ديوان الشاعر بادي عواد دخيل السحيمي {رحمه الله }
 

يامجالس حرب : يكفي حرب صوت اسم القبيله	عزوتي من دون بخص بمنزلة كل القبايل
حرب يوم ان الحياه بلا (مغازي) مستحيله	قبل حكم اللي لعله (حكمهم) ماهو بزايل
سطر التاريخ ما يفرق مثيلٍ عن مثيله	يوم كان الفخر زرق رماح وسيوف وفتايل
امش من ساموده اليا الليث لاتاخذ دليله	بالطريق اللي يجي بين القصيم وبين حايل
كل ما تنشد ولا حربي تراحيبه جزيله	حي والله هالقبيله والمزايا والخصايل
ويوم ابو تركي حكم صفوا معه من دون ميله	كان بيرقهم على يمناه بصفوف الاوايل
جعل مسكانه بعليين جناتٍ ظليله	يوم خلاها رخا لاشي (غزاه) ولاش (صايل)
وان نشدتوا يا مجالس حرب عن راع المثيله	شاعرٍ حربي وهذا اسمي وانا راع المثايل
(بادي) اسمي (والسحيمي) يعتزيلي واعتزيله	ووالدي (عواد) بايام الظفر راع الفعايل
(وطارق) ابني طال عمره يدَعيلي وادَعيله	كل حر ابوه حر . وكل اصيل من الاصايل
ومن يبي تعريفٍ اكثر ذاك عنواني (واميله)	ماعليه الا (رساله) ثم يبشر (بالرسايل) .

سقاك الحياء دار بقا من بناك رسوم	تعرفتها وابطيت اميز ملامحها
وقفت وحوالي ساعتين ادرج واحوم	حوالينها مير البطى تقل ماسحها
ثلاثين عام وزود علمي بها ياقوم	وغابت علي الشمس وانا مناطحها
تذكرت وقت مر هالحين تقل حلوم	ليالي صفت لي وانتهت ماقدر اشرحها
هناك ابتدا حب يجدد بدون رسوم	وهاذي مكان دلال ابوها وصايحها
وهاذي بقايا شجرة الورد واليشموم	سقتها وبيديها النواعم تصلحها
سرقنا الزمن ماكنها الا امس والا اليوم	هنوف تمازحني وانا كنت امازحها
يالين ابترم حبل الموده وجات اعلوم	وعقب انتحيت اقفت عسى الله يسامحها
تحسبني اللي باع وانصاع لاول سوم	وانا كنت احسب ان ابتعادي لصالحها
قريت بنظرها حرف يكثر علي اللوم	وطوح بنظراتي ولكني المحها
تباين بكل وضوح ياسري المكتوم	تصددك عنها لا نظرت فيك يفضحها
ياكم ليلة ماذاق جفني لذيذ النوم	ماغير انتظر نور الفجر لاجل اصابحها
ظروف ابعدتنا غصب لكنه المقسوم	وذالحين لا قابلتها غير اصافحها

[/poem][/poem]

لعل و الله ما يجي جسمك الباس	يزول ما تشكيه دقه و جلّه
إرهاق جسمك سبته خدمة الناس	و خدمة بلدك أعطيته العمر كلّه
تجحد و لا تثني عزايمك الأوناس	ما أنته رعاع أدنات شيءٍ يفلّه
أنته قوي العزم و الحزم و الباس	يوم الضعيف أزرت عظامه تقلّه
صحتك عندي ما لها مثل و أجناس	و اللي كذب لعل مالله يحلّه
يا النادر اللي رفقته ترفع الراس	و أنا الذي في رفقتي مخلص لّه
ليا حضر نفرح و لا غاب ننحاس	و المجلس اللي يجلسه ما نملّه
أنت الكريم و منقع الطيب من ساس	سيرتك يكسبها الفتى منهج ٍ لّه
متعب ممددت السفر عقب الادماس	ضيفٍ يروح و ضيفٍ آخر محلّه
قصايدي يمك تعابير و إحساس	الحس مرهف و المشاعر تدلّه
قصايدي يمك تبختر تنوماس	سلك الحرير يتلها ما تتلّه
قالوا تعزه ؟ قلت من غير مقياس	اي و الله : إن الشيخ أعزه و أجلّه
أي و الله : إنه مثل تاجٍ من الماس	لعل صدقان الرخا فدوةٍ له

البارحه كني( بغمران) محبوس	اللي بنوه الترك بنيٍ فضيعي
لادق بي هاجس تقفاه هاجوس	قامت هواجيسي تتابع تبيعي
لا مشتكي عله ولا ناقص فلوس	لكن أبي نومي وعيا يطيعي
من ضيق صدري ماأحتمل رأس دبوس	وإن شفت صبري قلت صدري وسيعي
طارق .. خذ المفتاح نبغى دوا الروس	هات الشبح واخذ الطريق السريعي
بأول محطه عب . وإليا امتلى دوس	تلَه . حفظك المستجيب السميعي
أبوك يبغاله بحر حوله طعوس	ضو القمر فوق البحر له لميعي
وإلا يبي _ كان الحيا جاله عسوس	من جا يقول ايبله إلا ربيعي
_ محتاج له روضٍ ولا هوب مديوس	يم الحفر وإلا بوادي النقيعي
وده يسافر لو على دار قابوس	شد الحزام ولا ورانا رضيعي
وش فيه ؟ لو وجهتها يم طرطوس	الشام له جوٍ عذي وبديعي
نلقى نهر نجلس على جاله جلوس	أسبوع وإلا قد مانستطيعي
لا مهتوي( مسرح ) ولا شاربٍ (كوس)	حرصٍ على ونسه تعم الجميعي
أكيد لو مايونس القلب حاسوس	مافضفض اللي به . وعدَه يذيعي
الحظ من مبطي وهو حظ منحوس	شغله ردي مايشتري . مايبيعي
ياطارق .. الكرعان لو عودت روس	في العصر هذا . عده أمرٍ طبيعي
والتمر من عاده مايخلى من السوس	لكنَه أزين من طعام الضريعي
ماكل علة جسم بأسباب فيروس	ولا كل من سمي شجاعٍ شجيعي
الخط به قادي وبه خط منكوس	ولاني مقطعك بك ذناب التليعي
لا جيت لك ديره وفيها الهوى (كوس)	تذرَ . لو تجلس بجحر الضبيعي
دنيا ياطارق كلها دروس بدروس	بس (الدليله) لو سرى مايضيعي

البارحه مع سوقة الفجر فزيت	فزت حصان مجهز(ن)للسباقي
و شبيت ناري عقب قمت و توضيت	وصليت فرض اللي على الكون باقي
و رصيت سمرٍن يشعله عود كبريت	يازين ريحه لا غداله احراقي
برق و رعد ومهيله ويش خليت	شوف المطر هو منوتي واشتياقي
صوت المطر مع شبت النار با البيت	تخفيق مرواس(ن) باصابع عراقي
و ممشى مع الروض الخضر لا تمشيت	يسوى هروج الوجهنه والنفاقي
ماني من اللي لا تقاعد تقل ميت	معود(ن)نفسي على الانطلاقي
لي عزوتٍ جولي على ما تمنيت	لاني بمهموم(ن)ولاني بشاقي
وأسجد لربي كل ما أصبحت و أمسيت	ولا ابكي على الكرسي علي الطلاقي
و قولوا لناسٍ توقد النار بالزيت	اللي مقيم اليوم باكر طراقي

ما للحلول المستحيلات غير أنت	عين العزوم تذوب معها العظايم
أنته عديم أوصاف و وصوف .. ويش أنت ؟	ما درجن حلياك سود اللثايم
عز الله أنك يوم بانت تبينت	يا بعد فرق منسفين العمايم
ما كنت مثل مقدم العذر ما كنت	هبدت صدرك ثم فزيت قايم
أنا أشهد انك بالوفاء ما تلونت	يا كثر من ينصاك مفطر و صايم
لولا المدبر ثم لولاك جننت	مستوه لاصاحي و لاني بنايم
يا بو سليمان أقبل المدح لاهنت	تستاهله يفداك رخو العزايم
أجزيك! بيش أجزيك لا قمت هونت	خابرك تعطي ما تدور غنايم
عمرك يطول و كم للأفكار من بنت	ما همني مبغض و لا لوم لايم

متى شهر خمسه يخلص على خير	حتى نشوفه طيب ن ومتعافي
شيخٍ ليا شرف تهل التباشير	هو منوتي والا البقيه عوافي
هيبه وطيبه ماروتها الاساطير	يشر عليه ان قيل وين السنافي
شفت الحفر في غيبته شكلها غير	والجو فيها تقل ماهو بصافي
لا من تعلاله ولا من مسايير	كلن ببيته منزوي مايشافي
قمت اتذ كر وابعدتنا التفاكير	سنين مرتنا عليها الحسافي
ليا ذكر سيل الوسوم المباكير	نسرح وفي ظهرالونيت الهرافي
وليا لقينا روض عشب ونواوير	قال انزلوا0 وين العيال الخفافي؟
الزل يفرش والمراكي مساطير	والنار شعلتها تجيب المطافي
وسوالف ماهي سوالف دناقير	لو رددت من طيبها ماتعافي
ياشيخ مانكتب مجرد تعابير	(وليا تفضلت وتمعنت كافي )
والله مادور من وراها مداوير	جودك كساني في السنين العجافي
تراي مثل اللي يسدد فواتير	فضلك كبير وحيلتي ماتكافي
انته غني عني وعن باقي الغير	والناس تشهد ماعلى الله خافي
فعلك وصيتك ذاع مع حرب ومطير	وبمدحك حتى تشيب القوافي
والله مااسمع فيك هرج الخنازير	اللي مقاصدهم هوى والتفافي
والضلع ماتثر عليه المعاصير	يبقى جبل والريح ماغير سافي

*من روائع بادي عواد 0بالفصحى

قالوا مضت عشر .. هل لا زلت تذكرها	فقلت لو مر ّ غير العشر عشرينا
قالوا : لقد شبت : قلت الشيب مفخرة	قلبي إلى الآن في سن الثلاثينا
قالوا : نأت دارها و الدهر غيرها	قلت الهوى العذب يدنيها و يدنينا
و الدهر ما زادها إلا وزينها	لا تحسبوا الزور و البهتان يثنينا
ياليتها حينما ودعتها نظرت	واسمعتني الذي لو قيل ينسينا
لعلني استميح العذر أهجرها	و كيف و الطيف لو أغمضت ياتينا
يا ليت شعري إذا ما قمت أقصدها	أهدي إليها فأسقيها و تسقينا
لو ليلة إن ملأت العين كافية	مما بقلبي و الا كيف تكفينا
يا ربة الحسن ايام الصبا مرقت	كمرقة السهم ما عادت بأيدينا
ياليتها علمتنا و هي ماثلة	حتى إذا ما نطوت لا شيء يبكينا
لك الهوى كله و الحب أصدقه	ما فات من ذكريات الحب يغنينا

و الله أحبك حب ما جاء و لا راح	مع قيس والا مع جميل وبثينه
يا ليت قلبي فيه قفلٍ و مفتاح	ويقي وما تلقين تستاهلينه
لا شفتي رموز الغلا فيه و ضاح	تطمنين شوي وتطمنينه
قالت تريّح قلت أنا كيف ابرتاح	وانتي فوأدي بالهوى تشلعينه
شلع إف (16) بكابتن و ملاح	يوم اشلعوها من علو السفينه
خليتني عقب الونس تقل سواح	ما قعد ثلاث اشهر سوى بالمدينه
يا بو عيونٍ كلها سيوف و رماح	لاشك من قابلك با تهزمينه
إن كان عندك للغلا سر ينباح	ما هو بنا الي تمتنين وتبينه
روحي وعدي ما مضى برق مالاح	عديه حلم بليل ومعبرينه
أما يروح الحب من عرض ما راح	والا يقوم الحظ وتصدقينه
لو مانت قد المدح ما جيت مداح	ولا قمت انقي لك جزال سمينه
خذ فرصةٍ ما نالها الطير سداح	ان صاد والا للهوى مطلقينه
إن كان عقب اللي سمعتي تصحصاح	بالعقل والمنطق تبي تفهمينه
الله عطاني حس مجموعة أرواح	ماعيبه الا الذكريات وحنينه
صقار بالطلعة و بالصبر فلاح	يدلج ولكن ملك قلبه وعينه
يا كم وكم حطو له الفخ ما طاح	بأمر الله ويمكن دعاء والدينه
أنصحك كان أنك تحبين الانصاح	لاتمسحين اسمه والا تكتبينه
لا تصير مستعمر بقوتك تجتاح	ضعف الهوى عندي واصير الرهينه
و إن ما فهمتي من بعد هذا الإفصاح	منه العوض ياوي والله غبينه

نويت اسوي لي قصيده على أق	والشطر الاخر زان بنيه على أقي
لاخيفة اسرافٍ والاخشية املاق	لاراقت الآفكار والجو راقي
اختارهن تقل اتنقى بالاسواق	واصفهن صفة خيول السباقي
لو اٍ ن لي صوتٍ مثل صوت بو شناق	جريتهن جرت حبال السواقي
قالو نشوفك عقب ماشبت تواق	خمسين راحن كلهن ويش باقي
قلت بدوي لاشفتلي نوض براق	امسي معه واصبح على عظم ساقي
خلوني اشبع رغبتي واشرب اشواق	مالي عذر عن رغبتي واشتياقي
مادام قلبي بين الاضلاع خفاق	بكره يعرف ان البلا الانغلاقي
يلومني خبلٍ من الناس ماذاق	معهن ملذات الوعد والتلاقي
من طلعة السبع الى وقت الإشراق	سوالفه بين النحر والعناقي
من ذاق خمره يصبح الصبح مافاق	يسكر ولو ماذاقه الاذواقي
خجول مغضي والنظر تقل سراق	تسرح مابين رموشها والحداقي
الخد وردٍ بالسقى مغرق اغراق	خطرٍ من المنديل دمه يراقي
مصري نحر هندي شعر نجدي عناق	الدم سوري والتبختر عراقي
اقفيت من عنده وانا حيل مشتاق	ياليت ماعقب التجمع فراقي
ماشفت مثله يحرق العاشق احراق	يستر على هاك الطويل الدقاقي
لامشركٍ بالله والاقاطع اعناق	نفسي ولا اضيق عليها الخناقي
وعفو الولي لا التفت الساق بالساق	اقرب من أوذام الدلي للعراقي
واستغفره ربي من اعماق الاعماق	اللي خلق سبعٍ وسبعٍ طباقي
مما بقلبي قمت أسطر بالأوراق	ماسطرت ريشة كريم العراقي

قالو جديدك : قلت هم وغرابيل	عايش على الذكرى قديمي جديدي
قالو علامك : قلت ولهان بالحيل	مافي مكفي ماعليه مزيدي
قالو مزاجك : قلت شوف المعاميل	مهيلات وفي بعضهن عويدي
والله يالولا خنت البن والهيل	وتحومي بين امهات الجريدي
ومسامري بين الرجال المشاكيل	ومن السوالف والقصص نستفيدي
ياظنتي لاصير مثل المهابيل	ماغير اسودس من نشيد بنشيدي
والا لاروح امع الخلا مثل ماقيل	هايم تقال اني بعير(ن)فريدي
لكني اقرا سورة النمل والفيل	والحشر بعد الغاشيه والحديدي
ترى كلام الله شفا للمعاليل	رب العباد ادرى بأمور العبيدي
قلبي خضر ويهزه الشوق ويميل	والله ياخالد شي ماهوب بيدي
لامن ابونوره طلع بالمواويل	سرحت معه وقلت ليته يزيدي
ولاجر صوت وقال ياعين ياليل	لا يابعد عبدالحليم وفريدي
كنه قرا اللي داخلي بالتفاصيل	كنه على قول (القحاطين ميدي)
يازين ياراع الرموش المظاليل	عامين هاجرني ولازلت سيدي
ماكفاك ماسويت بي من بهاذيل	ماشفت مثلك بالأوادم عنيدي
قفلت بيبان المواصيل تقفيل	وان قلت يكفي قلت هل من مزيدي
ياشين طبعك والله انك تهاويل	لو ماعرفك اقول (مصري صعيدي)
ياعشقتي من لابسات الخلاخيل	لا يرتحلك ابليس تبقى وحيدي

جتني وانا ارض ن تنتظر ماطر الصيف	لها ثلاث سنين مصحي سماها
الانتظار اشد من ضربة السيف	ولا كل من دور عليها لقاها
حبيبتي كان الهوى له عواصيف	لي قلب لا شاف العواصف نصاها
ربي خلقني مالتفت للتناتيف	نفسي ما كل مياه تقطع ضماها
حبيبتي كان البشر به مواليف	مشاعري ماينوصف لك مداها
حبيبتي ما كل قصه سواليف	ورى الضلوع الحانيه ما وراها
صحيح ما جات التماني على الكيف	والله يعوض كل ميزه خذاها
يابنت كان ان الوفا فيه تزييف	غريزتي ما زيفت في وفاها
يابنت كان الحب خدعه وتغليف	والله لهدم البير وادفن غطاها
الحب نعمه كان للحب تعريف	الحب هو سم القلوب ودواها

قد كنت اهوى الورد ايام الصبا	لكن سلوت الورد من عشق الندى
محبوبتي رفقا بقلب شفه	وجد وخوف منك لا خوف العدى
محبوبتي ان غبت عني ساعة	ابكي فاين الصبر مع طول المدى
لو تعلمي بالامس ما قاسيته	لعرفتي ان الحب من صنف الردى
انتابني هم وحتى مضجعي	حارقه والليل ليل سرمدى
اصغي الى سماعة الخط الذي	مفتاحه ملك لشخص اوحدى
واذوب وجدا لكلما قلبته	وسط السكون جماد ليس له صدى
ياربةالصوت الحنون ترفقي	بأسير حبك لا يموت مقيدى
لان كنت تعتزمي الفراق فانني	ساموت عطشانا وسقياي الندى

قصيدة بادي عواد بالاستاذ/ عبدالله الفايز وكيل امارة المدينه السابق
.................................................. ........................

اهدي اليك تحيتي وقصيدتي	واليك يهدى الشعر يا ابا باسم’
اهديه مقرونا بفيض مشاعر	تنأ عن الكذب الرخيص تحاجم’
اسديت جودا فا أستحقيت الثنا	والجود للحر الكريم ملازم’
لا ترتجي فيما بذلت صنيعة	احساس ظني فيك بل انا جازم’
لا غروا انت سليل قوم في التقى	كانوا على مر العصور علائم’
ان كنت لا تبغي المديح تواضعا	فلا انت مظلوما ولا انا ظالم’
فأقبل جزيت الخير اني شاعر	عن مدح من لا خير فيهم صايم’
واني مقل الشعر رغم اجادتي	للشعر لكني ..ومثلك فاهم’
اهدي بنات الفكر دون عطية	ان كان غيري في القريض يساوم’

هذه القصيدة رد من بادي على قصيدة الاخ معزي بن فلاح السحيمي

ياحاتم اكتب وقول لراع الانشادي	وصلت مشاعرك وادركنا عناصرها
ياشاعر صاغ قيفانه على آدي	مثل الدرر ينتقيها ويتخيرها
ذكر عليه بطقه طق بن هادي	حيه وحي البيوت اللي مسطرها
يازين وقع المطر لأجاء بالأعيادي	من كل ديره تبشرنا بشايرها
من غير الأحوال جت باذاعة الرادي	المملكه كلها سالت من اخرها
لي ديرة زرتها سرداد مردادي	والعين لا جيتها جابت عبايرها
ليا تذكرت أهلها وين الاجدادي	تضيق نفسي ولا تخفي مشاعرها
يابن فلاح الحياة دروس واجهادي	تكابد النفس ماضيها وحاضرها
والمسعد اللي عن الزلات متحادي	لا يختلط بالعفون ولا يخاشرها
سكن الخلا نوب يسوى جمع وافرادي	والله يابعض المجالس ما تصورها
العيش في ديرة نزال شدادي	احيان تسوى القصور اللي نعمرها
ان كان ربي بلاك بجار صرمادي	شديت ماهو لزوم انك تجاورها
واليا تجنبت خلق الله معك قادي	او ضاقت فجاجها ربك ييسرها
مادام مرتاح بال وجوكم هادي	خلك على هالطريقه لا تغيرها
الناس فيهم صدوق وفيهم اربادي	لوقلت كم عقب حواء ؟ما تذكرها
ماكنه الا غزى قوم ابن شدادي	ما تبتدي هرجه الا قال خابرها
واليا انتفخ بالمجالس صار نقادي	يزمر على ماش والطولات هاجرها
خلى المراجل يسار وحدر الوادي	طافت عليه السوالف ما يذمرها
رجال يتعب بجمع المال عدادي	ماهمه الا قريشاته يصرصرها
ورجال تلقاه مثل طويق منقادي	ذراه يذري لو احواله مسترها
خواطر جبتها من غير نشادي	وان جات في وقتها ماني موخرها
والحر مثلك يعرف ابعاد الابعادي	ومن ساوره شك ينشدني وافسرها
واسلم وسلم وخص قروم الاولادي	اربوعي اللي تقدرني واقدرها
من صبحا الى اقصى الضلع من غادي	واللي بطيبه وساكن في حوايرها

قوم النقيلي حين شافوني أقفيت	كلن تعوصم بندق الكذب يمي
قالوا فعل .سوى وانا ويش سويت	حسبي على من دس بالسمن سمي
ياشيخ نشدني متى ماتوريت	لو مانت غالي ما تكابرت همي
ان كنت مخطي قول في هذي اخطيت	والا الله الله بالكذوب المرمي
ماهمني غير انت .منك استهميت	عندي مقامك مثل ابويه وعمي
في ذمتي لك دين واقسمت وآليت	لالوي على ذيك الصداقه معمي
عيب علي ليا جحدت وتخليت	الجم يبقى له ثرى لو يدمي
ياشيخ لا تسمع هروج الهتاهيت	ان مالقى لقمه يسب ويذمي
ناس خلقها الله بصورة عفاريت	تضحك وداخلها صديد مدمي
انا اعرف اسماهم واعلمك لا جيت	الا انك انته قلت لي لا تسمي
اعداي واجد واسلحتهم خثاريت	واذني لوتسمع خثاريت صمي
سنين معك اعمل بما اظهرت واخفيت	يمديك عارفني بليا مسمي
وانا ادري انك لو نصت وتوحيت	لو غلفت فأنت البخيص الملمي
لا زايدك مدحي ولا ناقصك صيت	جودك ملى بطني وصدري وفمي
لو ماذكر الا يوم اوادعك بالبيت	اقوم واقعد واذكر الله واسمي
وانا اعترف لو قلت ماقلت .ماأوفيت	رد الجمايل لو نويت إمتحمي
لكن .لك المعذار.عذرا بتثبيت	ما قلت شي يحط راسي بكمي

تاريخ القصيده يوم الاربعاء15/2/1422