ملتقى السحمان من حرب - خضـر البساتيـن

السلام عليكم ورحمة الله وبركاته اخواني ابناءقبيلة السحمان تحيه طيبه يشرفني بالانظمام
لهذا الموقع الشامخ بشموخ القائمين عليه حيث وجه لي الدعوه الاخ حبيب السحيمي ورغبه
مني على تلبية الدعوى نترككم مع اول مصافحه

قم يانديبي فوق غالي مثامين	من دولة اليابان جابه وكيله
توه وصل للمملكة قبل يومين	ياعاشق الفكسار با شة مديله
مصممه عالم مضت له براهين	عليه مابه حاجةٍ مستحيله
يحاولون الغرب صنعه من سنين	وعجز خبير الغرب يصنع مثيله
اقطم خشم يشدا لفرخ الشياهين	اليا ان صرم من رأس عيطا طويله
اليا اعترض ولا عطا يسار ويمين	مثل الهنوف اللي تكد الجديله
لاشافت العاشق مشت له على هوين	قامت تمايل خصرها وتخطيله
واليا ركبته مركبٍ لسلاطين	بعد المسافه ماتطلع حصيله
قدام لا يطلع سنا الصبح ويبين	عليه أبرسل للعوارف دليله
برسالةٍ مضمونها يالفهيمين	كلام سري من زميل لزميله
يأبو طلال اسمع ولا شفت بالعين	وملف دعوانا عليكم نحيله
أنشدك ماني ناشدٍ للبعيدين	والعلم من راعيه ياحبتيله
عن وضع مصفوط الرجال الصفيطين	زمل الحمول اللي تشيل الثقيله
هي مقبله يافاهمين القوانين	او مدبره ياكاسبين النفيله
عقاب ليل وقبل صوت المواذين	جاب الخبر رجال رافع شليله
يقول فيها راحو القوم مقفين	الحق وحل الوضع بيا وسيله
لامكذبه لامصدقه بين الامرين	وسقت الركايب بين عدله وميله
بلشت بالصاحين قبل المجانين	معادلين الهيل بالزنجبيله
ومر وأدها كبت عبيد لحسين	مدام دم حسين نفس الفصيله
اقبل بعيد وشفت قفو قريبين	المشكله بالسيل مدري مسيله
حظي بري ماخمن الهرج تخمين	وخير الكلا م اللي يقد م دليله
لديت عيني في سمانا اللنجمين	وبكيت من جور الليال المهيله
غابو وغيبتهم تهز الموازين	ولاكل نجمٍ غاب يطلع بديله
ثالثهم اللي وسد الراس خمسين	وان غاب فينا لادور عقيله
لو الفشق يالقرم ملي الكراتين	الفرق بالبارود ياهل الصميله
من بعد ماكنا على العرش واسين	وان بين لاناش الزناد الفتيله
اليوم فينا طامعين المساكين	الحمل مال وكيف نقدر نشيله
ارسلت لك من ورد خضر البساتين	باقه عليها غلاف شاعر قبيله
خلو عليها غلافها يالفطينين	لاتروح دعوانا عريضه طويله
لاتفتحون اقفال بعض الدكاكين	إن شلت للمفتاح جود مشيله
مايلدغ المؤمن من الجحر ثنتين	والبرق لاقفى حسافه تخيله
لاعميت عين ولا جرحت الحجاجين	شطرت عن طعن السيوف الكحيله
تمت بعون اللي خلقنا من الطين	والهرج يكفي عن كثير قليله