيهم مستوايه
	ودوب وحده ما نشره في ثنتين
والوصل ماني قاطعه مع ولايه
	والله يامرنا بوصلنا للقريبين
لكن هذا الوقت فادح خفايه
	وبلشت بالصاحين قبل المجانين
وبصبر وصبري ما يضيع دوايه
	والصبر زين ويشرح القلب ويعين
لا صار ذا الدنيا ماهي في هوايه
	بحرم والبي مع حجيج(ن) ملبين
وصلاة رب(ن) ما يخيب رجايه
	وعلى نبي(ن) خاتم(ن) للنبيين

الشكر يابوريان ع هذا النقل ومن ماتعجبه هذه القصيده مع احترامي وتقديري للجميع لا يوجد به ذرة من العقل وصح الله لسان راعيها ولك وله بياض الوجه

تسلم يا ابو ريان على هذا الانتقااااااء والطرح الرائع

ابو نفاع شاعر الحكمه ومبدع بكل حالاته الله يطول بعمره

بيض الله وجهك على هذه القصيده والنصيحه منك ومن الشاعر سلمان

لك تحياتي وتقديري يا ابو ريان

اخوك الصغير -- مخلد مشعان

رائع كعادتك يابو ريان ,, وانت تقول قصيده اعجبتني ,, وانا اقول القصيده واللي ناقلها اعجبوني .....
لاخلا ولا عدم ,,,,,,,,,,,,,,,,,,,,,,,,,,,,,,,,,,,,,,, تقبل مروري ابو شهد