ديوان الشاعر حسين مرزوق السحيمي
 

عابر سبيل
 

عابر سبيل

مايضيق البال باالجو المخيل
	ولايضيع الصوت دام ان له صدى
ياقصيدي سوقها لأرض النخيل
	دام معناها قبل تبدي بدى
للرفيق اللي على نفسه بخيل
	كيف يزعلها وهي دايم قدى
ترتوي من روض رب(ن) له وكيل
	ولاحداها ابليس يوم أنه حدى
دايم الدنيا قليله باالحصيل
	واسمها دنيا ولافيها جدى
الله الرحمن خالقها تميل
	والمدى فيها تلاقي له مدى
للتناقض باالبشر تلقى دليل
	بين طيب وبين من طيبه ردى
تلتقي فيها بمجنون وهبيل
	وتلتقي فيها بمن شوفه ندى
مع سموم الصيف به برد(ن)صقيل
	والقمر مع شمسها ضاع وغدى
تقبل الثنتين في كل المسيل
	والحظيظ اللي على دينه شدى
ريح اللي داخل الخاطر ثقيل
	الله اللي للبشر دل وهدى
لايضيق البال ياعابر سبيل
	لاقضبت الدين فاالباقي فدى

الصمت حكمه
 

هذه القصيده رد على تصريح الرئيس الايراني عن سبب صمت خادم الحرمين الشريفين تجاه مايجري في غزه أبان الغزو الأسرائيلي عليها وقت نشرت بفضل الله بجريده الرياض بصفحه كامله يوم الجمعه 26 محرم 1430 ...حفظ الله قادتنا وأمتنا من كل شر ومكروه...

الصمت حكمه

الصمت حكمه... خلها للحكيمين
	يااللي فشل في غايته وبنجاده
والصمت حكمه ياحشود العناوين
	يااهل الفضاء والبلبله والقراده
حكامنا حكام دين وسلاطين
	ورجال حلم وعلم معهن جلاده
ورجال تحمي دون الأضداد حصنين
	ورجال عوجى في عوجها شهاده
تشهد لهم غزه وتشهد فلسطين
	وميقافهم وقت المواجيب عاده
تاريخ نعلم به ونقراه للحين
	قاده ليا ضاعت عن الحق قاده
وغزه ولوسالت وضاعت قوانين
	في يدين صقر(ن) مانساها فؤاده
شامخ ولو جاله مع الشر شرين
	ثابت خطى في مبتغاه ومراده
بأرض الكويت أعلن وثايق وتطمين
	ولم العرب بخطاب راسي وتاده
وبجود يمنى من طبايع كريمين
	مليار تاج وصامل الراي زاده
تريحم يااللي عن الدرب غادين
	ميقافهم تلقى القرايب حصاده
ودونك ترانا يااحمد نجاد ساطين
	وحكامنا في نصرة الدين ساده
ياالله يامنزل تبارك وياسين
	تحمي بلدنا من تزايد سواده
وتحفظ لنا سلطان وتشوفه العين
	ويعود سالم يلتقي به عتاده
وافين له باالسلم والحرب وافين
	ونفداه في حر الزمان وبراده
وصلوا على الهادي شفيع المصلين
	ختام ماقلته ايضاح وشهاده

تحيه وتقدير
 

قصيده بعد تطاول معمر القذافي على خادم الحرمين الشريفين في قمة الدوحه وقد نشرت بصفحه كامله ولله الحمد بجريده الرياض الجمعه 14 ربيع الاخر 1430
تحيه وتقدير

باسم العرب أرفع تحيه وتقدير
	للقايد اللي طيب الله فاله
أرفع تحيه واثني القاف تكرير
	وابقيه دايم في فضاه ومجاله
القايد اللي يجزل الراي ويشير
	ويتم قوله لاتزهل وقاله
ثابت عقيده مانبي فيه تذكير
	وثابت بعد باالباقيه من خصاله
مثل لنا الأمه ولافيه تخيير
	وبقمة العشرين كلن شكاله
عنده صلاحيه وسبق(ن)عن الغير
	والتاليه للي رثى الناس حاله
حيوا معي صقر العرب والنواعير
	ابن الامام ويقتدي به وجاله
الدار يفخربه ويزهاه ويسير
	برجاله اللي لاعتزوا راس ماله
أخوان نوره تمطر العلم تمطير
	والراي كلن يستوي له وطاله
الدين عمر دار ال سعود تعمير
	والبعض عمر في رداه وخماله
والعالم اللي حاصل(ن) فيه تغيير
	في نجد يلقى مانساه وغداله
ياالله ياللي كور الشمس تكوير
	ياالمستجيب لعبده اللي لجاله
تحفظ ولي العهد ويعود باالخير
	وتقبل دعى من يرتجيك ودعاله
سلطان حبه ماحصل فيه تزوير
	تفداه روحي والجسد ينفداله
وللنائب الثاني سلام(ن) وتعبير
	باالنادر اللي عالي الصيت ناله
واصدر تهاني صادق الجوف تصدير
	للنايف اللي سم الارهاب زاله
أمن(ن) من الله والله بزين تدبير
	سخر لنا من يرتكي له وشاله
والخاتمه دم ياوطن خير تكبير
	باسم العرب لو ماحصل لي وكاله
قلته ولابالقول خافي وتحوير
	ألا سحيمي باح بااللي طراله
وصلوا على محمد نبي(ن) وتنوير
	للناس عقب اللي مضى من ضلاله

نشيد المجد
 

قصيده نشرت نصف صفحه بجريده الرياض السبت 25ذوالحجه1430

نشيد المجد

سارعي للمجد والعليا واستمري بازدياد
	ومجدي للي حفظكي ساس للدين العظيم
وارفعي الخفاق أخضر للبرايا والعباد
	يحمل النور المسطر والصراط المستقيم
رددي الله أكبر صادق القول الوكاد
	وعيشي فخر لأمة الأسلام والفكر السليم
يابلادي دام عزك وللعز امتداد
	باالمليك اللي حباه الله حب(ن) باالصميم
ماتهاون يوم الأحداث والدنيا هجاد
	ولاتراخى وقت الأفكار والغزو اللئيم
أعلن بمكه مبادي ولافيها اجتهاد
	حجة الأسلام أطهر من الفكرالسقيم
لاولي(ن) يبتدع فيها الى يوم المعاد
	ولاجديد أفكار فيها ولامبدى عقيم
وباالجنوب الحد طاهر ولصقوره عتاد
	مع أسوده لاحتمى الميدان واحتال الخصيم
مانسى منهم شهيد(ن)عن عظيم الدار ذاد
	ولانسى جيزان بأكملها من المد الكريم
ولاتوانى بنصرة المظلوم وبحرب الفساد
	يوم جده خصها الرحمن باالخير العميم
شكل اللجنه لها فورا وعمدها اعتماد
	ولملم أحزان الأهالي من الخطب الأليم
يامليك(ن)حازم(ن) عادل وفي عدله أشاد
	شعبه الوافي من الأجداد والعهد القديم
تفتديك أرواحنا والوطن بأسمك وتاد
	ياأصيل(ن) جامع الهيبه مع القلب الرحيم
وعيش دايم ياملكنا للعلم ثم البلاد
	هو نشيد المجد والعزه وهو المستديم

حكمه الاهيه
 

قصيده بعد محاوله الأغتيال الفاشله للأمير محمد بن نايف وقد نشرت ولله الحمد بصفحه كامله بجريده الرياض الخميس 20 رمضان1430

حكمه الاهيه

أرض المدينه هزه وفوق رعاد
	والبرق يبرق والشهر فيه طاعه
والملك لله صادق القاف ينقاد
	للي سمع واللي جديد استماعه
قاف (ن) من الأعماق يرد ويعاد
	لاجاهل (ن) وقته ولابه مجاعه
لاباس يامحمد لنا نور وأعياد
	ولاباس يانسل الفخر والشجاعه
يفداك ياامير الأمن بوق ميعاد
	ويفداك منهو مقتنع بااقتناعه
ياعالم (ن) كثرت لنا فيه الأضداد
	مابين فكر وبين حلف وطماعه
حنا سعوديين من جد وأجداد
	وحنا الكرم والمرجله والمناعه
شعب (ن) موحد لاتحرون تعداد
	بأسمى صفاته (مذهبه واجتماعه)
حكمه الاهيه على روس الأشهاد
	( الدار آمن من حفيظ الوداعه )
ياواحد (ن) فيه الأمل دوم يزداد
	تهدي ويرجع ماابتعد من سباعه
بقيادة اللي داخل القلب له ماد
	حبه أصيل وطيب القاع قاعه
تبقى يابومتعب لنا عد وعتاد
	ونفداك ينطقها الوطن بااتساعه
يادارنا دمتي وطن دين وأمجاد
	ودمتي لنا يادار مصدر شعاعه
ودام الأمن ثابت ودمتي له أوتاد
	والشر يقصر في ذراعه وباعه
العدل خلى مدفع الغدر ينعاد
	بنحور وجذور الفساد ومتاعه
صوب الهدف نسمى على وقع وأرصاد
	حتى المعادي نسحبه من كراعه
وصلاة ربي عد ماهل رعاد
	على النبي اللي وعد باالشفاعه

عنيزه
 

أبيات مهداه للأخ العزيز العقيد الطيار / نواف محمد بن صخيبر الغرابي الحربي

عنيزه

فلي وروقي واضحكي ياعنيزه
	استبشري خير(ن) وحطي عمه
قولي لجيرانك وش اللي صابك
	وشلون جالك باالمداين همه
قولي أنا ليلي فريد(ن) عشقه
	الزود عندي والخوافي طمه
وقولي أنا فيني رجال(ن)تسكن
	برج (ن) تعلى والقصايد ذمه
وقولي ترى فيهم خصال(ن)عليا
	توحيد خالص والمراجل تمه
عرق(ن)من الأجداد باقي ثابت
	ماانغش باالواقع وخالط سمه
زود جمالك مع جمال(ن)شالك
	فااستبشري خيرا(ن)وزودي قمه

أبيات أهديتها للكاتب محمد رويشد السحيمي( أبوآسر) بعد ابتعاده عن جريده الوطن والعوده للكتابه بجريده المدينه وعنوان زاويته (هجره ) ولما للأستاذ محمد من معارضين ومؤيدين أيضا استقبلناه بهذه الأبيات رغبه في بث روح التسامح بين الجميع...

أسعدتني ياآسري أنت الوطن
	والعود أحمد سره طرياكا
نهدي لك الأشواق تحمل ودنا
	بفصاحه(ن)قد لاتحوز رضاكا
فأهلا(ن) وسهلا(ن)باالزوايا كلها
	بجنوبها أو حيث كان لقاكا
أحييت قول (ن) واقتطفت ثماره
	واليوم عدت لموطن (ن) رباكا
ياهجرة(ن)عودي برأس مقالة(ن)
	لأديب قوم(ن) يحفظون حماكا
العلم جهل (ن) ناله بمرارة(ن)
	أسقاه قلب(ن) لايمل حراكا
ندعو له دوما(ن) بأوسط آية(ن)
	فاالناس شتى..والطريق شراكا

درة الأوطان
 

قصيده بعد انتهاء أزمة الحوثيين نشرت ولله الحمد نصف صفحه بجريده الرياض الجمعه 21صفر1431

درة الأوطان

احترق كل الورق مابقى للضد حيل
	بانت القوه على الواقع وحنا قدها
وافلس الطايش من الثنتين واشتال الفتيل
	داخل أسواره ومن حوله وضيع كدها
اندفن داخل جبل دخان وانصاد الوكيل
	والولايه من جبال الدود بين هدها
أمة الأسلام محفوظه من الفرد الجليل
	ياسليل الحقد بأفكار(ن) لعن من ردها
بارك الله دولة التوحيد وشيوخ(ن) تكيل
	الحمول اللي شبه حلياك ضيع سدها
دولة(ن)يسمى بها الحكام بالساس الثقيل
	ماتعثر في ربى الأنساب بأول جدها
ودولة(ن)وقف لها التاريخ بالوقت الكليل
	في زمان(ن)ثبت الصنديد كامل حدها
ودولة(ن)وسط العرب كنها الروض الجميل
	وتشبه لقمة مهابه على من ضدها
اسفهلي ياديار الخير فاالعال الطويل
	وافخري برجال من دونك قليل(ن)ندها
نصرهم بارض الحدث واقع(ن)ماله بديل
	كود نصر(ن)باالشهاده على ابيض خدها
يابومتعب ياسمي المجد معدوم المثيل
	أمة الأسلام للعليا ثبت لك مدها
تفتخربك في بقاع الأرض وتسوق الدليل
	باالفعول اللي سخى يمناك زود عدها
والعرب من جور الأيام والواقع تخيل
	بارق(ن) باذن الله الرحمن يجمع يدها
في يمينك كلها الأمجاد ياالعدل الأصيل
	والكرم مع طيب السيره وشعب(ن)ودها
بلسمك طب للعله ومن يشفي العليل
	واحد(ن) ظلل على عباده بسبع(ن)شدها
والبقى يادرة الأوطان في رمز النخيل
	وباالسيوف اللي مع التوحيد بين صدها
والصلاه وجل تسليمي على الهادي الخليل
	الرسول اللي بنى الأمه وشيد غدها

عدت سالم
 

قصيده بعد عودة خادم الحرمين من رحلته العلاجيه نشرت صفحه كامله ولله الحمد بجريده الرياض الجمعه 22ربيع الأول1432

عدت سالم

عدت سالم جيت غانم ووثقت الوصال
	يابومتعب ياحبيب الشعب نور المملكه
السقم زايل وجعله خير ياقرم الرجال
	ينكتب لك ياسمي المجد خير(ن)وبركه
حب شعبك في مقامك ثابت كاالجبال
	انكتب داخل صميم القلب والعرق امسكه
الله يحييك وقتن جيت ياوافي الخصال
	سالمن ياالحاكم المحبوب من كل اشركه
شعبك الصادق شديدالباس يفخر باالعقال
	فوق راسه دام راسك ملكهم واملكه
مؤمن بربك ونسل صقورعسرين المنال
	تعتلي في قمة المجد وتزيد احركه
بحكمتن تازن جبال طويق وتضد المحال
	لاتحدر عالمن مجنون في كثر ادبكه
وميزتن في حسن الأخلاق أقرب للكمال
	باالتواضع وهو قمه اذا العبد ادركه
الوطن باسمك تسامى فوق وبعرض الخيال
	من تطور في تطور ولابيوم اتركه
وعهدك التاريخ ماينساه لوطول وطال
	يكتفي باالقول(عبدالله)وكل درب اسلكه
ياالزعيم القايد الأنسان ياالعذب الزلال
	صادق المعنى تعلى فيك وبشعر احبكه
ياهلابك وين ماحليت واشتلت الثقال
	يازعيم العرب راع الجود نور المملكه

قصيده مرسله للأخ العزيز عبدالكريم عطاالله بن سبيله العنزي

بعد الفجر يابن عطاالله وكني
	شفتك تغني والصعيبات زايله
ماني منجم لكن بقول جني
	والعلم للي...ماتعدد فضايله
شاهدت ثنتين(ن)وتغنيك عني
	وانا وجودي ماندور بدايله
الأوله ربع(ن)على دين سني
	رجال يكفيهم مسمى سبايله
عز الرفيق ودربهم دوم فني
	يصعب ونبطي مالقينا مثايله
أهل الكرم وتدن للكيف دني
	والزود فيهم واضحات(ن)همايله
والثانيه شيخ(ن)لياشن شني
	شنت عرب ماخالطتها خمايله
ماهي غريبه ياالجماهير غني
	لاولاد وايل واخبريهم فعايله
وانا بشمر ساعدي حيل لاني
	أوعدت ربعي بالقصيد ودلايله
هي قدرة الله ماللانسان مني
	نرجيه دايم ونتحرى جمايله
الله يحقق ياابن الاجواد ظني
	والقول باالمرمى يصلكم حلايله
وصلاة ربي عد ماالوقت رني
	على رسوله والمتم لرسايله

اليوم الوطني
 

قصيده بمناسبة اليوم الوطني للمملكه العربيه السعوديه وقدنشرت ولله الحمد بجريدة الرياض الأحد27شوال1432

احتفل ياموطن التوحيد واعلن للشعوب
	شرقنا وألا البعيد هناك يم الأطلسي
السعوديه سنام الدين والدار الرحوب
	أجمل الأوطان واغلاها بطهر الملمسي
اتباهى لانكتب تاريخ باالشعب الشبوب
	واتمركز دوم بالقمه وفوق الأنجسي
رمزها حكامها ال سعود لاهب الهبوب
	محتمين القول بالعوجا وقو الأخمسي
نفتديهم من كبير السن للطفل اللعوب
	(نفس..نفس..ودار..دار) عز الأنفسي
ارتبطنا بالفخر والعز باالدين الشروب
	وانربط ياالمرتبط باالشر ربط الأخنسي
ياوطنا دوم شامخ على الوقت اللهوب
	ماتهزك خطة الشيطان وامر الأبلسي
أنت فينا وحنا فيك ياالعشق العذوب
	مجلس الأمه و(عبدالله) بصدر المجلسي
البقى ياخادم البيتين والراس الطروب
	الله يجازيك باالجنه وطيب الملمسي
ياحبيب الشعب والدنا فديناك القلوب
	وافتدينا روسنا(ال سعود ريح النرجسي)
القصيد الحر نفخر فيه باالوقت الصعوب
	نرتقي به ونكسر فيه عند الأروسي
ياالشعوب اليا جهلتي وضعتي ياالشعوب
	مملكتنا (جنة الدنيا..ونار المفلسي)

ياهاجسي وش فيك عني تخليت
	عقب الغرام وقصة الحب تلكا
سجيت عني تالي الوقت واقفيت
	وأهملت ماقدر لك الله ملكا
أرخصت لك روحي وفرحت وأبكيت
	واهديت لك عمري وانا منك والكا
عانقت بك شوق المحبين واوفيت
	وليا نشدني عاذلي قلت شلكا
ابني معك امال ليمن تمنيت
	وادعي الهي من فؤادي تصلكا
لوهو غدر فينا الزمن واستقليت
	تبقى الحبيب ودنيتي في مثلكا
طبعي أنا الوافي ولوفيك سجيت
	والله يجدد قصة الحب تلكا

وكانت هذه الأبيات كمجاراه لها...

الليل قال أسرار لليل وأوحيت
	بعض الغرام وقصة الحب تلكا
فزيت من ليلي وقربت واصغيت
	ثم اعتصمت بمالك الملك ملكا
ربطت ليلي بأول الليل واعطيت
	الليل للي شربك الليل ذلكا
عودت به وسط المفاريد واقديت
	نظمت بالأبره على الضيق سلكا
مجاهرن بالشوق والحب واضحيت
	محقق المعنى..(انا منك والكا)
هذي سوالف ليل لليل وامسيت
	بعيونها وقتن غدى الليل حلكا

لم ينجح أحد
 

قصيده كتبتها وقت أزمة الفتاوي وكثرة الحديث عن البطاله بين العامه ونحمد الله اللذي من علينا بوطننا وولاه أمرنا اللذين لايألون جهدا في الأصلاح والتغيير المستمر لما فيه خير الوطن والمواطن...

لم ينجح أحد

ارتمينا في هموم الوقت وانزاح الستار
	والنتيجه ياولاة الأمر لم ينجح أحد
يابلدنا دام عزك على ايدين الخيار
	بديننا الطاهر ولانرضى بمادونه أبد
ويامليك العرب عبدالله وفي عصر الكبار
	الكبير الله وفي يمناك يالشهم الوعد
دولتك قامت على التوحيد وبكل افتخار
	أفتخر باني سعودي ولوغيري حقد
وافتخر باني لال سعود من عرض الكثار
	أرخص الغالي من الدنيا ونفداهم بدد
الدول من حولنا ترغي ولاتبغى الحوار
	والفتن تزبد يابومتعب كما الداخل زبد
اتصافق حولنا الأمواج من دون اعتبار
	لالدين...ولالمبادي...ولالقيمة بلد
انخطفنا في ظلام الليل وقت الأدخار
	وانخطف معنا الولد وانلحق بام الولد
المواطن ضاع مع تيار واضحى بانكسار
	مادرى من وين يلقاها وماحوله جمد
امركم يصدر لنا باالخير ونقول انتصار
	لكن الواقع مع التنفيذ ملوه بعقد
الغنايم في بطون القوم حد الانفجار
	لامناصب ترتقي فيهم ولافيهم سعد
والفتاوي في خضم الموج جتنا بادهار
	ماكأنا ياأمة الأسلام كد صنا عهد
والأديب بعلمه المنشود جا فيه انحدار
	لاأمانه في كتاباته وفي داره جحد
موجة التغريب تنبشنا على قو الحصار
	والأمانه ماوفوا فيها مع العيش الرغد
أغرقونا بأجنبي المد من زود الدمار
	أهملونا ياعريب الجد من غير الحسد
صادق بقولي ولاعندي مع الحق اختيار
	دام نبضي نبض شعبك ولايقبل هدد
أسأل الله ياصلك ماقلت وتفض الشجار
	والمواطن مع سموم الحر يلقى له برد
والله انك ياسليل المجد محبوب الديار
	اقسم برب(ن)حمى الأمه ومكنها عدد
والصلاه وكامل التسليم من قلب(ن)يغار
	للنبي اللي بشرع الله للباطل خمد

شعر
 

مساجلات مع الشاعر عبدالله بركات عوض بن دخيل السحيمي

الأوادم بعضها بينت لي خلها
	قلتها واعلم اللي بمعنايه شعر
الخليله يابوريان جاها خلها
	راسها يالين حد الظهر كله شعر
افهم الموضوع والا الرديه خلها
	واكثر الشعار في هاالزمن مامن شعر

فأرسلت له هذه الأبيات

أنت ساسي وانت راسي ومنها كلها
	وبوجودك يابن عمي فلاحاصل قهر
النوادر نوادر ف اثمرتها كلها
	والشعر ياللأسف حاصل(ن) له قهر
دنيتك لو زمرت لك وجاتك كلها
	لاتباطاها تحول وتصبح لك قهر
انت عبدالله وجامعها وراعي كلها
	لاتكدر دامني جنبك ولاتطري قهر

ثم ارسل هذه الأبيات

كل عقده ياابن عمي سريع(ن) حلها
	وانت عندي موقعك بالسما كما بدر
والمسائل واجده مير يصعب حلها
	والا ابو زيد الهلالي عجز باخو بدر
وانت ماصبت الهدف عن دروبك حلها
	المسافه واضحه بين ينبع عن بدر

فختمناها بهذه الأبيات

الهدف في عين راعيه دامن شلها
	والله اللي عالمن باالغيب واللي ظهر
المسائل لالفت رجال قرم(ن)شلها
	وان تهاونها وخلاها ف تكسر له ظهر
واليمين الطيبه يبطي الله شلها
	ياولدنا واخونا... ويابطن وظهر

أبيات أرسلتها للشاعر عبدالله بركات عوض السحيمي

دوك ياالشاعر جديده واسمع زلها
	من سنه والمشكله بين نوم وسهر
الدلال الكايفه محسن الله زلها
	والعيون الناعسه ماانعست من سهر
والرجال الحشيمه قضت من زلها
	استخارت باالعظيم الله بتالي سهر
ماتكرر فزة الرجال ليمن زلها
	يغتنمها أو يخليها وتلحق به سهر
والقدم للمماشي على أطيب زلها
	لو لياليها مصيبتها ليالي سهر
مدها دام المنايا سريع(ن) زلها
	وحلها يوم انها انحلت ومن سبة سهر
جتك ياالشاعر جميله صدوقن زلها
	في نهايه خلاف النوم والعله سهر

أبيات أرسلتها لصديق بسبب التفاخر والأمور الدنيويه الفانيه

ذكرت الله دوما(ن) في حياتي
	وأذكره الى يوم المغيبي
وأذكر فضله بكثير خطب(ن)
	وعلم(ن)نال من جهد المشيبي
فأنشدنا مع الآمال بيت(ن)
	لعل الله يغفر للغريبي
من الدنيا درسنا واجتهدنا
	ونلنا العلم من شيخ (ن) مهيبي
رأيت الحق في ماالحق قالا
	بدين(ن)ثم في خلق(ن)مصيبي
وأن الجود كنز(ن)من ينله
	فقد نال البعائد والقريبي
وأن الصدق في المحن الجسامي
	يفوق روائع القلم الأديبي
الا فأعمل وان بلغت قولا
	وزد باالكيل لليوم المريبي
وفي الدنيا كما الدنيا تسمى
	فلا تجزع وان كثر اللهيبي
فلا والله مادامت لقوم(ن)
	ولو كانت لدامت للحبيبي

هذه القصيده خاصه تعبر عن نفسها

يا..............وش فيك ماترد
	وحنا ثمان سنين تنسيق ووعود
عندك يابو نواف لوطال بالعد
	ماضاع حق لصاحبه فيه منشود
أول سلام وسيرة الأب والجد
	رد السلام وحلحله كل معقود
يابن الرجال وراعي الحق منحد
	ومثلك أمين ويعطي الحق ويزود
............معدودتن عد
	حقي ..!! وانا وياه طارد ومطرود
ماعاد نبغى لافوايد ولاقد
	ولاعاد نبغى يابن الأجواد موعود
النفس ملت والصبر جاوز الحد
	والحل مل وصايب الحل مفقود
لازم يابونواف تحرص على الرد
	وتفك ماكمل له اسنين مسدود
مثلك يجيب حلول ويحلحل السد
	تاجر كبير اسمك ولافيك منقود
وانا على رزقي لو احتد واشتد
	راضي ومؤمن باللذي فوق موجود
رب(ن)عليم الغيب بالأمس والغد
	فرد(ن)صمد ماغيره الرب معبود
يعطي وعنده كامل الخير والمد
	لاشك في رزقه ولافيه مردود

أبيات أهديتها لأحد الزملاء بالعام1431هـ بعدما رزقه الله بطفله اسماها (حلا ) بعد طول غياب مشاركا اياه فرحته سائلا الكريم ان يحفظ لنا واياه مارزقنا

الحلا في زهرة الدنيا وفي مقدم حلا
	طفله(ن)طلت على الدنيا بنفس(ن)صافيه
ياهلابك ياربيع البيت من قلبي هلا
	جعلك تعيشي جميل الوقت واجمل عافيه
الله الله في هدوئك وفي زود الغلا
	لأمك اللي عن عيون الناس يمك لاهيه
جعل ربي يحفظك بالدين ويرد البلا
	عن حياتك ياحياه الروح وانتي راضيه
الحلا في بسمتك والله ولوغيرك خلا
	من حلاتك ياربيع القلب وانتي غافيه

هذه القصيده أرسلتها لوالد الأستاذ ناصرالختلان احد الأخوه العزيزين الى نفسي وسببها تعليق الشايب على قصيده ( لم ينجح أحد ) بقوله ( هو وش حاده وانا ابوك..لاوالله الا بيبطي!!)

يابوسعد مسيت بالخير والطيب
	عد النجوم اللي تحوط قمرها
وعد البشر لاصاحب البيت ترتيب
	وعد البحور وماحتوت في بحرها
الليل طال وعيت الشمس ل تغيب
	قمرا وذقنا حرها في سفرها
ياوالدي مليت من روعه الذيب
	ومليت من سقم الحياه وشررها
ومليت من كثر الحكي والمطاليب
	وايقنت بان النفس هذا قدرها
تهنا وجانا بآخر الوقت تغريب
	هذا الخطر لاقيل جاها خطرها
ماعاد ندري من كثير المعازيب
	ولاعاد ندري من عدانا دحرها
كلن يصيح ويخطي الدرب ويصيب
	وكلن على ماقيل ينثر دررها
احترت انا مابين ذوك الرعابيب
	وبين الحياه اللي صويب(ن)نحرها
لكن على الله باتكل والمشاريب
	باسعى لها واجبر زمان(ن)كسرها
وان خانت الدنيا وصارت مشاهيب
	كنز القناعه ينتهي في حفرها
لابد مايعقب شبب هزه الشيب
	والرابح اللي صان نفسه وامرها
ومسيت يالوالد على الخير والطيب
	هي زبده الأبيات واطيب ثمرها

أبيات أرسلتها للزميل محسن السبيعي للوساطه بتوظيف صديق عنزي لم يوفق بوظيفه وكانت فاتحه خير له ولله الحمد

القاف ينظم دامنا اخوان بأسلام
	ويرسل لمن دايم دروبه شريفه
بعد السلام لراعي الذود باكرام
	نبعث له الأبيات مليا..... خفيفه
يابوسعد ناصر تشفع بنا العام
	والعام مر ..ولاحصل له وظيفه
قمنا معاه بكل محمود ينقام
	لاجل الثقال اللي حملها ضعيفه
ولاالله أراد ولاحصل شئ بشمام
	وكلش تعقد في علوم(ن)عفيفه
واليوم عندك سيف وحصان ولجام
	في جو هادي لاتباطا لفيفه
العون حق..ومثلكم عون وحزام
	وفعلك لفعل سبيع لازم نضيفه

هذه مساجله مع أخي الكريم الشاعر أحمد حمود السحيمي واللذي لم أتشرف بالتحدث معه قبلها حيث أرسل لي أبيات تبين لي لاحقا أنه شاعر غزل من الدرجه الماسيه

نفسي يابن مرزوق فيها رايحه
	ودموع عيني من سببها سايحه
راحت ولاجتني ياغير بمرقدي
	في سكره أحلام الليال الشايحه
حتى الهوى لاهب من شرقيها
	استنشقه يمكن تجيني رايحه
من عطرها ياجعلي أفدى روحها
	اللي من المسك المعطر فايحه
عيا غلاها لايفارقني وانا
	اقول ازيحه مير ماني زايحه
اسندتها يمك وانا اللي خابرك
	قلبك خضر ياشاعر الفلايحه
من غيرها نسل الشيوخ وفخرنا
	وايديه حمرا والسبب ذبايحه
فيارفيقي والغلا له سبته
	سر الموده مايعيب بايحه
راع الحميا والنعم في شاربه
	ومن غير مدحي ياكثر مدايحه
لاقالوا الفزعات واهل المكرمه
	فانتم على القمه براس اللايحه
ياشعري المبدوع جمل سيرتي
	واعط الرجال الجزل كب الطايحه

جاريت هذه الأبيات شاكرا لأبو حمود تواصله ومتشرفا ايضا بمعرفته

هبت نسايم من علو .. وطايحه
	ارق من نسمه .....وجتني صايحه
يااحمدبن حمود السحيمي أهلا(ن)
	اعداد ماتقدح لنا ....... قدايحه
ياشاعر(ن) نفخر بفعله واسمه
	يشرب قراح ....... وسيرته قرايحه
اخوك قوله للسحيمي .. كله ..
	لعصاب راسه ........ ماهو للفلايحه
واما عن الفزعه وحق الخوه
	يفداك ماعندي ......... ونملك منايحه
واعلم ترى الدنيا بعمري صعبه
	والوقت ذقنا يالخوي ردايحه
لكن توكل .. في خبرك وشانك
	والنفس عودها ........تجي مرتايحه
أحيان نقوى بأمر ربي فزعه
	وأحيان ...... يديني ...... تعود مايحه
نفسك ونفسي جعلها بالقمه
	لو فارق أعمار المعاني ........... بايحه
الخيرعند اللي علينا مطلع
	واللي يبيحك ............. يالسحيمي بايحه
عادت نسايم مع صلاتن على النبي
	هي راحه الأنسان واجمل فرايحه

سأبقي في بعض مساجلاتي مع اخي الشاعر احمد حمود السحيمي حيث غاب فتره بعد القصيدتين السابقتين واحببت السلام عليه ودعوته للمشاركه بالملتقى الأجتماعي الأول

يااحمد بن حمود السحيمي وينك
	أيام راحت ماخلت من زينك
غيبتك عنا .. سببت لي وعكه
	وانت المداوي..والدوا في عينك
حنا وعدنا قبل شهر(ن) فارق
	وعد لجبرك .. وطالبك في دينك
مجبور ترقى بالمعاني معنى
	الوقت وقتك .. والرمي من بينك
ندعيك بهلالي على أول طرقك
	وانت اللذي تدعي وتكمى شينك
الوقت وقتك والبشر في صدمه
	لاعاد تذخر.. مابقى من غينك
نبغى من الفاخر جديد افكارك
	واوعدك ما نشد لو تطول وينك !!

شرفني ابو حمود بهذه الأبيات

موجود تلقاني ذرى ويمينك
	رفيق ومعادي على معادينك
لو ان عذري مايجمل.. لكن
	ان قاله الله يالخوي مرضينك
حنا الغياب اللي تقوله .. فينا
	والا انت والله بالوصل لاقينك
غير القوافي فيه حق(ن)واجب
	الواجب اللي تعرفه من حينك
والحظ ماش ومالقيت علاجه
	لكن يادرب العنا .. ماشينك
ودام الذهب في ايديك لاتنسانا
	واشره علينا كاننا ناسينك

أبيات في سوق الأسهم عام ( 2008 )وبالتحديد بشركه المواشي المكيرش سابقا
عندما أوقفت عن التداول نظرا لخسائرها المتراكمه وتحويل اسمها لأنعام القابضه

قالوا غزيز السوق قلت المواشي
	اللي عقب ضيم الزمن صارت أنعام
تسوى لها والله .. مليون حاشي
	من خيرة اللي داخل السوق ينسام
لو وصفوها في كبير الخشاشي
	أو وقفوها خارج السوق من عام
باشري بها كاش(ن)وللكاش كاشي
	واللوم للي فيه الأيام تنلام
بالسوق كلن واقع (ن) بابتلاشي
	وكلن يدور له شديدات وحزام
اللي تمنى حاضره .. حيل داشي
	واللي تغنى بيض الأيام منضام
والغانمه ..للي مع الموج هاشي
	دامه رسمها دون الأقلام رسام
يالله ياللي عالم (ن) بالمماشي
	يارازق الطير اللذي بالسما حام
تغفر لنا وقت الحشر والتلاشي
	وتلطف بنا وقت الصعيبات قدام

هذه مساجله مع الشاعر ضيف الله محمد السهلي حيث أرسلت له أبيات من باب المزاح بعد ذهابه للعديد من الدورات في مجال عمله..

ليش تخفي يارفيقي دام رايح بانتداب
	والعلوم اللي رفعها الصدق ..... تبعد عنها
مانحسدك لو تغوص بحور وتشق السحاب
	ولو تغص من الدراهم وتحسن زمها

هذه بعض أبياتها وكان أن شك في معناها فأرسل هذه الأبيات ..

يامرحبا ترحيبه (ن) كلها أطياب
	العود الأزرق فايح (ن) من نباها
ويامرحبا ترحيبه أقراب بأقراب
	قبيله ( ن) من عقب شتت نحاها
ويامرحبا بالقاف لو كنت مرتاب
	قصيده(ن) ماادري وش اللي وراها
هي مزح وألا رزح وألا لها أسباب
	وألا تميل النفس مع مشتهاها
أحيان أقول انه مزح بين الأصحاب
	واحيان أقول ان له هدف من وراها
لكن ابحرفها عن الرزح والناب
	للطيب يوم ان السحيمي بداها
الأوله ماللحسد بيننا باب
	أعرف شخصيتك من مستواها
يرفعك عن هاذي وهاذيك الأنساب
	اللي مجودتن عريب (ن) ضناها
من غير قاصر في هذولاك الأشناب
	الخوه اللي ينطرب من لفاها
وأما السفر ياصاحبي كلنا أغراب
	بالخرج وألا لو تباعد مداها
لوان مافالخرج غير الهوى الهاب
	لاجات وحده الظهر غبر سماها
وآخذ ثلاث أيام والجو ماطاب
	عج وسموم ومستمر(ن) بلاها
والبيت لو قفل يبي يمتلي تراب
	اتقول كساره وجارك بناها
ونصبر على ماقيل ناخذ بالاسباب
	والرزق عند محمل الغيم ماها
نبي لنا فله .. لها اربع أبواب
	وكراج أدخل موتري في فناها
وليا تحقق مالحقني تنشاب
	عطيت ابوعواد عهده ..عطاها
ذي رمعتي للمزح من بين الأصحاب
	وألا النفوس مبين لي صفاها
وحنا ترانا ربع واخوان واحباب
	ارجال لحفنا المراجل ارداها
واسلم وسلم لي على هاك الأشناب
	الخوه اللي تنعرف من بناها

جاريته ووضحت له بهذه الأبيات ...

حي الرفيق.. وحي ذوليك الأسباب
	الرفقه اللي لاشكك في صفاها
وحي الجواب اليا انوجد فيه مشهاب
	يرفع صدى التفكير في مستواها
ذكرتني ياصاحبي حب الأحباب
	وذكرتني بعض العلوم ورجاها
وذكرتني بأني مع الخلق لعاب
	افرح لها .. ثم اشتقي من شقاها
بالليل أهيجن كني بجن منصاب
	بالخرج جعله (....) من بناها
اسهر واسامر نجمه الليل بعتاب
	واصبح بها مخطي وادور رضاها
وضعي كما مهبول للنار شباب
	شباب نار .. ومكتوي في سناها
والا انت مابيني وبينك تنشاب
	مسلم وعوفي.. نطّحن في رحاها
يامرحبا بك عد ماسافر أجناب
	لبلاد غيربلادهم .. في هواها
ويامرحبا بك عد ماتوخذ أتعاب
	من دون حق وروحت في عماها
وان كنت بالأبيات سجيت مرتاب
	قصدي بها ثنتين قلبي خفاها
يمكن مع الميزان تاتيك بكتاب
	ويمكن أضيع بعض من محتواها
وحده هيام القلب باحباب واقراب
	لو كنت مخفيها عن اللي قراها
والثانيه لاحترت في زحمه الغاب
	دور رفيق (ن) همته ماكماها
قدر الرفاقه ماهو مزوح والعاب
	والنادر اللي مانبلش ف ارفقاها
هذي علومي والزمن حيل كذاب
	يظهر حلى الدنيا ويخفي رداها
عايشتها مع شده العود والناب
	ودعيتها في وقت ماحدن دعاها
لكن هي الدنيا ومحسوبه حساب
	دنيا تسمى باسمها من غباها
ايقنت بانه مابها راس مرقاب
	وايقنت بانه حالم(ن) من بغاها
الله كريم وراحمن سود الأهداب
	لو هام فيها ليلها واهتواها
تم الكلام ويمكم ود باسراب
	من قلب صافي مانشد عن غثاها

مخاوي ابليس
 

مخاوي إبليس

سجل معنا في هذا الموقع عضو بأسم مخاوي ابليس ولاحول ولاقوه الا بالله
فكانت هذه الأبيات لعلها تصل مسامعه ..

ياابليس وش عندك لنا غير ياابليس
	وانا اللذي حاسبك ياابليس غايب
ياابليس لك عندي بالأبيات تنفيس
	لو المحال حسين ( يقلبك تايب )
ياابليس قول الحق دك المتاريس
	(شدّ العزوم) ... ودايم الحق صايب
الملتقى ناجح .. وبكل المقاييس
	غصب (ن) عليك ولو غدى الراس شايب
حنا مع الله وانت معك المفاليس
	واللي تبعك مضيّع الدرب .. خايب
من عهد ابونا آدم بدعت الوساويس
	عقب السعد خليت فيها طلايب
وامضيت عمرك بين كذب (ن) وتدليس
	بين البشر ولسود الأفكار جايب
واليوم بان الحق ...... وبدون تلبيس
	روّح بعيد وخل عنك القرايب
حنا ترى السحمان .. للدين تقديس
	بقلوبنا والدم بالدم رايب
اللي يخاوي إبليس وإن جابه إبليس
	نقرى عليه آيات ويقوم طايب

حفظنا الله واياكم من ابليس

تويتر اللي نال عرش الآآآمه
 

تويتر اللي نال عرش الآآآمه


هذه أبيات أرسلتها للأخ معيض البقمي أتمنى أن توافق ذائقتكم (بعض الكلمات لقطع الكمبيوتر وبرامجه)

يامرحبا باللي على القاف لعييييب
	اللي فرض دون الرياض احترامه
يومن جمع ربعه وكل الأصاحيب
	عقب أدركوا شرح الرفيق ومرامه
يامعيض أبيض وجه لاشك لاريب
	واشكرك من شاشات فكري و(رامه)
يابن الرجال موردت فطر الشيب
	الحال وشبه كان تدري !! علامه
الوورد و( الأكس ال)زاد الغثاريب
	وقروب بالواتساب فارض نظامه
وتانقو و(آوت لك) و(ايميل تخريب)
	وتويتر اللي نال عرش الآآآمه
وفيس بوك ومعاند وثوره وتغريب
	وتنتيف ريش لثورها والحمامه
الشام يصرخ ماحدن يمه مجيب
	والناس كلن فوق راسه غمامه
حييت ياللي با(البوربوينت)مصيب
	ب(سلايد شو) يسد عنك الملامه
لاصار لاوقتك .. ولاصاحبك ذيب
	احرص على دينك ويعليك هامه
يحميك وان زادت عليك اللواهيب
	ويكفيك من شر الزمان وظلامه

استوت للزحـــولي
 

استوت للزحــــــــــــــــولي


أبيات أرسلتها للشاعر القدير ربيّع عريمان السحيمي ولم أتوقع رده عليها
أتمنى أن يحوز مانطرحه على رضاكم

من تونس الخضرا بدى بالعرب دق
	والشين غادر واستوت للزحولي
وحسني وروّح واتسع عقبه الشق
	والليبي معمر .... عثر بالذلولي
بين الشعوب وحاكمن طقّها طق
	النار شبّت والوضع في ذهولي
ناسن يسيل الدم منها لاجل حق
	وناسن على الشينه تدق الطبولي
وحنا ترانا لو حصل بيننا عق
	وافين دون الدار لاهل الحمولي
هذي حقيقه لوحصل بعدها نق
	من ناس تفرق بالنظر والعقولي
القاف كله صعب وبدربها بق
	ولولاه قلت القول راع الفعولي

وصلتني أبيات من أبونمر أعتز وأتشرف بها ..

ياحسين لاتاسف لناسن تسرّق
	الحكم جاهم سرق ذولا وذولي
واعرف ترى الابرق يجي مثله أبرق
	وان ماصلح قالوا هذاك مهبولي
وافعالهم ماهي علينا تطبّق
	واسلامنا باذن الولي مايزولي
لو دنقوا في روسهم ماندنق
	ألا لخالقنا في وقت العقولي
حنا سعوديين ونشوف ونحق
	ولاننتمي لضعيّفين العقولي
ملوكنا منا وشرعنا يطبقّ
	والراي واحد والمشاعر تدولي
واللي عبر ياحسين مع خط مزلق
	تلقاه وسط الهاويه لو يقولي
ياقايد اللي فالهوا عامله شق
	وانتا بها حول الكواكب تجولي
من طيب خاله ماعلى والده عق
	وفي طاعة الخلاّق ماهوكسولي
لا اتابع اللي خلف الأبواب يطرقّ
	مفتّحه .... والا عليها قفولي
حنا بني نجوان ...للطيب نسبقّ
	بينك وبين الطيب ماحدن يحولي

شجعني أبونمر فأرسلت له هذه الأبيات

حي اللذي بالقاف .. غنّى وصفّق
	وطرّى عليه اعلوم حوله تجولي
طرّى بني نجوان بالعلم .. وابرقّ
	من طيب راسن مالحقها الخمولي
شاعر من السحمان بالجنب ملصقّ
	يكفيك وقت الحال يصبح نزولي
أمسى براس ادقسّ .. أصبح وشرقّ
	جنوب وألا شرق ... دايم شمولي
يابونمر .. دارن تشابه وترهقّ
	بالليل ... وقت الليل نورن يهولي
قامت ملايينن من الناس تطبق
	الحال ضاقت والبشر في ملولي
كلن على ليلاه .. عجلن ويطبق
	والكل سارح يالخوي في ذلولي
الله يجيب الخير عاجل ويلبقّ
	بديارنا .. دار الهدى والرسولي
وبالخاتمه اذهن ترى الوقت يمرقّ
	خلك على دينك سريعن عجولي
يرفعك يومن ناس عن ناس تفرقّ
	والا الحياه .. مقدّره في رحولي
سمره براس ادقس معكم تروّق
	وتسد عندي عن حديثن يطولي
اوعدك انا مابوق واصحك تبوّق
	وعدن عليه الدين دون الميولي
والسالفه ماهي ترى خاتمة بق
	السالفه نفسي من أول زعولي

وش علينا مــــاسك ؟
 

أتتشرف بأطلاعكم على أبيات أرسلتها لأخي الكريم الشاعر احمد حمود السحيمي وهي عتاب خفيف وأعلم والله مشاغله اللي تمنعه عن التواجد المستمر لكن ماقدرت أمتنع عن ارسالها له

يااحمد عجزنا وش عليناماسك
	ماعاد نفهم وش يدور براسك
أبعدت عنّا يالخوي من فتره
	ولاادري وش اللي يارفيقي حاسك
حنّا زمان أوّل بدينا خوّه
	يوم البشر شتّى ومنهم ناسك
يوم التقينا بالكلام الطيّب
	وغنيّت بالحانك على مرواسك
افرحت قلبي والعيون تناظر
	ترقب لقاك وتشتهي مجلاسك
قلّي بربك !! وش طرى يالغالي
	الشوق وشبه مختلف بقياسك
ان كان باسباب القصيدالواجد
	العن قصيدي واكسره مع كاسك
وان كان شيطانك لبسك وشالك
	ماهو بأنا اللي يزعله ملباسك
أنا وخيّك لو تقوم وتقعد
	وانا المكان لفرحتك واتعاسك
وأعلم ترى العلم الرفيع يسجّل
	وحتى جفاك يسجله قرطاسك
للملتقى ندعيك لآآآآخر مرّه
	جعله يدوم وينتعش بأنفاسك
ماعاد فيه أعذار تقبل منكم
	ألا بعذر(ن) لاحصل متماسك
والخاتمه روح الرفيق تعزك
	وحزامها وقت الشدايد باسك

وليعذرني ابوحمود لكن الأهم أنه يعلم ماله من المحبه والتقدير

صغير النامس
 

أبيات كتبتها في شتاء 1434هــ نسأل الله الهدايه

البارحه وسط الظلام الدامس
	والنار تشعل واليدين اترامس
صحيت قلبن(ن)ماخذن له غفوه
	وخربت نومه بالحديث الهامس
حطيت له مركى وقلت أرشدني
	الوضع حولي يالخوي متلامس
قال البقى ياحسين ماهو وقته
	برد الشبط وشبه عليكم حامس
صحيتني والله من أحلى نومه
	وشهوله أصحى بالزمان العامس
قلت اذكر الله لاتشمت فينا
	واللي مضى كثر عليه الطامس
الكل منا قاسيات ظروفه
	لكن وش الدبره ووين الشامس
قام وتساوى لي وقال اسمعني
	ثمن تعوذ من لعين الخامس
الراي عند الله وثمن عندك
	ياللي هوى نفسك لحظك غامس
اللي يبي يسعد يواصل ربه
	لايصير في حق الولي متكامس
تراك والله يال ابن آدم كلك
	يقواك مع كبرك صغير النامس
قلت احلم احلم لاتزيد اهمومي
	ياقلب جعلك مايجيك الرامس
عز الله ان العلم مثلك جابه
	للي شقى واللي ابتلاه اللامس

المصري سعودي صميم
 

هذه قصيده كتبتها عام 1434هــ عندما تم إقتحام السفاره السعوديه بالقاهره وكان أن تم سحب السفير السعودي على إثر تلك الحادثه ولما لم لمصر من مكانه بأمتنا العربيه والإسلاميه خاصه بعد ذهاب العراق بأيدي الصفويين قبّحهم الله

حنّا مصر ياسامعين والمصري سعودي صميم
	متوافقين بطبعنا ثم اسمعوا ياسامعين
منزالنا منزالهم والمصري بداره مقيم
	وحنّا مصر دار(ن) لنا وبدارنا متمسكين
كل الروابط بيننا مايفصل الرابط لئيم
	لو حاولوا أعدائنا مانختلف لو بعد حين
اللي حدث خير(ن) لنا وبمنهج الدين العظيم
	ازداد عمق الرابطه واضحت مثل للمسلمين
عز العرب مليكنا سيطر على الوضع الأليم
	قبل يتمادى شرّها ونصبح جميعا خاسرين
اخوان لو جار الزمن مازعزع الود الحميم
	وحتى الخلاف ليا حصل .. نصير به متكاملين
نقود أمّه مسلمه بظلمة الليل البهيم
	وبّاسنا ورجالنا نردع جموع المعتدين
تاريخنا مصدر فخر وبقدرة الرب الكريم
	صد الثلاثي ماترك دار العرب للعابثين
وتاريخنا عز وشرف نلعن به ابليس الرجيم
	لا مايفرق صفّنا كيد(ن) وراه الكائدين
ميزاننا بين الدول ماجابه الدرب العقيم
	جابه عزوم رجالنا بالعلم والحق المبين
يامصرنا لاترحمين أهل الدسايس والنميم
	وحنا ترانا طبعنا نرجم عموم المفسدين
انتي لنا يامصرنا على الصراط المستقيم
	وحنا لكي ولشعبكي غصبن عن اللي حاسدين
يادارنا دمتي فخر منهجكي الدين السليم
	ومصر العروبه شامخه ترقى قمم بالثائرين
حنا الأخوه بيننا وثّق لها الوقت القديم
	والله يديم وصالنا ضد الفتن والمفتنين
جيتم لنا في داركم ماردكم فعل الغشيم
	وحنّا بعد سفيرنا عوّد لكم يالمكرمين
كانت سحابه عابره والود يبقى المستديم
	مابيننا واخواننا ضد المكر والماكرين
وازكى الصلاه بخاتمة ( المصري سعودي صميم )
	على النبي الهاشمي محمد الحق الأمين