ملتقى السحمان من حرب - وحذرا الحسد مابينكم والقطاعه

السلام عليكم ورحمه الله وبركاته اسعد الله مسائكم ياربعي وعصابة راسي
والمعذره على الغياب لكثر الاشغال ومعكم في هذه المصافحه وان شاء الله تحوز على رضاكم
قصيده مرسلها علي خالي مسلم غالي السحيمي وهي عباره عن نصيحه للجماعه
كما جاريتها بابيات والقصيده يقول فيها

اليا اجتمعتم كلكم ياجماعه
	تراه عز ومفخره للجميعي
والبيت مايسكن لولا شراعه
	ولولا شراعه طار غداء مزيعي
وحذرا الحسد مابينكم والقطاعه
	وحذرا المنافق بينكم لايذيعي
ومن شذ عن ربعه مصيره ضياعه
	مهف من لاعاد خله يضيعي
للمجتمع نقول سمعن وطاعه
	والكل منا يكون باله وسيعي
لزومنا نقضيه في ربع ساعه
	والمال يخدمنا بوقتن سريعي
اجدادنا كانوا بفقر ومجاعه
	وقلوبهم ولفه وكلن مطيعي
ربي عطاهم بالنفوس القناعه
	والعبد ربه رازقه مايضيعي
زمانهم حربا تعاوا سباعه
	يشيب اللي ياجماعه رضيعي
من لاوقف دون الحلال بشجاعه
	والاخذاه القوم ماله شفيعي
وحنا بامان وباسط الله شعاعه
	وبدون راعي مال ملي التليعي
والبعض له مع الرواتب بضاعه
	هاذي بها يشري وهاذي يبيعي
يهبي دنيا بير بدون قاعه
	نجواك منها يامجيب وسميعي

الرد

حي الجواب وحي راع الوداعه
	ووداعتن مثل الذهب للوديعي
جتني ومن خالي راع الطيب ذاعه
	ينصح لربعه مايدور صنيعي
ورجال يفهمها تراها طماعه
	نصيحتن فيها الكلام الرفيعي
والعرف للرجال فيه البراعه
	وفيه الكلام الزين يلمع لميعي
وانا معك والرجل زنده ذراعه
	ومع الرفاقه مثل جار السبيعي
ودون الرفاقه موقفي برتفاعه
	ولايغرني خطو القطا والضبيعي
لاشك ابنصح معك والراي طاعه
	ومخالفات الراي شين طبيعي
مانختلف في وزن مده وصاعه
	واليد وحده والاصابع نفيعي
وياجاهل الدنيا تجيله لكاعه
	عقب الرخا لابد وقتن لكيعي
ذي حاله الدنيا سوات الزراعه
	لو اخضرت يرجع ذراها صريعي
لايغركم وقتن تغير انواعه
	وقتن بدورات المصايب قطيعي
كم واحدن غره زمانه ولاعه
	عقب السعاده صار شي فضيعي
وجمعه بلا رفقه تراها رعاعه
	مثل الضحاح اللي على كل ريعي
وصلو على المختار راع الشفاعه
	اللي عطاه الله للامه شفيعي