ملتقى السحمان من حرب - قصيدة بركات الشريف

الشريف بركات ابن عبد المطلب يوصي ابنه في هذه القصيده التاريخيه

يالله ياللي كل الأمّات ترجيك
	يا واحد ٍ ما خاب حي ٍ ترجاك
يا رب عبد ٍ ما مشى في معاصيك
	ما يمشي الا في محبتك ورضاك
يا مرقب ٍ بالصبح نطيت راقيك
	ما واحد ٍ قبلي خبرته تعلاك
وليّت يا ذا الدهر مكثر بلاويك
	الله يزودنا السلامة من اتلاك
ياللي على العربان عمت شكاويك
	وليت يا دهر الشقا أول مقواك
واليوم ها الكانون غاد ٍ شبابيك
	تلعب به الارياح من كل شباك
يا مالك اسمع جابتي يوم أوصيّك
	وافطن ترى يابوك بآمرك وانهاك
وصيّة ٍ من والد ٍ طامع ٍ فيك
	تسبق على الساقة لسانه لعلياك
أوصيك بالتقوى عسى الله يهديك
	لها وتدركها بتوفيق مولاك
الله برب اجدادك الغر يعطيك
	رضاه مع ما تمنّى من مناك
إحفظ دبشك اللي عن الناس مغنيك
	أللي ليا بان الخلل فيك يرفاك
واعرف ترى مكة حكمها بناخيك
	لو تشحذه خمسة ملاليم ما اعطاك
إجعل دروب المرجلة من معانيك
	واحذر تميّل عن درجها بمرقاك
لا تنسدح عنها وتبغاني اعطيك
	جميع ما يكفيك ما حاصل ٍ ذاك
أدّب ولدك إن كان تبغيه يشفيك
	واستسعفه من بعد مرباه بالاك
إما سمج واستسمجك عند شانيك
	ويفرّ من فعله صديقك وشرواك
والاّ بعد جهله ترى هو بياذيك
	لو زعلت امه لا تخليه يالاك
واحذر تضيّع كل من هو ذخر فيك
	معروف لا تنساه واوفه بعرفاك
ترى الصنايع بين الاجواد تشريك
	اليا طمعت بغرسها لا تعدّاك
واحذر سرور بغبّة البحر يرميك
	ولا عنده افلس من تشكّيك وابكاك
واوف الرجال حقوقها قبل تعنيك
	لا تعتمد بالقول فالحق يقفاك
وهرج النميمة والقفا لا يجي فيك
	واياك عرض الغافل اياك إياك
تبدي حديث ٍ للملا فيه تشكيك
	وتهيم عند الناس بالكذب واشراك
واليا نويت احذر تعلم بطاريك
	كم واحد ٍ تبغي به العرف واغواك
واحذر شماتة صاحب ٍ لك مصافيك
	واليا جرى لك جاري ٍ قال لولاك
ولا تحسب إن الله قطوع ٍ يخليك
	ولا تفرح إن الله على الناس بدّاك
الضيف قدّم له هلا حين يلفيك
	ومما تطوله يا فتى الجود يمناك
إحذر تلقّي الضيف مقرن علابيك
	خله محب ٍ لك صديق ٍ إذا جاك
واوصيك زلات الصديق إن عثا فيك
	ما زال يغطاها الشعر فاحتمل ذاك
راعه ولو ما شفت إنه يراعيك
	عساك تكسر نيته عن معاداك
واحذر عدوك لو ظهر بي يصافيك
	خلك نبيه وراقبه وين ما جاك
لا تأمنه واطلب من الله ينجيّك
	ويكفيك ربك شر ذولا وذولاك
شفني أنا يابوك بآمرك وانهيك
	عن التعرض بين الاثنين حذراك
إذا حضرت طلابة ٍ مع شرابيك
	إسع لهم بالصلح واللاش يفداك
إبذل لهم بالطيب ربك ينجّيك
	ولا تجضع الميزان مع ذا ولا ذاك
أما الشهادة فادّها إن دعوا فيك
	بيّن عمود الدين لا عميت ارياك
بالك تماشي واحد ٍ لك يردّيك
	طالع بني جنسك وفكّر بممشاك
رابع أصيل ٍ في زمانك يشاكيك
	لا شاف خملاتك عن الناس غطاك
واحذرك عن طرد المقفيّ حذاريك
	عليك بالمقبل وخل من تعداك
ثم العن الشيطان لياه يغويك
	ترى ان تبعته للشرابيك وداك
واوصيك لا تشكي علينا بلاويك
	أنت السبب طرفك عيونك بيمناك
واعرف ترى اللي من وطا (الفعر)واطيك
	ولا انته أعز من الجماعة هذولاك
ألمسك يا راسي من الذل واخطيك
	واحذر تكلم يا لساني حذاراك
والطف بجارك ثم قم دون عانيك
	وافطن لما يعنيك عن ربعة اخواك
يا ذيب وان جتك الغنم في مفاليك
	فاكمن إلين ان الرعايا تعدّاك
من اول يا ذيب تفرس بياديك
	واليوم جاء ذيب ٍ عن الفرس عدّاك
يا ذيب عاهدني واعاهدك ما ارميك
	ما ارميك أنا ياذيب لو زان مرماك
والنفس خالف رايها قبل ترميك
	ترى لها الشيطان يرمي بالاهلاك
ومن بعد ذا لا تصحب النذل يعديك
	وعن صحبة الأنذال حاشاك حاشاك
ترى العشير النذل يخلف طواريك
	وانا ارجي انك ما تجي دون آباك
والهقوة انك ما تجي دون اهاليك
	ولا اظن عود الورد يثمر يتنباك
والحر مثلك يستحي يصحب الديك
	وان صاحبه عاعا معاعات الادياك
لا تستمع قول الطرف يوم يلفيك
	بالكذب يقضي حاجته كل ما جاك
ومن نم لك ،نم بك ولا فيه تشكيك
	وإلياه قد أزرى رفيقك وأزراك
عندك حكى فينا وعندي حكى فيك
	وأصبحت مبغضنا وحنا كرهناك
ما اخطاك ما صابك ولو كان راميك
	واللي يصيبك لو تتقيت ما اخطاك
مار استمع مني عسى الله يهديك
	والنصح يا مالك لك الله لمولاك
عندي مظنّة ما تمثلتها فيك
	واطلب لك التوفيق من عند مولاك