ملتقى السحمان من حرب

ملتقى السحمان من حرب (www.alsuhman.net/vb/index.php)
-   ركن دواوين الشعراء (www.alsuhman.net/vb/forumdisplay.php?f=34)
-   -   ديوان الشاعر سلمان نفاع بن عمران السحيمي (www.alsuhman.net/vb/showthread.php?t=625)

زعيم سلمان بن نفاع 11-02-2012 09:13 PM
ديوان الشاعر سلمان نفاع بن عمران السحيمي
 
بسم الله الرحمن الرحيم
السلاام عليكم ورحمة الله وبركاته ,,,,
يسعدني ويشرفني ان اطرح بين اياديكم ديوان والدي الشااعر / سلمان نفاع بن عمران السحيمي .....
وانه لشرف كبيييير لي ,, سائلين المولى عز وجل ان ينفع به..

زعيم سلمان بن نفاع 11-02-2012 10:11 PM
اذا الانسان تضايق من ضروف الزمان والمشاكل العامه والخاصه , يلجأ الى رب العالمين والله عز وجل يفرج كل كربه عن عبد(ن) لجاله ...


انا اليا ضاقت علي المحاريف نظرت للي كون الكون كله
لا صار فصل الصيف ماهو مع الصيف تقلبت مافيه فصل(ن) محله
تريحو يا أهل الركاب المشاعيف مابه شهور تهل من دون اهله
بنطوع الدنيا ولاهي على الكيف وقت(ن) ينرفزني وقت احتمله
وقت(ن) ربيع ويكثر العشب والريف مافيه غصن الا يظللك ظله
وقت(ن) تقلص فيه حتى المصاريف حتى رضيع الديس دمعه يهله
لكن اباصف حالة الوقت توصيف الرجل يتعب ماقضى حاجة(ن) له
خطوة غني ما يلد بالعين فضعيف مشغول بالجوال ولا المجله
وصار الضعيف اليا جلس ماله سعيف واليا هرج محد(ن) سمع هرجة(ن) له
وأستثني اللي لا وقف بالمواقيف له مجلس(ن) للناس محد(ن) يمله
وضاعت قوانين العرب والمعاريف الناس ماهوناس والوقت عله
وقت(ن) يفرق بين ناس(ن) مواليف حتى رفيقك شان طبعه ودله
المشكله صارت من السيف للسيف كل(ن) مشكله عصابه وشله
والذيب حول من طويل المشاريف لجل الثعالب شرهة في محله
حول من المرقاب مقهور ومعيف حزين لو ان الليال امهلله
الله يعز اللي حمى الدار بالسيف أحرار ما عاشو بعيشة مذله
جبال ما تثر عليها العواصيف عدوهم يصبح ويمسي بغله
وصلاة رب(ن) خفف الذنب تخفيف صلوا على رسولكم يا أمة(ن) له

زعيم سلمان بن نفاع 11-02-2012 11:24 PM
كان لي ابن يدرس طب في جامعة صنعاء وطلبت منه الجامعه دفع الرسوم وهو لم يستطيع على دفعها وهذا الكلام قبل امر خادم الحرمين الشريفين اطال الله في عمره بدفع الرسوم عن المبتعثين وطلب مني ان ارسله قصيده يسندها بأسمه لرجل فاضل يدعى / عبدالعزيز المحيميد من أهل القصيم فوصلت اليه وقام بالواجب بيض الله وجهه..


طلبت واللي يطلب الرب ما يخيب الدايم المعبود والغير ما يدوم
انه يحقق مطلبي داخل الجيب وان ما حصل راضي على كل مقسوم
ضاقت علي الأرض من عوية الذيب بأرض(ن) خلا ومن القرابات محروم
والظرف قاسي والدهر له كلاليب وأنا بعثرات الدهر صرت ملزوم
والجامعه قالت علومك تعاجيب وشلون تدرس وانت ماتدفع رسوم
قمت اتفكر ثم أصف التحاسيب وابو محمد رجل طيب ومحشوم
لكن طلبتك وانت قد المطاليب لعل راسك يكسب العز ويدوم
وانت كما حر(ن) في روس المراقيب واللي يقود القوم من خيرة القوم
واطلب لك التوفيق من عالم الغيب ويطول عمرك وانت سالم من اللوم
وأنا بشر لو كان وديت واجيب مايكتب الله عندنا فيه معلوم

زعيم سلمان بن نفاع 11-02-2012 11:56 PM
قصيده غزليه ..



سلام يا دار(ن) بها يدهل الريم ردية(ن) فوق القلوب نحملها
سلام في سلام مليون تسليم عداد ما تهل المزون بهللها
اللي حواجبها مزون(ن) مظاليم وبسماتها بروق(ن) تكاشف شعلها
دار(ن) مشى فيها يجي جوها غيم والأرض ينبت عشبها مع نفلها
قربه لنا راحه وبعده لنا ضيم وشوفه علاج نفوسنا من زعلها
وتكفون يالسحمان ربع(ن) معاليم لكم مواقف في محارب دولها
عند الامير نوخ الركب ونقيم ولا تسند النخوه على غير اهلها
هاتولي اللي حطم الحال تحطيم الجادل اللي تايهه في جهلها
هاتوه بسلوك الحلال المباريم ولا لي حسايف كان ربي عقلها
ويرتاح حال(ن)يسهر الليل ويهيم ويكتب سعد للنفس قدام اجلها
وان كان جبتوها علي الملازيم لا انشرلكم بيضا معالي قذلها
وان كان قفت ما على الربع تلويم لعلها تقفي ويقفي جملها

زعيم سلمان بن نفاع 12-02-2012 12:33 AM
بعض الاخوان الله يهديهم يتنافسون في غلا المهور , وهذي مخالفه لما قاله الله ورسوله صلى الله عليه وسلم ..
القى الشاعر هذه القصيده في بادية ابن شلاح .



عزيل من بنته يزوجها يبي منها غناه مايزوج الا واحد فلوسه كثير حسابها
وبعض العرب يفخر فبيعه بالمهور ومشتراه يحط له موتر جديد وفلة(ن) يرقابها
اللي بيجبرني بستين ألف وامشي في رضاه أجوز من بنته وشرهتها على من جابها
للسوق يجلبها ويلقى واحد(ن) رافع عصاه أقيام نسمعها وبعض أقيام ما يدرابها
لو الزواج امر(ن) مهم و ولا البشر سنة حياه لكن ما ابغى الجيزه اللي ننشغل باسبابها
وياللي تصومون الصيام ويا مصلين الصلاه هذي خطايا والخطايا ليش نفتح بابها
وعندي نصيحه للرجال وللذي عنده فتاه طرايق(ن) فيها الحرام نعيش ماعشنابها
والرجل يبقى رجل ما واجب ينزل مستواه كل(ن) يطهر سمعته من هرجة(ن) يحكابها
قلته وانا عمي مزوجني ولا فن العباه يمشي على قول الرسول وسنة(ن) يقدابها
والعم الاخر يوم زوجني ذهب بنته شراه وبعد تقوم بالعزومه والذبايح جابها
واشوف بعض الناس صاح وجاه شره من ولاه والناس ما واجب توجه غزوها لقرابها
لا صار هذا العلم أظن الوقت قرب منتهاه والله يصلح شان خلق الله من اللي صابها
وصلاة رب(ن) خالق الأمه وعشنا في رجاه وعلى الرسول افضل صلاة(ن) ربنا صلابها

زعيم سلمان بن نفاع 12-02-2012 01:12 AM
توجيه الى صلة الرحم والتكاتف بين الاقرباء والمحبه فيما بينهم , وهذا أمر(ن) مهم أمرنا به الله عز وجل ورسوله صلى الله عليه وسلم



سويتلي بيتين باجر الالحان بمناسبة وقت(ن) بدت به تخاليف
منها قطيعة رحم وحقوق جيران والالسنه تنطق بكذب وتزاييف
ومنها السماء خيل ويمطر بهتان والارض تشرب مير ماينبت الريف
لكن ابصبر واتحمل على شان اخاف موج البحر يصفق على السيف
والرجل كان بعرف والعقل ميزان واليوم مانعرف شتانا من الصيف
متجاهل(ن) كل المذاهب والاقنان وماهو معبر للحقوق المراديف
مال الردى عليه سكه وسلطان وشلون ينزل من طويل المشاريف
لازم نصير قراب واحباب صدقان فاللازمه ناقف لا جات المواقيف
وليا فتحنا باب لفلان وفلان روس العرب تضحك عليها الملاقيف
ولا صار بالاقراب راضي وزعلان محد(ن) ينام وتحت جنبه حجاريف
ولا ضيع المعروف مابين الاخوان وش عاد يبقى فالعرب من معاريف
وان كان ما جاء البر والنفع ذلوان محد(ن) بنافع فالعمار المناكيف
بقبل على المقبل ولاني بخسران ولاني على المقفي كثير التحاسيف
لا صار ما تدري بيومك يالانسان ختم بخير وصرف العقل تصريف
كم واحد(ن) غافل وسالي وطربان اليوم شيف ومن بعد يوم ماشيف
والراي لكم يا ذريفين الأيمان شغل المعزب هو جايز مع الضيف ؟
وان كان انا غلطان قولوا بغلطان واللي يعرف الكيف شرابة الكيف
وصلاة رب(ن) فيه رحمه وغفران يرحم ويغفر للقلوب المواليف
وصلو على الرسول من نسل عدنان شفيعنا لا جات ضيق المحاريف

زعيم سلمان بن نفاع 12-02-2012 02:06 AM
هذي القصيده بمناسبة ترقية حمود بن حسين البيضاني الحربي من رتبة نقيب الى رتبة رائد , سائلين المولى عز وجل له التوفيق والنجاح والسداد في حياته وعمله..



جاني خبر وأفرح ضميري وغنيت بأبيات شعر(ن) صافيات المشاريب
وزفيت من قلبي تهاني وهنيت لنا مواجيب وعلينا مواجيب
خوينا حقه علينا بتثبيت مثل حقوق الضيف على المعازيب
حربي وله وقفات من دون تصويت مواقفه في عاليات المراقيب
يا ابو حسين أقول ياليت ياليت مانسمع الا عنك طيب(ن) باثر طيب
نزعم ونفخر بك بعد ماترقيت ونطلب لك التوفيق من عالم الغيب
والخير فالك كل ما اصبحت وامسيت والله يسهلك جميع المطاليب
وانا على مرافق رفيقي تمنيت في جنبكم ما خاف من عوية الذيب
ياللي على راس الطويله تعليت من روس حرب مطوعين الاصاعيب
فالمعركه تطون روس الطواغيت وفالسلم دين وماسكين المحاريب
وانا سحيمي ماقفي عنه ما اقفيت ربعي ثقات ويتعبون المراكيب
القنبله لها مثبت بتوقيت وتوقيتنا لا ولعة بالمشاهيب
وقت(ن) يصير الحي من حسبة الميت ما يحصلون القوم منا مكاسيب
عدونا لو كان فارس وعفريت رماحنا حطت بصدره مضاريب
كل القبايل في المعارك لها صيت كم فارس(ن) حطت عليه المناصيب
ويفوز فيها أهل الحظوظ المشاويت وتعرف مواقف حرب من دون تجريب
وصلاة رب(ن) كون الكون والبيت يغفر ولاكنه شديد العواقيب
وعلى رسول الله صلوا وصليت شفيعنا لا جاء نهار الملاهيب

زعيم سلمان بن نفاع 12-02-2012 02:50 AM
تنبيه من مشاكل هذا الوقت وما يشغل الانسان من قيل وقال وعن كثرة السؤال , لأن الصمت عز الا الكلام الطيب وما فيه من فائده للفرد والمجتمع .




العاقل اللي عنده الوقت مفهوم متجنب الدنيا وتارك غثاها
يالو تجيه علوم ما يسمع علوم والنفس ما يمشي لها في هواها
وليا نشدوه يقول مافيه معلوم يسلم من النشدات واللي وراها
والصمت عز وصير طيب ومحشوم خل الأمور تسير في مستواها
ماتحب ريح الثوم لا تاكل الثوم خل الفتن للداعي اللي دعاها
دنيا تقلب في شهرنا مع اليوم وحتى القبايل ما تطيع أمراها
عدوانا صدقان واصحابنا قوم وكل القرايب تشتكي من ولاها
كل(ن) يجر الحبل ويطيح ويقوم وشلون تفلح قوم تشقر عصاها
حق الكبير اليوم مهضوم مهضوم يقال جاهل والكتب ما قراها
ان قال رايه راي ما هو بمدعوم والراي يرجع للمره وشركاها
حتى بنومه ما يتهنى من النوم والارض من حوله يقلب حصاها
وحب الشعير اليوم يوكل ومذموم جيل(ن) جحدنا والجمايل نساها
كنا على عز وقوانين وسلوم واليوم مفقوده وبيح حماها
أهل الوفا قلو والانذال بالكوم عليهم الايام دارت رحاها
ويالله عسا من صار لله مرحوم ويارب نفسي لا تخيب رجاها
وتسعد الحيين وابليس مرجوم وكل(ن) بحسب النيه الي نواها
جتنا بشر بتبيع الدين وتسوم والبير معروفه ونعرف غطاها
شفت الشنب منحوت والدقن ملموم وعلى جرايمها تربي لحاها
والمسجد اللي داخل الحي مزحوم وروس(ن) تهز وتستمع لخطباها
ولاهم على وضح النقا دايم الدوم لو به مخافه ما تسفك دماها
رملا وطفل يتيم مع بيت مهدوم حتى القصيره ما منت بقصراها
كن البشر راحت من الفرس والروم يهود ونصارى طاغيه في طغاها
وجمع(ن) على التوحيد ماهو بمهزوم الله معه في صبحها مع مساها
وانا ما ذم اللي لهم قدر معلوم اللي لحاهم غاليه من غلاها
وصلاة رب البيت والقاف مختوم وصلوا على الرسول في منتهاها

زعيم سلمان بن نفاع 12-02-2012 03:31 AM
توجيه نصيحه لسلك طريق السعاده والبعد عن طريق الشقاء ..



سعيد من وفق طريق الهدايه ربه رضي ثم المخاليق راضين
ولا الشقي عمره قضى فالعصايه مايمشي الا في طريق(ن) ماهو زين
يالعبد جنب عن طريق الغوايه والله معك يرعاك بالعسر واللين
تبغى نصيحه او تباها وصايه وصاية(ن) بالخير تسوى ملايين
من شان هذا العمر له انتهايه وتفارق الاحباب لو تبكي العين
وامسي خلاوي تحت ذيك البنايه لنحد بها بعد صلاة المصلين
ما عاد ينفع كل شي(ن) ورايه المال مع ناس(ن) على القلب غالين
ألا ولد صالح ويبغى رضايه وعلم(ن) وصدقه جاريه للمساكين
وبقيت افكر من خلاي بخلايه ياللي نسيت الموت رايح على وين
لكن يا ربي عليك الهدايه انك توفقني على الحق والدين
وان قلت كلمة خير هذا منايه لعلها تكتب لنا بالموازين
واجلس مع الغالين وافرض غلايه سواء بعيد الناس ولا القريبين
وامشي مع اللي مشيهم مستوايه ودوب وحده ما نشره في ثنتين
والوصل ماني قاطعه مع ولايه والله يامرنا بوصلنا للقريبين
لكن هذا الوقت فادح خفايه وبلشت بالصاحين قبل المجانين
وبصبر وصبري ما يضيع دوايه والصبر زين ويشرح القلب ويعين
لا صار ذا الدنيا ماهي في هوايه بحرم والبي مع حجيج(ن) ملبين
وصلاة رب(ن) ما يخيب رجايه وعلى نبي(ن) خاتم(ن) للنبيين

زعيم سلمان بن نفاع 12-02-2012 09:08 AM
هذي القصيده ينصح فيها الشاعر مروجين ومتعاطين المخدرات بأن يرجعون الى دينهم والى طريق الصواب



نصيحة(ن) مني توجه لهلها واللي ما يسمعها بدنياه خسران
مجالس الاشرار عنا نعزلها ولا نحطهم لنا حبايب وصدقان
نجالس الطيب ونترك هملها فكر بعقلك لاتدهور يا الانسان
أيامنا هذه كثير(ن) هولها تبغى جهاد وحزم من قلب ولسان
نترك وعرها ومشينا مع سهلها واللي غلط منا نقول انت غلطان
ترضون هدم قصورها مع فللها بيبانها فتيح من دون سكان
وهذا تدهور صحته مع شللها وقت النهار ينام والليل سهران
طفشان واعصابه تباين حللها نتيجة المسكر وتخدير الابدان
العيشه اللي ما انتبه لين اكلها هي السبايب غيرت كل ميزان
محرمات(ن) وسط جيبه نقلها عقب المعزه ليش يالرجل تنهان
اعمال سوء ويندم اللي فعلها واصبح مابين الناس مجرم ومندان
والنفس عقب العز ليش تخذلها فعل الردى يعمل لراعيه خذلان
وتلقاه مذ الحاره اللي دهلها والناس تحمله عداوه وكرهان
هذا غزو من ناس هذا عملها وديننا ما هزته بعض الاديان
في كبودها حرقه بتبري غللها كل(ن) على الاسلام حاقد وزعلان
لكن حكومتنا تبين زعلها للي وقف ضد الشريعه بعدوان
ومليكنا ابواب المشاكل قفلها ينهى عن المنكر ويامر بالاحسان
والمملكه كون لها امن(ن) شملها كل(ن) يريد العز شايب وشبان
ولي عهده كلمته في عدلها ومشيه رضا لمكون(ن) كل الاكوان
وان جات غلطه من جهل يحتملها الا لصارت عمد يحسب لها شان
مخلص لربه والامانه حملها واللي يصون الدين والعهد ينصان
حكام ترسي مثل راسي جبلها للشر رداعه وللخير عوان
وناس(ن) تحايلنا ما فادة حيلها ولا بلادنا على هوى كل طمعان
مهبط وحي واهل الحسد ما تصلها محمية(ن) من كل حاسد وشيطان
وصلاة ربي عد نازل هللها وعلى رسول(ن) له من الرب غفران

زعيم سلمان بن نفاع 12-02-2012 09:29 AM
هذي القصيده بمناسبة المقناص مع رضي بن عمران السحيمي (ابو نايف)


يالربع نبغى قنصة(ن) تشرح البال والصيد شوفه مثل شوف الغيابي
فالديره اللي سيلها قبلنا سال لج الخضار بضلعها والروابي
ترعابها الغزلان والعشب ما زال واشكل لا تدهل بالشعيب المغابي
تنزل مسيل السيل وتحوز للجال من خوف رمي معلقين الصوابي
ولا يصيدها من صار فيه التملمال فالقنصه الاولى تعذب وتابي
ماغير ابو نايف على الصيد يحتال يعرف مقانيص السهل والهضابي
ولا فالرجال قصور في كل الاحوال كل(ن) يقول انا وديع الركابي
لكن خطوة فعل يذكر وينشال وفعل(ن) نطشه مثل طش الزهابي
ولا كل منه يركب الخيل خيال والحر ما يوصف بوصف الغرابي
الرجل له وقفه وقيمه ومنزال ومن لا وجدها ما انحسب له حسابي

زعيم سلمان بن نفاع 22-02-2012 07:35 PM
هذي القصيده مهداه الى الشاعر الرائد المهندس/ حسين مرزوق بن راشد السحيمي ....



في خاطري حاجه وفالراس موال ما أرتاح لين اللي بصدري نقوله
وابي أتمثل من حسينات الأمثال وكل(ن) على ما يريد يشعب ذلوله
والمدح ما يعرض على كل رجال الا لرجل(ن) كامل(ن) في الرجوله
هذاك أبن مرزوق له فعل ينقال هذي شهاده بالصحيح معقوله
ظابط وتسندله مهمات الأعمال ومن حنكته كل العقود محلوله
يالنادر اللي في طويلات الأقذال حر(ن) وله ميقاع محد(ن) يطوله
محد(ن) يسب الحر في كل الأجيال الله مجمل منظره مع فعوله
ومن الوفاء وافي على كل الأحوال ويكفي لا قالوا من هذيك الحموله
سحمان كل(ن) جيد الجد والخال وكل(ن) على الطالات يسرج خيوله
عز الصديق وطوعوا كل محتال نطاحة(ن) للحمل كان ارتكوله
محد(ن) يقابلهم بالاقفى والاقبال لو احتمى الميقاف واشتد هوله
ياكود منه ينطح السيل لا سال قوم(ن) ما يوخذ حقهم بالسهوله
في بيوتهم للضيف مجلس ومدهال وجيره وزلات الرفيق محموله
وخويهم محشوم لو الزمن طال واللي زبنهم بالسعد رحبوا له
ولا في القبايل نقص رجلي وخيال والمرجله والطيب كل(ن) ينوله
فعل(ن) يزول وفعل يذكر ولا زال أفعال تفرق مثل فرق العموله
يا حسين أبن مرزوق ما قصد بها مال الا محبه في القلوب معدوله
تستاهلون المدح ياشبل الأشبال من شان لك في الطيب صوله وجوله
عسى لكم في جنة الخلد منزال وعسى دعاي الله يثبت قبوله
صلاة من نزل تبارك والأنفال رب(ن) خلقنا والعباد اسجدوله
وصلوا على من كان للرب مرسال نبينا والدين عارف أصوله

زعيم سلمان بن نفاع 22-02-2012 08:55 PM
هذي القصيده بمناسبة عودة خادم الحرمين الشريفين الى أرض الوطن سالما معافى بأذن الله عز وجل ,, ولقد حلت مع حلوله بشائر الخير ومنها البعثات الخارجيه على حسابه (حفظه الله) ....
سائلين المولى عز وجل أن يديم الصحه والعافيه على مليكنا وأن يمدد في عمره...



مرحبا ترحيبة(ن) تاخذ لها صوله وجوله وكل رجل(ن) يستمع ترحيبتي ياخذ نصيبه
من علوم(ن) طيبات ويستمع هرج(ن) نقوله بالتسامح والرضا والحب مافيها غصيبه
يا حزامي يا دفا جنبي وكل(ن) من حموله يا رجال(ن) لا دعا الداعي ما راحو في مغيبه
من بلاد(ن) مصدر النخوه ومصدر للرجوله فالرخا ولا مع الشده والأيام العصيبه
السعوديه معاديها ما يدخل بالسهوله ومن نواها بالمصايب حلة براسه مصيبه
حبها في قلوبنا موجود من عصر الطفوله والمحبه للوطن ماهي على سعودي غريبه
يا بلاد العز والخيرات وبلاد السيوله أفرحي بوصول أبو متعب حبيبك يالحبيبه
عزنا الله في حرم مكه وفي مسجد رسوله والبقاع الطاهره والنور في مكه وطيبه
عاش أبو متعب وعاشوا من معه واللي بحوله وعاش شعب(ن) كان جاء يوم المعارك ينغزيبه
لا حظرله مؤتمر والقا خطابه صفقوله يدفع السيئات بالحسنات من كفه وجيبه
كل عقده تعترض ربي يسهل ومحلوله الله اللي ملهمه حل العقود اللي صعيبه
نحمد الله بالسلامه ونترقب له وصوله كل ما ندعي لأبو متعب دعانا الله يجيبه
عشت يا سلمان وان ثقلت على المتن الحموله ترتكي للحمل والفزعه من الفزعه قريبه
عاش نايف عز للدوله وعز اللي عانوله صاحب الأفعال والأمجاد والنفس الرحيبه
يرحم الله شايب(ن) خاض المعارك بالبطوله ومن حكم بالشرع والسنه ترى ربي رقيبه
منه اللي حطله دوله ومركوبه ذلوله غير هو عبدالعزيز وكل دوله تقتديبه
واصبحت دوله لها تاريخ بعقال معقوله وقوة(ن) من دونها كتيبة(ن) تتبع كتيبه
كل ذا من فضل ربي واركعوا ثم اسجدوله واسع الرحمه ولا يرضا على المسلم غليبه
يا شباب المملكه عصر التطور ذا حلوله أكسبوا بعثات أبو متعب رخا ماهي تعيبه
كل رجل يمثل بلاده بمنطوقه وزوله والعلوم الطيبه هي المراجل والكسيبه
ثم أختمها بذكر منزل كتابه وقوله وللرسول أفضل صلاة وسيرته دايم عجيبه

زعيم سلمان بن نفاع 29-02-2012 08:50 PM
قصيده ترحيبيه بهذا العرين وبهذا الصرح الشامخ ....
((ملتقى قبيلة السحمان من حرب))



الملتقى له دور عند الرجاجيل وحنا رجال يهمنا ملتقانا
نسوق القصايد مثل سوق الفناجيل ونضراتنا قدام ماهي ورانا
وان جا الطلب فالكيل نوفي مع الكيل مكيالنا وافي على مستوانا
وميزانا مع الموازين مايميل وعلى طريق الحق تثبت خطانا
وترا لنا تاريخ جيل(ن) بعد جيل تذكر مدايحنا ما يذكر خطانا
متجنبين الهرج والقول والقيل هذا فضل من ربنا اللي عطانا
قوم(ن) لنا هيبه مثل هيبة السيل أفرادنا واعيانا وومرانا
على الوفا ندع الرجال المشاكيل ونلبي الدعوات للي دعانا
والخير مقبل في الليال المقابيل ويفرح بنا صديقنا اللي بغانا
ولا العدو ماهو محصل محاصيل مهما طمع فينا ما ياصل حمانا
سحمان نردع عايل القوم ما نعيل وبالطيب نكرم ضيفنا وقصرانا
نثبت كما ما يثبت الجدي وسهيل نجمين بادي نورها في سمانا
وكل القبايل ياصلون المواصيل عمومهم واصحابنا وزملانا
وصلاة رب(ن) يمهل العبد تمهيل وعلى رسول(ن) بالرساله هدانا

زعيم سلمان بن نفاع 29-02-2012 09:41 PM
هذي القصيده يدعو فيها الشاعر الى حضور زواج ابنه / خيال سلمان بن نفاع السحيمي ,, والذي اقيم يوم الجمعه بتاريخ 10/7/1430 هجري ,, ونشرت هذه الأبيات في كروت الفرح ...


يالله طلبتك ياعزيز الجلالي انك تسهلها بحظ وتوافيق
وانك تهني كل غالي بغالي مخلوق يطلب وانت رب المخاليق
من عقبها برسل ثقات العيالي واليا عزمنا نوثق العلم توثيق
لنا الشرف لا قابلونا الرجالي واول كرمنا نسوق الكيف تسويق
أحب جمع الناس ما ابغى الحالي يارب حقق فرحة القلب تحقيق
ربوعنا واعمامنا والخوالي وجيران والاصحاب من دون تفريق
وتركيزنا على الرفيق الموالي يقف مواقيفي ولا فيه تبريق
له وقفت(ن) معيه بطول الليالي واليا نخيته ما ادرق بالدواريق
وقت الرخا مكنوز مثل الريالي ويقضي لزومي حزة العسر والضيق
لا صرت طيب مايدور بدالي وانا ما بلحق من جميله ملاحيق
لو كان فيه وفيه عندي مثالي حبه في قلبي والضماير مشافيق
خلك كما حر(ن) بروس الجبالي ارفع نظرك ولا تدقق بتدقيق
حر(ن) لا صاد الصيد صيده جزالي ماله نظر في صيد طير الحميميق

زعيم سلمان بن نفاع 29-02-2012 10:42 PM
هذي القصيده رثائيه في رجل يدعى / مناور سلمان بن مناور السحيمي وزوجته وطفلة(ن) رضيعه ( رحمهما الله رحمة(ن) واسعه وأسكنهما في فسيح جناانه ) ,,
كان مناور (رحمه الله) موظف في الأماره بمنطقة المدينه المنوره وكان رحمه الله باار في والديه ومحاافظ علي دينه ويمتازبحسن الخلق ومساعدة المساكين ,,,ذهب وبرفقته زوجته واربعة اطفاال وكاانت الزوجه رحمها الله من النساء الصالحاات , ذهبو ليؤدوا مناسك العمره في مكة المكرمه وفي أثناء عودتهم الى المدينه قادمين من مكه اتااهم قدر الله وقضاائه واصيبو بحادث مرووري في منطقة (خليص) وكان ذلك في شهر ربيع أول لعام 1433 هجري وتوفيت الزوجه والزوج والطفله الرضيعه وقد نجى من الحاادث ثلااثة اطفال اخوه , وهذا الحادث فيه عبره وعضه للمعتبرين والمتعضين ولاكن هنيئا لهم بحسن الخااتمه وانشاء الله انهم من المغفوور لهم بأذن الله ....
((رحمكما الله رحمة(ن) وااسعه واسكنكما في فسيح جناانه وألهم اهلكما وذويكما الصبر والمن والسلواان))


زوج(ن) وزوجه سافرو من بلدهم لبسو حرمهم ثم راحو يلبون
طافو على بيت الله اللي شهدهم ونطلب لعل الاجر مضمون مضمون
مجهود والله ما يضيع جهدهم والناس تطلب ربها العفو ويهون
وعادو يبون ديارهم في نصدهم وصار المنيه جاتهم قبل يصلون
ونودهم ود(ن) مقابل وددهم الود بعض الناس خلاه مجنون
والله يعظم اجر منه فقدهم وهذا طريق(ن) والبشر فيه يمشون
خلو ثلاث صغار بقيو وحدهم وفراقهم لحظات والكاين يكون
أم(ن) حنون ويبشرون بسعدهم وحتى الابو في جانب الام مدفون
معهم رضيعه كفنت في لحدهم لعلها تشفع لهم ويتهنون
في ساعة(ن) ما وخرو عن وعدهم لعلهم في ذمة مكون الكون
راحو وخلو بنتهم مع ولدهم البنت تسع سنين ولا الولد دون
والثالثه طفله وبقيت بعدهم مع حزنهم يبكون والناس يبكون
خيم عليهم حزنهم مع نكدهم والكل منهم كان في الحضن محضون
والطفل لا دور هله ما وجدهم طفل(ن) في حب ابوه والام مفتون
لا شاف له ناس(ن) تعدو نشدهم وشلون بيردون وشلون وشلون
وشلون أساندهم وربي سندهم أدري لكن صغار ماهو بيدرون
الله يخليهم وياخذ بيدهم أظنهم للأبو والأم يدعون
الله خلق والناس محصي عددهم وبرحمته في ذمتي ما يضيعون
وصلاة رب(ن) يرحم ولا حسدهم صلوا على الرسول ياللي تصلون

زعيم سلمان بن نفاع 01-03-2012 05:13 PM
نافخ الكير




أحرق ثيابي صاحبي نافخ الكير أللي من اجل صحبته جيت عاني
بواصله ماني مكلف مخاسير ولا عاد يوم(ن) فيه جيته وجاني
ينفخ منافيخه على الجمر ويطير حتى وصلني شرها في مكاني
وما شفت في بيته ضيوف ومسايير ماغير انا وازريت لا اصبر ثواني
وشلون حظي طشني قاعة البير صحبه ما تنجح كيف ابصبر واعاني
وقلت له شي(ن) تسويه ما يصير وقال هذي مهنتي في زماني
ما يطيب لك دور على صاحب(ن) غير لا انته ولد عمي ولا من اخواني
قلت الفراق ومنك مابه معاذير بنغير الصحبه على شخص ثاني
ندور مثل ما يدورون المداوير لصاحب(ن) طيب وسيع البطاني
اللي مع اصحابه يعرف المقادير شي(ن) في قلبه ينطقه باللساني
صحبة وفا ماهي بصحبة دنانير ويصد لا شاف الزمان يحداني
ستر عليه المال وسط الجماهير ولا نحسبه من حساب العواني
لكن ترا الطيب علومه مسافير طول الدهر ما تصير عشره ثماني
يا لو كثرنا عليه المشاوير يقول مالك هم والشان شاني
وايامنا جربه وفيها تعابير ما يجوز لطيب يصاحبه داني
فرقه مثل جساس عن سالم الزير سالم شجيع وذاك غدار جاني
ترا الوفا مضمون بين المناعير ولا مع الانذال ماله ضماني
وصلاة رب(ن) صور الطير ويطير وصلوا على الرسول والعمر فاني

زعيم سلمان بن نفاع 12-05-2012 10:16 PM
قصيده رثائيه في عواض بن عايض السحيمي (رحمه الله)
(( سائلين المولى عز وجل ان يتغمده بواسع رحمته))



مرحوم ياللي لك معزه ومقدار لو الليال بغدرهن فرقنا
تنزف عليك عيونا دمعها الحار وعقب الفراق القلب ما يرجهنا
والقلب قام يدق بالحزن الاوتار على رفيق(ن) بالضماير غبنا
الاجل حل وثم شالتك الاقدار وطول غيابك ما نصلك وتصلنا
حطوك تحت الارض في طيب الدار فالبقعه اللي طاهره من وطنا
لكن عندك جار يانعم بالجار كل(ن) يدور جيرته ويتمنى
عساه يشفع لك مع الناس الابرار ونبقى براحه لا ذكرناك حنا
ونلقاك في يوم(ن) يشخص بالابصار ان زين المولى عملك وعملنا
اجلس معك وتقولي كل الاخبار في جنة(ن) فيها الخواطر تهنا
نحمد ونشكر ما نعارض لما صار وقت المصايب بالأله استعنا
لو كان ماننساك في كل مشوار يوم الليال المقبلات اقبلنا
كنا معك نجلس على شبة النار في مجلس(ن) بالطيب له زود فنا
وسوالف(ن) بين النشاما لها كار لا ذعذع النسناس منا ومنا
جلسات (ابو نايف) تطول فالاعمار مافيه يوم(ن) منك مره زعلنا
في ديرة(ن) حره وسكانها احرار نحبها من شانها دار أهلنا
تسودنا الغفلات والموت غدار لين المنايا نوخن ودركنا
لمحت بصر والناس في حزن وامرار مافيه جدوى غير لله زبنا
لا هنت يا راس(ن) سليم(ن) بالافكار عساك فالجنه ولا انته معنا
وانا بعدكم صرت اهوجس ومحتار مدري متى يوم(ن) يقرب كفنا
بقيت فالدنيا على الحزن صبار ومتى لا نادو بالرحايل رحلنا
صلاة ربي عد من حج وازتار وعلى نبي(ن) خفف الذنب عنا

زعيم سلمان بن نفاع 15-05-2012 01:17 AM
ما يجبرك على المقناص الا ناسه واهله ,,, امثال الذين ذكرهم الشاعر في هذه القصيده ...



مقناص لو اروح ماني بنشطان الا مجامل خوف خبل يحكابي
لا طالت الطرقه وزان القنص زان راحت علومه كلبوها هبابي
والقنصه اللي مع طويلين الايمان تدخل مزاجاتي ونالت اعجابي
بوجود ابو حاتم سلايل كحيلان رجل(ن) حكيم وهرجته فالصوابي
واليا ركب خلف وقلنا لمشعان مطوعين الخصم وقت العتابي
لكن انا في خوة اخوي شفقان ما امشي الين اخوي ليه يجابي
وان كان رحنا عنه بيصير زعلان يدري اليا منه درى عن غيابي
كبير قوم وله معزه وعرفان وكل(ن) لبو فيصل يحسب الحسابي
وليا تجمعنا بني عم واخوان هذا متاع العمر والكيف طابي
والامر شورى بين شايب وشبان والالسنه تنطق بحسن الجوابي
وناخذ سلاح(ن) نحمله فوق الامتان وشدو على الصالون باقي الزهابي
صالون ماهو من رخيصات الاثمان وسواقه اللي فالخطر ما يهابي
يذكر لنا وادي وخضره وغدران هلت عليه مروحات السحابي
خالي ثلاث سنين مافيه سكان والصيد متوفر وعذب الشرابي
وفالليل مانسمع به اصوات عربان والفجر نسمع به حنين الركابي
ونسمع عصافير تغني بالاغصان وحجل وقمري مع نغيق الغرابي
والبرق يبرق والمطر صار هتان والسيل ينزل من علو الهضابي
جلسه تريح البال وتسر الاعيان والجو صافي والهوى بنسيابي
والرحله اللي ريحت كل الابدان ماهي طويله لو تطول الوجابي
سحيمي وكل اللي على الجيب سحمان والاقربون افضل لحضرة جنابي
رفيقي الطيب على طول الازمان كان اعتزينابه وكان اعتزابي
ماهو مكاري يوم رافق فليحان فليحان يطعن فالظهر بالجنابي
والنذل لو يضحك لنا ماله امان لا اقفى رفيقه يطعنه بالعقابي
شاعر مدح ربعه ولا هو بغلطان كل(ن) يعرف العلم ماهو بغابي
وكل القبايل نعم من دون نقصان وقت الرخا ولا بوقت الصعابي
ما اهضم حقوق الناس واصير مندان وفالاخره كل(ن) حصيله يجابي
وهذا كلام(ن) له دلايل وبرهان مثل الحديث اليا رواه الصحابي
وتمت وصل الله على نسل عدنان وعسى الخواتم خير ماهي عذابي

زعيم سلمان بن نفاع 15-05-2012 02:05 AM
(( ليس كل من ادعى الرجوله قيل عنه رجل))


هاتو لي البندق ورزو هدفها بجلا عن الراس المعمس عماسه
تشهد لنا وقفاتنا اللي نقفها ومن صار ريس يستحق الرياسه
ريس لو ان رياسته مختطفها ماهي قديمه حدها حد راسه
خطوة رجل نفسه تعيش بلهفها العمر كله عايش(ن) في تعاسه
تايه مع الدنيا ويتبع ترفها ويلبس ثياب(ن) ما تجي في مقاسه
خبل(ن) ليا جا فالدعاوي عصفها ويسرح ويضوي حايس(ن) في محاسه
خله وحطو للبهيمه علفها وصك الاذاني خوف تسمع حساسه
الرجل ما يخم العلوم بطرفها علم(ن) بسيط وعلم يبغى دراسه
والعارفه كل الدروب يعرفها لا كبرت القالات عنده سياسه
الا لصار المعرفه بيعطفها يلوي علومه ومعها خساسه
فالليل حدث بالحياه وصفها والصبح يبني بيت منعاج ساسه
ناس(ن) تهدم غرف وتبني غرفها وعرق النجاسه ما يكب النجاسه
تابع موازين العداله وشفها النقص فيها لو عليها حراسه
مير انتبه لا تندفع في قرفها اصحى لنفسك خل عندك فراسه
صلاة رب(ن) له بشر مكتلفها وعلى الرسول افضل صلاه بحماسه

زعيم سلمان بن نفاع 15-05-2012 02:55 AM
قصيده رثائيه في المقدم / نمر بن منور السحيمي (رحمه الله)
((سائلين المولى عز وجل ان يتغمده بواسع رحمته))

يانمر ودعناك لمكون الكون هو الوديع ونعم راع الوداعه
في جنة الفردوس عساك مصيون عساك عن ضيق القبر في الوساعه
غالي علينا وانت بالقاع مدفون في قلوبنا حبك زرعته زراعه
لو الفراق بكيفنا كان ما تهون كل(ن) فزع دونك وشمر ذراعه
لا صار حكمة ربنا مابنا لون ياجب علينا صبرنا والمناعه
ياللي بعيد الناس عليك يبكون هذا دليل انك من اهل السباعه
رجل الوفا عنه الوفيين يدرون ذكرك كما بدر منور شعاعه
الناس تشهد في جميلك ويثنون قلبك حنون ولا نشا بالقطاعه
ونفس(ن) تحب الخير وتقدم العون ومواقف(ن) تاقف بها بالشجاعه
وشلون ننسى طيبة النفس وشلون والطيب والمعروف أخذته طباعه
لا جو هل الحاجات يا نمر ينخون سوى من اقصى الناس ولا الجماعه
كل(ن) يروح وخاطره منك ممنون وقت الرخا ولا ليال المجاعه
الله يعوض شايب(ن) فيك مفتون ويحماه رب البيت من كل راعه
ونرفع تعازينا مع اللي يعزون وندعي لكم بالخير في كل ساعه
يالام لا تبكين بالهون بالهون امشي في ارادة ربنا بالمطاعه
يالو فقدتي لك من الناس مظنون خليه يشفع لك نهار الشفاعه
تمسكي بالصبر والاجر مضمون بإرادة اللي منزله فالرفاعه
طريق ممشي والبشر فيه يمشون وكل يوم الموت ياخذ شلاعه
ناس(ن) حطمها الاجل من دون في دون كوم الجنايز مثل كوم البضاعه
العبد ما يندم ولا يصير مجنون يصبر لحكم الرب ماهو زعاعه
نصيحتي للابو والام يدعون ودعوة الوالد تراها طماعه
الوالدين لصالح الابن يسعون ادعو ومولاكم عليه استماعه
صلاة رب(ن) نزل الكاف والنون نزل كتاب وحافظه عن ضياعه
وصلو على المختار ياللي تصلون نبينا اللي خاف ربه وطاعه
يانمر ودعناك لمكون الكون هو الوديع ونعم راع الوداعه


الساعة الآن 11:36 PM.

Powered by vBulletin® Copyright ©2000 - 2011, Jelsoft Enterprises Ltd.
new notificatio by 9adq_ala7sas
HêĽм √ 3.2 OPS BY: ! ωαнαм ! © 2011-2012

Security team