| من منطلق بدع الشعر والشعر ديوان العرب |
كتبت من جزل القصيد اللي ينومس قايله |
| لو إنها تشرى دفعت من الغوالي والذهب |
لكنها تهدا على عزوة تعدل المايله |
| تجمعهم الطيبه وعلم الطيب خير المكتسب |
مثل الخيول السابقه تعرف بطيب أصايله |
| قامت مراجلنا على عزٍ ماقامت بالرتب |
الطيب تبقى عزته والا الاوادم زايله |
| اهدافنا نسعى لها بالطيب والا بالغصب |
نطمح لها لو قالوا العربان محد طايله |
| العلم غانم والوفاء دربٍ وتاريخ أنكتب |
شالوه جداني قبل واليوم كتفي شايله |
| لا ماتموت الشجرة اللي ثمرها مثل العنب |
مادامت عروق الفخر والمزن دوم تخايله |
| سحابةٍ يبرق رعدها غير عن باقي السحب |
اليا مطرت مع كل وادي سيلت مسايله |
| حنا نجير المستجير ان جات غارات ولهب |
ونصير له فية وفاء نهار شمس القايله |
| مبطي وحنا جارنا يلقى بنا صدرٍ رحب |
يقلط بمدهال الضلوع ويرتكي نحايله |
| العمر يرخص للخوي وحناله السيف الحدب |
الراس نسقيه السطر زودٍ على صمايله |
| ناقف مواقيف الجبال اللي يلاعبها المهب |
وثباتنا وقت الشدايد تنتهي دلايله |
| اللي مايزرع غايته بالجد وجهاد وتعب |
بيموت والله ماحصد غاياته ووسايله |
| إذا المراجل كايده ماقد عشقنا الا الصعب |
واذا سعينا للكرم مانرتضي بدايله |
| جسرٍ مايبنيه الكرم والطيب وعلوم الشبب |
ساسه ضعيف ولا انهدم يهدم على هزايله |
| تعيش ياراسٍ على المدات والجود إنعصب |
في وقتنا اللي للأسف يظهر عطا قلايله |
| من لا رأى وجه الردا ماشاف للطيب طلب |
ومن لاتفقه بالمراجل ماعرف مسايله |
| اللي يبي يسكن بعين ويفترش رمش الهدب |
يوفي مع رجال الجميل وينتخي جمايله |
| عسفت مهرة غاية الشعار لو جات بعتب |
وأظهرت من خافق ضميري محتوى نثايله |
| يقولها اللي ملتقى ربعه له الطيب إنحسب |
والملتقى بوجود ربعه مثل (كرت العايله) |
