ديوان الشاعر فهد حمود دغمان السحيمي
 

المناسبه مرثية في خالي العقيد الشاعر بادي عواد السحيمي وكانت وفاته ليلة عرفه 1426الله يرحمه

يابوعوض كف الدلال البغاديد	كف الدلال المبهره واغناتي
واحر قلبي من هموم التناكيد	واجزعة بالقلب عيت تباتي
الله اكبر عيدنا ماهو بعيد	يافجعة حلت قبيل الصلاتي
من وين ببدأ يالوجيه المساعيد	تخذلني حروفي وتعصى عصاتي
راح الحبيب اللي عليه التواكيد	قرم الرجال مسيس الموجعاتي
ذيب المراجل والعلوم المسانيد	يازين ممشى الرجل من صدق ذاتي
خالي تصدعله قلوب الرعاديد	زيزوم حل ومتسم بالأناتي
وخالي علوم المرجله كنها صيد	بيديه ماتخفى عليه السواتي
وخالي سواة مجمع الشمل بالقيد	اليا رمى غيره سهوم الشتاتي
ولي خال ماتلقى عليه المناقيد	حتى ولو كبرت بالمجهراتي
وخالي حصاد علوم عز ومحاميد	قضى حياته بين جزل العطاتي
وما للكرم عن فخرنا حيد ومحيد	ما للسماحه عن دروبه نصاتي
هذاك عنده عار واكبر من الكيد	ماتصفط لجارك لونه فتاتي
ويوثر على نفسه على جوعة البيد	في وقت اكرم شخص يبغى النجاتي
شهم كريم سمح فيادة الفيد	حر سميدع صاحب المنجزاتي
ماهي شهادة مدح من دون تقييد	الا عليها اللي يدل الثباتي
وشمايل الرجال من غير تمجيد	تبرز لمحدود العقل والذكاتي
وياعيد ياعيد الشقى والتناهيد	ياللي جلبت إلنا الخبر والوفاتي
بيح شجون القلب جمله وتفريد	يوم الحجيج مصبحين عرفاتي
يالله ياللي تفعل الامر وتريد	يامالك الاملاك والكائناتي
ترحمه يومنه قضاها تماجيد	ادى الحقوق وخلص الواجباتي
ذكراه ذكر الأولين الاجاويد	ونعته زعيم المرجله والصفاتي
وصلوا على محمد صلاه وتحاميد	عد النجوم وعد كثر الاحصاتي

قصيده في عائلتنا عائلة ذوي دخيل

ماهمنا من عسير الوقت وصعيبه	نعطي ولو وسعة الاوضاع ماتعطي
نثبت على المبدأ المحمود ونهيبه	وعلى مكارم سلفنا فالخطى نخطي
وللضيف بسمه زياده في تراحيبه	وللمعتدي رد لانرضى ولا نخطي
وقلوبنا خضر يرد الفكر ويجيبه	الذهن سيال في التوصيف مايبطي
غض طريف المعاني حسن ترتيبه	ركب على شفة الذويق بالزبطي

قصيده غزليه

اغفيت يازين عن عين الرضى والهدب	واغفى المعنى يحارقه الهوى والهموم
مانته بملزوم تجرحني برمش حدب	لون قلب الولايف يعرف الي لزوم
ياقوني قدم عكاف اللحى والشنب	وياضعفني قدم خصر لا تثنى يقوم
أم العيون النواعس موردات العطب	الي تخالف وسيعين الحجى والقروم
ياروح روحي لاتذبحني بليا سبب	الي بوصفك عن التنكيل حظه يشوم
هذي سنين التوجد روحت والعرب	ماحست بنار حبك وانت قربي تحوم
كتوم وطوي صبر لو في زماني عتب	وبعض الاحيان لا والله ماني كتوم
ياهيه ياحلى من السكر وخدك عنب	وشبك على القلب غادرته وجرحه ثلوم
زايدك مع روعة في الزين حلية أدب	الله عطى وانت نوعك ماخبرته ظلوم
لبيه ياضحكتن تطرب فوادي طرب	أليا فرق راعي البسمه على الزين سوم
حمالة الطيب لو رهيت يابولهب	ذميت حظك مع رويع الحطب والهدوم
أهب لادلج بليل ونور وجهه اهب	بدر لون الشهر قاضي ولا تم يوم
يقبل سعد مبتسم واليا تقفى عجب	مزين الله جسمه بالقفا والقدوم

بعد الخروج من مسابقة شاعر الملك تكلم البعض ولاموني فقلت:

يالايمي والشعر روح من البوح	هون على روحك ترى الامر عادي
ماكل ماتبغاه تلقاه مسموح	لوخيلت سحب السما بالسوادي
انا وقفت وموقفي دونه الروح	بعد الجهاد وبعد فرك الايادي
بديت مشواري ومثلت مسروح	واردت شي وربك الي أرادي
عشرة الاف مغامر ورجل طحطوح	طيرتهم ياكود عشرة عمادي
هذا وانا توي من العمر ممنوح	والناس من خبراتها تستفادي
ولكل خيال تعثار وطروح	ولكل عالم هفوة ماتقادي
شف شعر ابوالطيب على الزين مجروح	وشوقي حداه من المناقيد حادي
لاتكسر المجداف انا توي اسوح	يدك بيدي نبني صروح ومبادي
وفرق يوم(ن) الشعر يدعيك وتروح	وفرق يومنك تروح للشعر عادي
وليا تغنى الورق من غصنة الدوح	زهمت عرق شدني يم بادي
شقر يداعب حرفها صفحة اللوح	تبري ضمير اللي من الهم كادي
يالايمي هرج سرى منك مسموح	هون على روحك ترى الامر عادي

مناسبة في احدهم في الجامعه كان ينقل الكلام وينم

الا مبلغ الي مايعرف ان الرجال جبال	ماهو بأي هباب الجنوبي يحركها
ولا كل من يبغى يهز الجبال وطال	حدر بطنها يغبربها ويتفركها
عماه الغبار ويردفه جملد ينشال	من الهامه العليا ويرضخ ونبركها
صعيبين باس وبطشنا اعمى وفيه خبال	هدد موت ماتعسربنا إنتعلكها
لها الحيسم الحاسم وتقلط على منزال	من العقل مايصدر بها ويتسلكها
فحظه ردي لا حيلة له ولا يحتال	نهاره غباش وكل بقعى يصككها
فيا مبلغه ناجه ونجه من الغربال	ترى ان شربكت ما عاد حي يفككها
ترانا بغينا الطيبه والطيب راس المال	لنا سنين ندفعها وهذا يدركها
وحنا ربينا نحشم ونرفع الرجال	تحرم علينا وهبة مايشركها
له بساط يمنى عز ومناعةوظلال	وخوه على طول الدهر مايملكها

في عمي سالم حينما اهتم وتذكر المصيبه التي جرت عليه بوفاة زوجته وأخيه

الصبر يابورايد الله يصبرك	يرشد به الرجال ويتم باسه
ياعم لعزوم الشديدات اذكرك	لو ان عزمك ماتراخى مراسه
ياعم انا بالحيل اودك واقدرك	واشوف فيك المحشمه والسياسه
وابقتسم هم يهمك واخاشرك	وافداك من جور الزمان وعماسه
ارضى بمقسوم الولي لو يكدرك	مقدور رب العالمين وقياسه
الله ليا حبك خبر وش تصابرك	وبلاك في الدنيا هموم وحساسه
وجات المصايب حايمات تدورك	ثوب مفصل ماتغير مقاسه
واليا صبرت برحمة الله ابشرك	برد الجنان وزود عقل وفراسه
وشوي وانوار الفرح من بشايرك	يسر وفرج موعود ربي لناسه
والدار دارن للبلايا تحاصرك	ما كل طرقات الليالي وناسه
ياعم جاك شعورنا مع مشاعرك	قاف سرى من صوب دار الرياسه

قصيدة في اعز اصحابي تخرج من الجامعه الاسلامية عبدالرحمن بن مبارك الهاجري وسافر الى الكويت الوداعية في تخرج عبدالرحمن:

ياصاحبي قضى القدر بين الأصحاب	والشمس غابت من بعد ما تجلت
وبكى على فرقا المحبين الأحباب	وضاقت قلوب كنها ما تسلت
ياعين وشب الدمع له در تسكاب	روفي ترى قوة صويحبك قلت
وان كنت مالومك قسى البعد غلاب	يجعل مكاميل العقول إتفلت
أربع سنين تغيب والود ماغاب	وصدق المعزة في الرفاقه تجلت
وطبع الفتى لقريب الطبع ينساب	لولا الصداقة يمدي الخلق ملت
وانا فقدت الصاحب مثله ان غاب	غابت معه فرحة صحيبه وكلت
يالايمي كف العتب مالك حساب	عسى اليمين الجاحده وصل شلت
العشره تهز الجامدات الأصلاب	كيف النفوس الي بالأيمان حلت
وصويحبي لمعوضل الجرح طباب	يفزع ليا من الأصاحيب ذلت
يا كم طرقنا والغرابيل نشاب	فصدورنا وبهرجة الخط ولت
ويا كم فتلنا للمهمات الأنشاب	أليا لمح براقها واستهلت
واليوم من عقب الدنا والتقراب	روحت وعقال الحكايات فلت
أهب يالوقت القوي يانت غلاب	دونك ظنون العارفين إستقلت
لكن على الله من عقدها فلا خاب	لكثر فضله عمي الأبصار دلت

في عبدالمجيد سويلم السحيمي وقت الدراسه في الرياض سافر واشتقت له

شفني على ضو الصباح استهليت	وحضرت فنجالي وصفة دلالي
وفتحت بابي وابتهجت وتشهيت	للمرجله ومعانقة كل عالي
وناديتهم رفقة وفا يوم ناديت	ونفضت مركايه وزينت حالي
أبي ليا من العرب ردت الصيت	قالوا ترى السحمان نعم الرجالي
سمح النفوس وبيتهم للعرب بيت	وألف وهلا ترحيبهم للعيالي
مدهالنا الي ماتجيه السرابيت	ولا ضاق عن وجه الكريم المجالي
يمدح بوسعة صدر راعينه بويت	وان ضاق عيب راع قصر العوالي
ولا انت يابن سويلم اليوم ماجيت	فاقدك ماتقفد من الناس غالي
يفداك سواق العلوم الخثاريت	وماتكتحل عينك هموم الليالي
ولا تطيح في حظ الردي والحتاحيت	وتسلم من حظوظ السنين الهزالي

عسى قلبي الي له من الوجد رجف عروق	يذوق الهنا بعد العنا والتسهادي
معاليقه الي جاوبت دعوة المعشوق	جنت ثمرة العلقم وحرقن الاكبادي
ألا ونة جريتها مثل هدر النوق	على بكرها نحرت لضيفانهم زادي
نحرها معزبها وهو عجل جوه طروق	تلفت وحار يخاف من سيف الانقادي
وغدت لأمها طول المسا هنهنه وحروق	وذاقت من الهجران بعاد الأرقادي
فانا مثلها والله يعافي بلا المحروق	يحده عن النوم الهني والونس حادي
على الهون ياسايق خطايه لداره سوق	تعوص القدم عن داره غيره وتنحادي
تحكمت بي لا رحم حيك تقل معيوق	وانا أخبر منول درب صدري وميرادي
هذا عيب من جيته وكلي طرب وخفوق	وقلنا الأمور سهود والسالفه عادي
أثر تاليتها ياعرب غادين مطفوق	شراعي على هبة هوا صاحبي غادي

روحانيه دينيه

يارب روحي قرب الموت يارب	ارحم ضعيف زاد ضعفه ذنوبه
صاحبت هالدنيا وهي مالها صحب	وصدقت آمال الزمان الكذوبه
ومشيت درب الذنب يا مقبح الدرب	وفرطت في العمر القصير النهوبه
ان ماشملتني رحمتك طحت بالكرب	ولاني بخير إن مس روحي عقوبه
ياللي حويت بجودك العجم والعرب	جود لفقير مايبي غير توبه

قديمه في الثانويه

ياعذاب الشعر والمعنى البديع	أجذبيني جذبة الدلو الملي
سوقي خطاكي وانا بعدك تبيع	ومن مواطن هونة القول أرحلي
الفضا سياح للذوق الرفيع	عايذك بالله من الخرد البلي
والمسامع طرب وهجوسي تذيع	وامطرت سحب الصدوق الهملي
الفطين الحي تلمعله لميع	والدويش الرقل ميزانه خلي
ولا انا ياصاحبي سدي منيع	مزبن المعنى ومخبايه ملي
ماوردت الذود للفقر القطيع	وحالف ياغير أصفي منهلي
جمل الله كل من هرجه سنيع	ماله بدار العواجه منزلي
ينثر الحكمه وله شور نجيع	وقت صكات الزمان الزملي
والبلا من يعجل الامر وسريع	فاتت الحكمه على امر العجلي
والتجارب فالزمن شي وسيع	حظه الي من تجاربه يعلي
واهني من يعرف الفن الصنيع	سلمه خطم الأمور ولا تلي
ياغضيض الطرف يالترف الطويع	شوفتك جلو البصروتروق لي
تجذب الأنظار وخدودك ربيع	ما حلي المرباع فالروض الحلي

غزليه قديمه

كنا نحبك بس هالحين ماعاد	ذاك الوداد الي قتلته خيانه
روح وذكرانا من الود تنعاد	في طي نسيان الصداقه ضمانه
ياما فرحنا فيك فرحات الاعياد	وياما حملنا من ودادك أمانه
وياما شربنا لاجل خاطرك الانكاد	ونغيض حساد الهوى واللعانه
تغضي علينا بس نسمح ونرتاد	حوض العفو عن زلتك والليانه
إن صد قلنا كثر شغل وترداد	وإن زل قلنا زود ولف وميانه
مير الوداع أفلح ترا خاطري كاد	لاعاد تطري للصداقه مكانه
انا بنيت الحلم بحزام وشداد	وانته هدمته في فتوة زمانه

اللهم فرج هم اخواننا في سوريا ودمر الطاغيه بشار الفار

يابشار بن حافظ ماهو حل يابشار	تحط الجثث فوق الجثث في وسط درعا
حشدت الجيوش مسلحه واشتعلت النار	وحمير اليهود بفي جولانكم ترعا?
أسد فوق شعبك مير قدم اليهودي فار	تجوع قريبك والعدا امنه شبعا
حسيبك حسيب الظالم بيوم فيه العار	عليكم ويجني كل ساعي بما يسعى
يجيك الشهيد ملطخ بدم وين الثار	ولا ثار كود النار فارقابكم تشعى
عليك الله أكبر مانت ريس ولا مختار	مصيرك وجيشك في مهب الهوا قلعى
ياجاسم يادير الزور ياحمص بنت الدار	ياروعة حلب يامعرة أبو العلا درعا
لاترضين للبعثي أبو غدرة بالجار	تراكي أصل والأصل مايتبع الفرعا