العز والطيب
 

تشرق علينا الشمس ساعات وتغيب	ونرقب قمرنا والرجاء في طلوعه
يا ماجد ابوصيك خلك كما ذيب	يصبر على ما به ويسري بجوعه
حث الركاب وادب النفس تأديب	وارقى سماء والليل وقد شموعه
واصل ربوعك وامسح الجرح ويطيب	والرجل عزه من معزة ربوعه
وليا نصاك الضيف عطه المواجيب	الكيف سوقه له وقدم قدوعه
فل الحجاج وكثر امن التراحيب	من شان لا قفا ما يبطي رجوعه
والضيف ما له غير حكم المعازيب	كمل مواجيبه وقدر خضوعه
والرجل ما يدخل به الشك والريب	يثبت على رايه ونهجه وطوعه
شبنا وحنا نخطي الدرب وانصيب	والنفس ما تقنع ودايم جزوعه
حنا بشر يا بوك ما نعلم الغيب	يارب ترزقنا بنفساً قنوعه
مرت علينا اظروف مثل اللواهيب	اصعب على الانسان من حب كوعه
اعزومنا شبت على الطيب واتشيب	وطموحنا ما فيه شياً يروعه
نتعب على الجزلات والعز والطيب	لو الدهر شانت علينا طبوعه

الله عليك يابو ماجد ... وحفظ الله لك ماجد وجعله قرة عينك .. قصيده جزله من شاعر جزل .. ولاتحرمنا جديدك ولايطول غيابك .. تقبل مروري بكل ود وأحترام

الله عليك يابوماجد وصح لساااانك ...
واللي هذا قصيده بيشيب على الطيب بدون شك ..
ننتظر تواصلك ولاعاد تبطي علينا وسجل أحد المعجبين بروعه ماتكتب ..


تكفون يالمراقبين شوفوا لنا حل بهالتنسيق..

صح لسانك يابو ماجد

تم التنسيق

صح لسانك ابو ماجد درر والله درر
ننتظر جديدك

اشكرك اخوي / ابو عساف على مرورك الاكثر من رائع

وتقبل تحياتي واحترامي ،،،،،،،،،،

اشكرك من الاعماق على مرورك اخوي احمد
وكلامك وسام على صدري

تقبل تحياتي واحترامي ،،،،،،،،،،

اشكرك يا ابو ريان وما انا الا قطر في بحركم
وسامحوني على التقصير
والله يشهد اني من المتحمسين في التواصل معكم في هذا الصرح الشامخ
ولكن ظروفي تمنعني
تقبل فائق احترامي ،،،،،،،،