ديوان الشاعر بديع القاف
 

قالوا من انت؟وقلت:شاعر من سحيم	نفسي على بدع القوافي شغوفه
أعلم الي يجهل الشعر تعليم	واخلي الاعمى طريقه يشوفه

أنثر بين أيديكم ماجادت به القريحه من عبق القصيد الذي لاشك فيه هو متواضع أمام هامتكم
وأتمنى أن أوفق في طرح القصائد التي ترتقي ألى ذائقتكم الشعريه
وأرجو من أعضاء وزوار هذا الملتقى العملاق أن يدمحو زلتي أن وردت ولهم مني خالص الود والحب والتقدير

محبكم الشاعر/عيسى بن سليم بن فالح السحيمي الحربي
%بديع القاف%

سحيمي
 

السلام عليكم ورحمة الله وبركاته
أستهل بداية هذا الديوان بهذه القصيده الخالده التي لم يتطرق شاعر على كتابة قصيده بهذا الأسلوب
أزفها لكم على أمل أن تحوز على رضاكم وأعجابكم واستحسانكم
لكم مني أطيب الأماني

سحيمي ولا له في وطى الارض مجلاس	عالي وشامخ كالجبال المنيفه
سحيمي ولا عمره مشى درب الادناس	يمشي مع دروب الرجال النظيفه
سحيمي ولا عمره حنى للنذل راس	لو جارت ظروف الزمان العصيفه
سحيمي ولا يصحب خبيثين الانفاس	أهل الردى واهل النفوس الضعيفه
سحيمي واذا جاله مع الشعر هوجاس	جزل القصيد ودلة البن كيفه
سحيمي وابوه معرب الجد والساس	وخاله سلايل شارب الدم سيفه
سحيمي بربعه لعتزا ترفع الراس	أهل الحميا والعلوم الشريفه
مافيهم الي للردى بالقدم داس	للجار حشمه للمعادي صليفه
سحيمي ولا له شيك في بنك الافلاس	واليا ارتكى شال الحمول الكليفه
سحيمي على ماقيل طيب وحساس	واليا زعل مثل السيوف الرهيفه

محبكم%بديع القاف%

ذنوب ومعاصي
 

أطرح هذه القصيده المتواضعهوأتمنى أن تلاقي رضاكم واستحسانكم
دمتم بخير

يارب تغفر زلتي كان زليت	وتغفر لي ذنوبي وكل المعاصي
ياكثر فالدنيا من ذنوب سويت	واطلب من الله تركها والخلاصي
من قبل يوم(ن)يبعث الحي والميت	فالماقف الي تشيب منه النواصي
ماينفعك يالعبد ترديد ياليت	مال المقدر لنكتب لك مناصي
والصاحب الي كل ماعنه اقفيت	يرمي على مقفاك رمي الرصاصي
عند الرخى يفتح لك الباب لا جيت	وعند الشدايد صد عنك وحاصي
الي كذا فجر عليه الدناميت	وعد كما المحكوم فيه القصاصي
والصاحب الي يفز لامن تعزويت	يعرف اذا فالوقت صار اختباصي
يدمح لك الزله ليا منك اخطيت	ولو حاجتك ومصط البحر فيه غاصي
مافيه مثلك يافتى الجود خاويت	مافيه مثلك بين داني وقاصي
مع خوتك روس الطويلات عديت	وطوعت من هو فالزمن كان عاصي
ياعل تفداك الرخوم الهلافيت	والبنز..وال bm مع جيب شاصي

محبكم%بديع القاف

ديرة اجدادي
 

كل شاعر يتغنى بموطنه الذي نشأ وترعرع فيه
وهنا أوردت قصيدتين لكي تأخذ حيز أوسع في النشر في قرية العثياء
مع أمل الرضا والقبول والأستحسان
دمتم بود

أنا اشهد ان العثيا حبها زادي	من زود حبي لها صغت الشعر فيها
وشلون مااحبها؟هي ديرة اجدادي	لا والله احبها واحب اهاليها
هي ديرة العز..هي عيدي..وميلادي	أعز من عزها واعيف شانيها
عسى العثيا يجيها غيم ورعادي	وتربع البل بها ويسيل واديها
واشب ناري على دله وبرادي	بالديره الي يزيح الهم طاريها
والي يعذربها جعله للنكادي	يختل عقله وعينه مايرى بيها

مادام كل(ن)يعز الي هو يحبه	أعز انا ديرتي في كل الاحياني
احبها حب مامثلي أحد حبه	حب(ن)يخلي ضميري دوم شفقاني
لاضاق صدري هي علاجه وهي طبه	والقاف في وصفها عاجز..وحيراني
ياعل ربي يسوق الغيم ويصبه	بلي غلاها سكن قلبي..وشرياني
واشوف فيها رجوع الدار معشبه	ومع كل وادي مشاه السيل روياني

محبكم%بديع القاف%

هموم وطواريق
 

قصيده أرسلتها ألى خليلي ورفيق دربي عبدالكريم حماد السحيمي(دايخ الراس)
فالرفيق هو من يجلي همك بعد الله
وهذه القصيده تشرح مافيها من معاني واضحه

البارحه ليلي هموم وطواريق	أبني عمد طاروق واهد طاروق
ودموع عيني فوق خدي مدافيق	والقلب من بين المعاليق مفتوق
عفت الرفيق وعفت بعض المخاليق	الي كلامه عادم بكل منطوق
وليت ياهالوقت كلك تفاريق	ودي أسولف معك ياوقت واروق
الوقت ياخلي حظوظ وتوافيق	وانا من صدوف الزمن جاني العوق
صارت حياتي بين ناسٍ مطافيق	وابعدت عنهم قلت لا صير مطفوق
مشتاق انا لشوف الرجال المطاليق	مثلك يابو حماد بالعقل والذوق
اسهر معك طول الليالي ولا اضيق	ماشفت مثلك فالمخاليق مخلوق
الوضع مايحتاج ياخل تحقيق	هذي محبه بين عاشق ومعشوق
نرقا على روس الجبال الشواهيق	ومن لامنا قلبه من الحسد محروق
لا تشيل هم الحاسدين المنافيق	أدعس عليهم خلنا نرتقي فوق
مااقولها ضحكه..ومزحه..وتعليق	هذا الصحيح وكل مطرود ملحوق
جاتك قصيده عندي احلا من الريق	من شاعرٍ يلعب على كل طاروق

محبكم%بديع القاف%

وصايا
 

قصيده صنفت من أجمل قصائد الحكم في منتدى الشاعر ناصرالفراعنه
أتمنى أنت تلاقي أستحسانكم
دمتم بود

ياخل انا بوصيك عدة وصيات	خذها من مخاويك للخير ناويك
أبعد عن الي فعلهم دوم هفوات	وابعد عن النمام واحذر يماشيك
واعرف ترا الانذال ويل(ن)وويلات	أبعد عن الانذال واعرف مخاويك
الصاحب العوان وقت المشدّات	خلك معه لاتفارقه في خطاويك
وابعد عن الدخان وبعض المجلات	أعرف ترا الدخان مصدر بلاويك
مزه..ومزه..يعطن النفس حسرات	تلاقى الفعل بعدين والجان اياديك
واحذر بعد ياخل بعض المجلات	فيها صور ياخل سبح لباريك
واخذر من الدشات ساس الخساسات	ابعد عنه ياخل الله يخليك
فيه الفتن ياخل فديو كلبات	لاشفتها ياخل ويلي على ذيك!!!
لاجات أليسا مع بنات(ن)عريات	تجيني هموم الدهر والدواكيك
نجوى تجي تغني تسوي حركات	وروبي على الدبكات ترقص توريك
دنيا التخلف..والفتن..والملذات	تعطيك من حلو الليالي وتغريك
وبعطيك من تجربتي بوقتي اثبات	يمكن تفيدك في مقادم للياليك
مايذبحك ياخل غير القرابات	والا عدوك تدري انه معاديك
كم حي فالدنيا نعده كالاموات	وكم مية(ن)ذكره مع الناس يكفيك
ولازم تنبه للذي قادم وآت	ترا زمانك لو صفالك يجافيك
أهل الحسد سوت معارك وغارات	منشان لقمة عيش ماودها ليك
صحيح مانملك قصور وعقارات	لاكن في بنك المراجل لنا شيك
وحطيت في درج التجارب ملفات	ودي أبينها على شان تنبيك
راع الرخا لاجيت له فالشديدات	ماينفعك بريال لو قلت ناصيك
وايقن ترا لبعض الاصاحيب غايات	أليا قضوهاعيبو في مماشيك
واقنع ترا فالوقت حزن..ومسرات	والي مدحك اليوم بكره بيشنيك
واحذر تزعزع داخلك عزة الذات	لو عشت في دنيا الفقر والصعاليك
هذا بديع القاف شطره على آت	والقافيه يوم يحبكها على إيك
أنا بدعت القاف حلو(ن)ومرات	يقولها خل(ن)يعزك ويغليك

محبكم/بديع القاف

يوم اقبلت
 

أبيات غزليه لاقت أستحسان كبير من الشعراء ومتذوقي الشعر في المنتديات ومواقع التواصل
أتمنى أن تلاقي رضاكم واستحسانكم دمتم بخير

يوم أقبلت كلٍ لها فز وارتز	حتى طحاطيح الرجال القرومي
ما فيهم الي من لمحها لها خز	والي على الكرسي طريحٍ يقومي
يازينها لا جات والصدر.يهتز	مثل الغصن يلعبه الريح يومي
وآجز قلبي جزت اليسف لا جز	ووبل عيني مثل وبل الغيومي
وآفز حالي فزت الجيب لا فز	وآشيب راسي من كثير الهمومي
ياخال والله مثلها تشوف تعجز	أشوفها مثل القمر والنجومي
يلزني قلبي على وصفها لز	من عقبها والعين عيت تنومي
ومن لامني في حبها قلت له طز	الله يلوم الي لعيسى يلومي
وترا القصيده كلها هرج موجز	وباقي تفاصيل الجسم والهدومي

محبكم%بديع القاف%

شاعر ومزيون
 

يقولون...خير الكلام ماقل ودل
أبيات متواضعه أمام هامات الشعر ومتذوقيه
ربما تكون فلسفة شاعر..وربما تكون واقعنا الذي نعايشه
أسموها ماشئتم على أمل الرضا والأستحسان
دمتم بود

قالوا طلع شاعر من سحيم مزيون!!	مزيون في شعره..وهرجه..وطوله
شاعر على ماقيل:باالشعر مفتون	بحر الشعر ماعاد يخشى نزوله
أحيان شعره ينتفض كنه جنون	واحيان يبني من معانيه دوله
واحيان شعره للمزايين مرهون	وكل(ن)على ماقيل يتبع ميوله
شاعر..ولا همه ترا هرج مجنون	ولا همته والله ناس مهبوله
والي على مقفاه دايم يهرجون	والي يسرج لدنائه خيوله
تدرون ويش الي عمى الناس تدرون؟	تدرون والا ياجماعه أقوله
حب الفلوس الي لها الناس يسعون	ألي تسمى في زمنا رجوله
لو هو ملك في دنيته مال قارون	يبغى المزيد وكل نفس(ن)عجوله

محبكم%بديع القاف%

دايخ الراس
 

قصيده صنفت ضمن مجلة (أحلى القصيد) وهي مهداه ألى رفيق دربي وخليلي/عبدالكريم بن حماد السحيمي%دايخ الراس%
لكم خالص تحياتي.......

خلاص سميتك انا دايخ الراس	مدري: من الفنجال والا شجاعه؟
كانه من الفنجال دله..ومحماس	تكفيك عن شوفة ردي البضاعه
وكانه شجاعه احتزم واعصب الراس	وازهم علي اليا بغية المناعه
يالصاحب الي مالقينا له اجناس	لا من بعيد ولا قريب الجماعه
يالنادر الي في زمن ينفخ الراس	راس الزمن ماتفرقه من كراعه
وليت ياوقت العنا..وقت الاتعاس	وليت ياوقت النكد..والضياعه
من دنيتي ياصاحبي صرت محتاس	والقلب له مده يزيد التياعه
قلبي يبو حماد طيب..وحساس	والنار فيه تشب في كل ساعه
من عقب ماشفة النذل صار نوماس	والحر عايش بين ذل..ومجاعه
وتصير عايش بين حاسد..وهلاس	والا مابين اهل الطمع..والجشاعه
وان كان بعض الناس رصيده الماس	انا رصيدي فلحياه القناعه
من رحمة الله مادخل قلبي الياس	والي مقدر غصب ياتي..وطاعه
واعوذ بالله من غثى كل وسواس	واستغفر الله كل حز وساعه
وصلاة ربي عد ماهب نسناس	على النبي ومن نهج بتباعه

محبكم %بديع القاف%

كذب الاقراب
 

قصيده مدويه كما وصفت وصفها بعض المتذوقين والشعراء بأنها (القاصفه)ووصفها بعضهم بأنها (الرصاصه التي تصحي النائم) ووصفها بعضهم بأنها (الشامخه) وكثرة مسمياتها ألخ....
أوردت هذه المسميات لمكانة هذه القصيده عندي..
أتمنى أن تلاقي الرضا والأستحسان
دمتم بحب

ياصاحبي وش رايك ابعض الاقراب	ألي يصدق كذبته لا هرجها
الي كذا ودك تسميه نصاب	دام التخلف..والحقاره نهجها
مسكين..وضعيف..وواطي..وكذاب	والسالفه لا من حكاها سمجها
هو يحسب انه من عواكيف الاشناب	وانه ليا جات الصعيبه فلجها
مايدري انه خايب الحظ منصاب	واليا دخل مجلس علومه بعجها
أهب ياوقتٍ غدو في الاذناب	هذا يروضها..وهذا سرجها
وخلوك مابين الثنايا..والانياب	أليا تراكها ذاك..هذا علجها
والله لو انه عاصر عقاب..وحجاب	تلقى عليه القوم يصلا وهجها
أما رموه برمح..والا بمشعاب	وخلوك تايه فالبحور ولججها
لاكن جاله في زمن يفتح الباب	متخالطن زيودها..مع لحجها
يلبس من لباس المراجل له ثياب	وان جاته الدنيا رضعها..ولهجها
ويصير مايحسب لك انتَ ولا حساب	وان حدّته دنياه دارك ولجها
ماعاد تنفع به مشاريه وعتاب	مادام زادو بالمراره همجها
مشكاي للي تخضع لحكمه ارقاب	ألي ليا جات الشدايد فرجها
والا انت (ياخلي) ترا سيد الاحباب	واهل الحسد فاحت علينا خمجها

محبكم%بديع القاف%