ملتقى السحمان من حرب - خآين الخوُوه

هذه القصيده للشاعر/ عايد العتيبي .. بعنوان " خآين الخوُوه "

سلام الله على حرفن تجرع من جزيل اشعار
وصوف ابداع والمعنى على تمثال والحاني

بدايه من خفوق(ن) طال صبره وابتداء المشوار
يسوق القاف شاعر ما تزل يمناه متواني

يشيد فعله الطيب ونسله طيبين احرآر
وطيب المسك في ريحه يفوق اطياب ريحاني

عريب الساس من اصله وفصله من قروم اخيار
يشب النآر من صغره عسى مثوآه لجناني

ابذكر سيرة المكتوب نصيحة في زمن دوار
خذلني هالزمان اللي خاب الكيل ميزاني

غريب الناس لاتامن ولا تومي بيدك النار
ولا يسقيك من حلو الشراب بعذر ضمياني

ولا ترتاح في حله ولو إن الخطأ قد صار
سلم واستلم حقك فمان الله يافلاني

اما لو حصلك شيء موقف من قريب الجار
حاسب نفسك الأول وقول حسابك الثاني

واضحك لو يسددلك سهامه دون اي اضرار
ماضر الكريم الا حسود النفس منهاني

واحذر من قريب(ن) طال هجره دون اي اعذار
واحذر لا ضحك سنه كود السن ثعباني

واحذر لا تمادى في هروجه والهروج كثار
واحذر لا بكت عينه وقلت فلان بكاني

واحذر من تباشيره ولا من جديد اخبار
واحذر كذبة(ن) ساقت عواقب وانت ندماني

واحذر لا مدح فعلك ترى بعض الكلام اسرار
واحذر نفسه القشراء على يمناك طمعاني

الا ياخاين الخوه حسافه ياحسيب الدار
خساره غلطتي اسمه يعاشر عمري الفاني

جحود وناكر العشره ومرخص فيني الأقدار
ونفسه دون هآت وخذ وعقب الهات خلاني

عنيده خطوتي يوم المسافه بيننا امتار
ماجيته على كيفه هو اللي جاء على شاني

وخبر النآس من أول فيهم طيبين ابرار
ولكن بعضنا هاليوم تحلى بطبع خوآني

سرى فكري على مر المواجع وأجمل التذكار
واداري همي المسكون وجفن العين سهراني

ابدل فالورق وأكتب وأسطر بالقلم وأحتار
واستر حرفي النازح واقصد فيه عدواني

وابادل نظرتي يم السحاب وطول ذيك اشجار
تسابق خطوتي ذاك السرآب اللي تعداني

اسأل خاطري وأقول لو إن البشر أسعار
قيمة طيب المعروف ونكبة ذاك خسراني

الف ريال ماتكفي جنيه وفوقها دولار
صرنا زي سياسة بوش وحظ اليوم ياباني

وأنا مدري خيالي كيف يوازيه الشعور اقدار
يحتم وجهتي للرأي بواقع مر قد جاني

جفانا وقتنا الحاضر وعشنا في زمن جبار
رضينا بالحياه اللي وجدها حكم رباني

مشينا والأمل قدام خطينا مسلك المعيار
تخيلنا ظهور الحلم حقيقه ترحم احزاني

وأنا غافل بذاك الشخص يومه يدعي بإصرار
وعمري ماتخيلت القريب اليوم شيطاني

غريب اسلوبه وطبعه يزكي نفسه ويغتار
قصيره نظرته ماشاف ان الطيب عنواني

يؤسف خاطري ذاك السفيه بطبعه الغدار
صغير القوم لا يكفيه فضل عطاي وإحساني

قلبي والعطاء يمناي نفسي دونه ويختار
شعري مايجمله الكلام وزود قيفاني

وتمت سيرة المكتوب على ذكر المعد ادوار
يحللها الفهيم وناقد المذكور يعصاني

وتحياتي لكم جميع
بعيد الهقاوي