ملتقى السحمان من حرب - صواديف السنين

سر يا قلم واكتب لنا عذب الأبيات

على الورق يوم الورق يحتويها

عبّر عن اللي داخلي تسكن الذات

الضيقه اللي خاطري ما يبيها

مستوطنة بين الضلوع النحيلات

أكنها بالصدر وازريت فيها

جتني ونظرتها سيوف شطيرات

تحمل عتاد المعركة في يديها

بانت بعد ما شفت بالوقت ميلات

كن الصدر من غلقته يحتريها

سبّت صواديف السنين الصعيبات

اللي خْدتني للحزن واحتديها

أحاول أضحك لو ثواني ولحظات

مار البلاد بالنفس ما تشتهيها

حاولت بالدنيا تجي طوع ماجات

ما همّها جزني ولو ترتجيها

دنيا تسيّرها على الهون بسكات

تحدني للضيق واصبر عليها

والصبر طوّل والليالي مهيبات

واحلامنا كثر الشقى مبتليها

يا ليتها تضحك لنا بعض الأوقات

اسرج خيول احظوظنا وامتطيها

لكن سهوم الوقت تبقى قويّات

مدري وش اللي عقبها تقتفيها

يالله دخيل من سبب كل عثرات

يا فارج اهموم البشر كل ابيها

يا عالم مآبالصدور والخفيّات

تلطف بنفسٍ حزنها مكتسيها

محمد مرزوق السميري