ديوان الشاعر صويلح بن مرجي السحيمي
 

السلام عليكم ورحمة الله وبركاته

انا اخوكم صويلح مرجي عواده السحيمي

يشرفني ويسعدني ان اضع اشعاري بين يديكم لعلها تنال اعجابكم

ويكفيني مروركم الكريم عليها ودمتم بخير

معهد الخوف
 

في داخلي ضيقه وثوره وانقلاب	وفي خارجي لمقاوم الفتنه رسن
ينفك باب وينقفل عشرين باب	حتى الاماني في مهدهن عنسن
وهقوات نفسي بالغه حد النصاب	ماكنهن في معهد الخوف ادرسن
صار الخطا في خاطري مثل الصواب	وافراح عمري كل ماقمت اجلسن
طفت اربعين ولاجنيت الا العذاب	تايه مع الاحزان وظروفي قسن
الوقت طاحني على ضرسن وناب	واسناني اللي في جمايه سوسن
الى متى بطرد وراء ذاك السراب	والى متى بذكر امالن نسن
والى متى يبقى الاسؤال بلا جواب	والى متى بصبر على اوهامن رسن
والى متى والغيث في غر السحاب	واغصون قلبي جف ماها ويبسن
ثلاث حاجاتن تجيب الاكتلئاب	الفقر والوحده ودمعات المسن
وثلاث حاجاتن يردن الشباب	المال والبنون والوجه الحسن
صحيح بي ضيقه وثوره وانقلاب	لاكن معي لمقاوم الفتنه رسن

ياعزنا
 

ياخادم البيتين نفديك بالروح	ياعزنا من بد كل المخاليق
قلبك قبل قصرك لمن جاك مفتوح	تاقف مع اللي جاك فاليسر والضيق
ينهار شعبك كل ماغبت وينوح	والليا حضرت الشعب يرتاح ويفيق
عقب الخيام نعيش بقصور وصروح	واعلامنا ترفع بروس الشواهيق
ماعاد فينا جوع وهموم وجروح	انعيش في نعمه من الله وتوفيق
حتى العلاج اللي لنا فيه مصلوح	يصعب علينا كان قالوا على الريق
الله يحفظك ياملك حيث ماتروح	ويكفيك شر البلبله والتلافيق

الجروح الخافيه
 

البارحه يااحمد غدا الليل ليلين	ونجم الشقا يابوك عيا يغيبي
قامت هواجيسي تحد السكاكين	ونوخت فكري بين جني وذيبي
اصارع الدنيا على العسر واللين	واصبر على الشدات واخطي واصيبي
انا سوات مسدد الدين بالدين	واشيب عيني من رداة النصيبي
عهدي بناسي عام تسعه وتسعين	واليوم بين الناس كني غريبي
اخفي معاناتي عن الناس الادنين	واللي خلقني من عدم يعتنيبي
ولو الجروح الخافيه تاخذ سنين	والله ماكشف عورتي للطبيبي

ليش الزعل ؟؟
 

ليش الجزع ؟ ليش الزعل ؟ ليش الاعصاب
	ما دام رزقك منكتب في جبينك
بالصبر يمكن ينفتح للفرج باب
	اصبر وصابر واطلب الله يعينك
والصبر ما يمنعك تاخذ بالاسباب
	احرص على دنياك واظفر بدينك
ومد الوفا لا تبخس بحق الاقراب
	دايم قريبك فالشدايد عوينك
مهما حصل لابد تحسب له احساب
	لا يدخل الشيطان بينه وبينك
وارفع طموحك فوق واختار الأصحاب
	اللي تقف في وقت عسرك ولينك
العش وسطه ما يجي صقر وغراب
	يعني : عن الأنذال كرم يمينك
خلك مع أهل العرف وأصحاب الألباب
	ترى العرب تحكم عليك بقرينك
هاذي نصيحة شايباً عارضه شاب
	مرت عليه أسنين ما هي سنينك
خل الجزع ؟ خل الزعل ؟ هد الأعصاب
	واضحك ورزقك منكتب في جبينك

السرااااااااااب
 

ياسعد لاتحسبن الجرح طاب	والله انه ملتهب والجرح نيش
كل ماطال الزمن طال العذاب	اوزن النيشان والبندق تطيش
فيه ناس ترجع الشايب شباب	وفيه ناس(ن) ماوراها الا النهيش
يفرح الظامي ليا شاف السراب	ويصرخ المقروص من صوت الوشيش
السراب يظنه الظامي شراب	الظما هشهش معاليقه هشيش
والوشيش يظنه المقروص داب	مانساها قرصة الداب الغشيش
مايعيش الصقر في عش الغراب	وكل طير فغير عشه مايعيش
وان نبت له ريش حلق فالسحاب	ومستحيل يطير طير بدون ريش

همووووم ماتنطااااق !!
 

اللا يالله يامحيي العظام ومخضر الاوراق
	تجمعنا على علم الصحيح ولا تفرقنا
بمعروفك وفضلك تفرج الضيقه لصدر(ن) ضاق
	ياعالم همنا بالصبر والسلوان ترزقنا
بلشنا وإنبلشنا بجيل ماينقاد ماينساق
	يعادينا ليامنه شبع وإن جاع صادقنا
ماحشنا من وراه إلأ التعب والذل والإرهاق
	بلاشي نفعه وشفعه ياليته مايعايقنا
هموم إنطيقها لكن فيه هموم ماتنطاق
	تعبنا من الهموم اللي صداها مايفارقنا
فقدنا الطيب والترحيب والتقدير والاخلاق
	وعايشنا طرايق محدثه ماهي طرايقنا
من اول لادعينا للفرح نستانس ونشتاق
	وهلحينه ياحتى افراحنا صارت تضايقنا
طلبتك ياويلي العرش يلي تخضر الاوراق
	تثبتنا على علم الصحيح ولاتفرقنا !!
للمعلوميه : (الحقه) الناقه التي عمرها ثلاث سنوات0

البشت ؟؟!
 

اقول : ليت البشت يحصر على شان :
	مايلبسه ياغير من يستحقه
ولايستحقه غير ذرفين الايمان
	للمجد ناس وكل شي(ن) بحقه
ماودي إن البشت يظلم وينهان
	على متون اشخاص ماهي محقه
اشوف ناس(ن) تلبسه مالها أمان
	تجهل سلوم الجار وتخون حقه
إقلوبهم للشر بندق ونيشان
	وعيونهم درب الوفا ماتحقه
البشت فوق اللي مايذكر بالإحسان
	كالسرج لاحطوه في ظهر حقه
ياليت بيعه يحصرونه على شان
	مايشترونه غير من تستحقه !!
للمعلوميه: (الحقه) الناقه التي عمرها ثلاث سنوات0

قرية الاوهاااااام ؟!!!
 

يازمان الصمت عجل بالكلام
	قرية الاوهام صارت منطقه
لامتى والحق في وضع إتهام ؟؟
	اسجن البهتان والحق اطلقه
لاتقول الحل هوالإنتقام
	والله إني مانويت التفرقه
مايجي تحت اللحم غير العظام
	ولايغر اهل العقول إلآ الثقه !!
يازمن نسيتني همس الغرااام
	صرت انا المسمار وانت المطرقه
قرية الاوهام يهدمها الكلام
	من سنين الصمت صارت منطقه !!!!

السرااااااااااااب؟؟!!
 

ياسعد لاتحسب(ن) الجرح طاب
	واللة إنة ملتهب والجرح نيش
كل ماطال الزمن طال العذاب
	اوزن النيشان والبندق تطيش
فيه ناس ترجع الشايب شباب
	وفيه ناس(ن)ماوراها الا النهيش
يفرح الظامي ليا شاف السراب
	ويصرخ المقروص من صوت الوشيش
السراب يضنه الظامي شراب
	الظما هشهش معاليقه هشيش
والوشيش يضنه المقروص داب
	مانسيها قرصة الداب الغشيش
مايعيش الصقر في عش الغراب
	وكل طير فغير عشه مايعيش
وان نبت له ريش حلق فالسحاب
	ومستحيل يطير طيربدون ريش!!

(سحيم)
 

( السين):سيف(ن)نسلتة شانها شان
	لادارت صدوف الليالي بهلها
و(الحاء):حمية في دمه سر وإعلان
	روحة على شان(الحميا)بذلها
و(الياء):يمينه قابضه خير الاديان
	ونفسه عن دروب الرذيله عقلها
و(الميم):مداته جزيلات واسمان
	ومن يطلب العليا بعزمه وصلها

الديره
 

البارحه طرت علي الديره	ياالله عسى فاالامر خير وخيره
مدري وش اللي جابها في بالي	بس الوكاد إن الهجوس إكثيره
الديره اللي فيها مسقط راسي	المخ فيها منشغل تفكيره
فيها ترعرعنا ومنها اخذنا	شهادة حسن سلوك وافضل سيره
ديرة ذرا جنبي عصابة راسي	اهل الكرم والطيب واهل الغيره
ماني مفضل واحد(ن) عن واحد	كل(ن) وله ثقله وله تقديره
اصغرهم اللي بالضيوف يرحب	ويموت قبل تموت عنه النيره
واوسطهم اللي لانصاه اللافي	ينحر بعيره لو ماله غيره
واكبرهم اللي كلمته مسموعه	في دبرة الله ربعه وتدبيره
منهم تعلمنا الوفا والطيبه	ومنهم تعلمنا حقوق الجيره
ومنهم تعلمنا الكلام الطيب	بالصدق لا لفه و لا تدويره
وقالولنا: كذب الفتى له خيبه	وحباله اللي في عراه إقصيره
ومنهم تعلمنا حقوق الرفقه	واللي يقصر ينظر إفتبريره
إما تعذر له بعذر(ن) مقنع	واللا يتحمل عاقبة تقصيره
ماضي يشرفني ليا ذكرته	مامل من ذكره ومن تكريره
ياما سمرنا تحت ضو القمرا	والجو صافي والنجوم منيره
وياما شعمنا النار وقت الغبشه	واللي تأخر غاضنا تاخيره
والشاذليه تنقه الضرماني	بالبن والمسمار والتبهيره
ايام حلوه ماني إبناسيها	عصر(ن) مضى لي شاقني تاثيره
ياليتني لساع فيها باقي	دام المدن من جرف في دحديره
مليت من بيت(ن) مسكر بابه	الكل متحرص على تسكيره
يمكن يجينا الضيف مانشعر به	ويروح من عندي وهو في حيره
مدري مير الله قادر إيسويها	واهنيكم ياساكنين الديره!!!!

شمس الحقيقه ؟!
 

ياالله ياعالم بهمي وضيقي
	تخلف علي فمابقى من سنيني
ميت عطش وازريت لابل ريقي
	رغم المياه النابعه من يقيني
مكتوف وانا فاالحقيقه طليقي
	وتبرق بروق الشك بيني وبيني
عشنا وذقناه العذاب الحقيقي
	ولو اختفت (شمس الحقيقه) تبيني!
إمنول(ن) لاغاب عني صديقي
	يحتار فكري لين اشوفه بعيني
واليوم لاوالله بغير طريقي
	واللي يبيني في محلي يجيني
حتى رفيقي صار ماهو رفيقي
	نظرة عيونه واضحه مايبيني
بصبر واكافح كل همي وضيقي
	ياالله تسهل مابقى من سنيني

جروح(ن) عميقه؟!
 

ياويل حالي من تدابير الايام	وياشيب عيني من جروح(ن) عميقه
هاذالسنه روتينها يشبه العام	وازريت احصل لي ملاذ وطريقه
إلى متى وانا من الناس منظام؟	لافقت من ضيقه تجرعت ضيقه
فالصدر نار وقودها حزن والآام	اطيق شي وشي مقدر اطيقه
فيه حريقه خافيه تصهر الخام	وشلون اطفي بالدموع الحريقه؟؟
عشنا وشفنا من تستر بالإسلام	حتى الرفيق يحب عثرة رفيقه
واللي يبايعني على قطع الارحام	ماني رفيق إله ولاني صديقه
غصب إل(رفيقي) حق ملزمني إللزام	ارمي عيوبه فالبحور العميقه
ماني صغير(ن) لاكتب له بمرسام	يكتب ويمسح ماكتب في دقيقه
عندي رسن لمقاوم النفس وإللجام	وعندي من إدروس الليالي وثيقه
الناس مشغوله بتفسير الاحلام	وانا اشغلتني فالحياه الحقيقه!!!

,,,(( دموع التماسيح )),,,
 

اقوم ثم اطيح واقوم واطيح	واضحك مع العالم وجرحي سقيمي
تنهظبي الذكرى وتقعدني الريح	واساير الايام وارحل واقيمي
واللي يقول الحنظله تشبه الشيح	اقول هاذا في حياته غشيمي
العام اصدقها دموع التماسيح	واليوم اكذبها دموع اليتيمي
والله لوضاعت جميع المفاتيح	إني بخير وعز دامي (سحيمي)!
ربعي هل الطالات مثل المصابيح	ابخلهم اللي فاللوازم كريمي
ياتاج راسي يالرجال الطحاطيح	للعز دايم ياذراي ونعيمي
والله لو اطيح واطيح واطيح	مادام معي (سحيم) ماني سقيمي!!

,,,(( الجروح الخفيه )) ,,,
 

يابو محمد دخيلك تلتفت يمي	الناس ماتلتفت لي لو احاكيها
تراي ماني على خبرك يبن عمي	طرت عليه سوالف كنت ناسيها
احيان اعوذ من الشيطان واسمي	واقول : مال المياه إلا مجاريها
واحيان اعيد الحساب وينحرق دمي	واعاف دنياي واكره كل مافيها
اكبر طموحاتي إن الشمل يلتمي	لكن الجروح الخفيه كيف اداويها؟؟
احسن لي اعيش مثل البكم والصمي	الناس مهما نسوي صعب نرضيها
الخير بيخص لكن الشر بيعمي	دنيا دنيه كفانا الله بلاويها
نستني اضروفي الصعبه حليب امي	واحترت في حاضر ايامي وماضيها
امضيت عمري وانا متقلد(ن) همي	مدري متى الله يبن عمي يسويها
ارجوك تكفا دخيلك تلتفت يمي	الناس ماتلتفت لي ليش احاكيها !!

,,,(( برق الكاااارثه )),,,
 

كل(ن) على ماقيل : يسري بهمه	وانا سريت بهم من لا له إحساس
احس قلبي شايل(ن) هم الامه	واخاف من جلطه تجي فآخر الراس
خيلت برق الكارثه والمطمه	وشفت الثعول اللي كما حني الاقواس
وفقدت لي بالكون حاجه مهمه	اقوى من الفولاذ واغلى من الماس
حاجه لها قيمه وهيبه وهمه	من عقبها يحرم علي التنوماس
والله لالا طفل يرضع من امه	واخشى عليه اللي مايخفى على الناس
إني لطبق كل عفشي والمه	وارحل كما يرحل عن الدار عساس !!

،،،(( إمقيط ورشاااااه )),,,
 

إيو الله إن اللي نسينا نسيناه	لوإنه اقرب واحد(ن) من ربوعي
روح عساها روحت إمقيط ورشاه	الروحه اللي مابعدها رجوعي
اللاش يبقى لاش مهما رفعناه	اعمى عوج مرجوج شين الطبوعي
إمن الغضب وجهه مشابه مقفاه	وليا هرج ودك تسد السموعي
بعض العرب خسران دينه ودنياه	لوهو من اللذات ماهو قنوعي
وإن كان قصده يوم قفا اترجاه	يصبر علي شوي بحب كوعي
النذل ماوده ولا ود طرياه	الليا مشى معيه يعرقل طلوعي
كلن يدور واحدن من حلاياه	وانا مع اهل الخير ماني قطوعي
ياحظ من يعطى كتابه بيمناه	في ماقف(ن)مشهود وصفه يروعي!!